Viral Fever: వామ్మో జ్వరాలు.. నల్లగొండ జిల్లాను వణికిస్తోన్న వైరల్ ఫీవర్స్.. రోగులతో హాస్పిటల్స్ ఫుల్..
Viral Fever: మొన్నటి వరకు కురిసిన భారీ వర్షాలు, వాతావరణంలో అనూహ్యంగా చోటు చేసుకుంటున్న మార్పులు వెరసి నల్లగొండ జిల్లాల్లో విష జ్వరాలు వ్యాపిస్తున్నాయి. ఉమ్మడి నల్లగొండ జిల్లాలోని పల్లెలు..
Updated on: Aug 28, 2022 | 8:15 AM
Viral Fever: మొన్నటి వరకు కురిసిన భారీ వర్షాలు, వాతావరణంలో అనూహ్యంగా చోటు చేసుకుంటున్న మార్పులు వెరసి నల్లగొండ జిల్లాల్లో విష జ్వరాలు వ్యాపిస్తున్నాయి. ఉమ్మడి నల్లగొండ జిల్లాలోని పల్లెలు విష జ్వరాలతో పడకేస్తున్నాయి. ఇంట్లో కనీసం ఒకరు లేదా ఇద్దరు జ్వరాలతో బాధపడుతున్నారు. ఆసుపత్రులు రోగులతో కిటకిటలాడుతున్నాయి. పది రోజులుగా ఉమ్మడి జిల్లాలోని ప్రభుత్వ ఆసుపత్రిలో ఔట్ పేషెంట్ల సంఖ్య రెట్టింపు అయింది.
సూర్యాపేట ప్రభుత్వ జనరల్ ఆస్పత్రిలో సాధారణ రోజుల్లో 300 నుంచి 350 మంది ఔట్ పేషెంట్లు వచ్చేవారు. ప్రస్తుతం ఈ సంఖ్య 600కు పైగా చేరుకుంది. నల్గొండ ప్రభుత్వ జనరల్ ఆసుపత్రిలోనూ ఇదే పరిస్థితి నెలకొంది. యాదాద్రి జిల్లా కేంద్ర ఆస్పత్రిలో సాధారణ రోజుల్లో ఓపిల్లో 120 నుంచి 150 మంది పేషెంట్లు వచ్చేవారు. గత పది రోజుల నుంచి ఆ సంఖ్య 250 నుంచి 300 వరకు పెరిగింది. ఇక ప్రైవేట్ ఆస్పత్రులు కూడా విష జ్వరాలతో పాటు, సాధారణ జ్వర పిడితులతో కిక్కిరిసి పోతున్నాయి. వారం రోజులుగా జలుబు, జ్వరం, ఒళ్ళు నొప్పులతో అల్లాడు తున్నామని బాధితులు వాపోతున్నారు.
అధికారులపై వెల్లువెత్తుతోన్న ఆరోపణలు..
ఇదిలా ఉంటే వైద్య ఆరోగ్యశాఖ జ్వరాల వివరాలను నమోదు చేయడం లేదన్న ఆరోపణలు వినిపిస్తున్నాయి. పల్లెల్లో పారిశుద్ధ్య పనులు సక్రమంగా జరగడం లేదు. పల్లె ప్రగతి, పట్టణ ప్రగతి కార్యక్రమాలు చేపట్టినప్పటికీ భారీ వర్షాలకు ఇళ్ల చుట్టూ నీరు చేరడంతో దోమలకు ఆవాసాలుగా మారాయి. దోమల నివారణకు మందుల పిచికారి, పాగింగ్ లాంటి చర్యలు తూతూ మాత్రంగా చేపడుతున్నారని ప్రజలు ఆరోపిస్తున్నారు. మరోవైపు పైపులైన్ల లీకేజీలతో తాగునీరు కలుషితమవడంతోనే రోగాలు వ్యాపిస్తున్నాయి.
మరిన్ని తెలంగాణ వార్తల కోసం క్లిక్ చేయండి..
