Telangana: ఆ వాహనదారులకు బిగ్ షాక్.. ఇతర రాష్ట్రాల రిజిస్ట్రేషన్లు ఉంటే.. ఇక అంతే..

ఇతర రాష్ట్రాల రిజిస్ట్రేషన్లతో వాహనాలను కొనుగోలు చేసినవారికి హైదరాబాద్ ట్రాఫిక్ పోలీస్ బిగ్ షాక్ ఇచ్చారు. ఇకపై వారంతా కూడా తప్పనిసరిగా టీఎస్ పేరుతో రిజిస్ట్రేషన్, నెంబర్ ప్లేట్‌ను మార్చుకోవాల్సిందేనని.. లేదంటే వాహనాన్ని సీజ్ చేస్తామని హెచ్చరిస్తున్నారు. ఇటీవలకాలంలో ఇదే కారణంతో పోలీసులు నగరంలో కొన్ని వాహనాలను సీజ్ చేశారు. ఆంధ్రప్రదేశ్, మహారాష్ట్ర, కర్ణాటకతో సహా ఇతర రాష్ట్రాలకు చెందిన రిజిస్ట్రేషన్లతో ఉన్న వాహనాలకు.. అక్కడి నో అబ్జెక్షన్ సర్టిఫికేట్(ఎన్‌ఓసీ) ఉంటే సరిపోదని అన్నారు. ఇక్కడ కూడా లైఫ్ ట్యాక్స్ కట్టి, టీఎస్ రిజిస్ట్రేషన్ చేయించుకోవాలని రవాణాశాఖ అధికారులు తెలిపారు.

వేరే రాష్ట్రం నుంచి తెచ్చుకున్న వాహనాలకు అక్కడ జీవితకాల పన్నులు చెల్లించినా.. ఇక్కడ కూడా ట్యాక్స్ కట్టి, టీఎస్ రిజిస్ట్రేషన్ సైతం వెంటనే చేయించుకోవాలని చెప్పారు. ఇతర రాష్ట్రాల రిజిస్ట్రేషన్లతో ప్రతీ ఏటా 10 వేలకుపైగా వాహనాలు హైదరాబాద్ నగర వీధుల్లో పరుగులు పెడుతున్నాయని రవాణాశాఖ అధికారులు అంచనా వేస్తున్నారు.

టీఎస్ రిజిస్ట్రేషన్‌లోకి మార్చుకోవడం ఎలా.?

ఇతర రాష్ట్రాల్లో కొనుగోలు చేసిన వాహనాలను మీరు మీ ఇంటికి తెచ్చుకున్న వెంటనే.. దగ్గరలోని సంబంధిత రవాణాశాఖ కార్యాలయానికి వెళ్లండి. అక్కడ అధికారులు.. కట్టాల్సిన ట్యాక్స్, టీఎస్ రిజిస్ట్రేషన్ నెంబర్ పొందే విధివిధానాలను వివరిస్తారు. తద్వారా ఆ ప్రక్రియను పూర్తి చేయండి.

మరిన్ని తెలంగాణ వార్తల కోసం..