డిజైన్​ చూసి ఏదో అనుకోవద్దు.. దిమ్మతిరిగే మార్పులతో మార్కెట్‌లోకి గూగుల్ పిక్సెల్‌ 11ఎ

కొత్త Pixel ఫోన్ వస్తుందంటే కెమెరా, Android అనుభవంతో పాటు పనితీరుపైనా అంచనాలు భారీగా ఉంటాయి. ఇప్పుడు Google Pixel 11a విషయంలోనూ అదే పరిస్థితి కనిపిస్తోంది. బయటకు వచ్చిన సమాచారం ప్రకారం డిజైన్‌లో పెద్ద మార్పులు లేకపోయినా, Tensor G6 చిప్‌సెట్, 120Hz డిస్‌ప్లే వంటి అప్‌గ్రేడ్లు ఈ ఫోన్‌కు ప్రత్యేక ఆకర్షణగా మారనున్నాయి.

డిజైన్‌లో మార్పులు తక్కువ..

Google Pixel 11a డిజైన్‌కు సంబంధించిన వివరాలు ప్రస్తుతం లీకుల రూపంలోనే బయటకు వస్తున్నాయి. వాటి ప్రకారం Google తన పాత డిజైన్ భాషను కొనసాగించే అవకాశం ఉంది. Pixel సిరీస్‌కు ప్రత్యేక గుర్తింపుగా మారిన ఫ్లాట్ రియర్ ప్యానెల్, పైభాగంలో హారిజాంటల్ పిల్ షేప్ కెమెరా మాడ్యూల్ కొత్త మోడల్‌లోనూ కనిపించనుంది.

అయితే కెమెరా మాడ్యూల్ పరిమాణం గత మోడళ్లతో పోలిస్తే కొంత పెద్దదిగా ఉండే అవకాశం ఉంది. దీంతో కెమెరా హార్డ్‌వేర్‌లో కొన్ని మార్పులు ఉండొచ్చనే అంచనాలు మొదలయ్యాయి. ముందు భాగంలో ఫ్లాట్ డిస్‌ప్లేతో పాటు పంచ్ హోల్ కెమెరా ఉండనుంది. అయితే బెజెల్స్ కాస్త మందంగా కనిపించే అవకాశం ఉంది.

Pixel 11aను Silver, Purple, Grey, Black రంగుల్లో తీసుకురావచ్చని లీక్‌ల ద్వారా తెలుస్తోంది. డిజైన్ పరంగా పెద్ద ప్రయోగాలు చేయకుండా, ఇప్పటికే వినియోగదారులకు పరిచయమైన రూపాన్నే కొనసాగిస్తూ లోపలి భాగాల్లో కీలకమైన మార్పులు చేయాలని Google భావిస్తున్నట్లు కనిపిస్తోంది.

డిస్‌ప్లే విషయానికి వస్తే 6.3 అంగుళాల స్క్రీన్ ఉండనుంది. ఇది 1080×2424 పిక్సెల్స్ రిజల్యూషన్‌తో పాటు 120Hz రిఫ్రెష్ రేట్‌కు మద్దతు ఇవ్వనుంది. ముఖ్యంగా 2250 నిట్స్ పీక్ బ్రైట్‌నెస్ ఉండటం వల్ల ఎండలోనూ స్క్రీన్‌ను స్పష్టంగా చూడటం సులభంగా ఉండొచ్చు.ఇక ఈ ఫోన్‌లో వచ్చే అతిపెద్ద మార్పుల్లో Tensor G6 చిప్‌సెట్ కీలకంగా మారనుంది. Google సొంతంగా అభివృద్ధి చేస్తున్న ఈ చిప్‌సెట్ ద్వారా వేగం, మల్టీటాస్కింగ్, గేమింగ్ వంటి అంశాల్లో Pixel 10a కంటే మెరుగైన అనుభవం లభించే అవకాశం ఉంది.

అసలు సీక్రెట్ ఇదేనా?

Google Pixel ఫోన్లకు కెమెరా సామర్థ్యం ప్రధాన ఆకర్షణగా ఉంది. Pixel 11aలోనూ డ్యూయల్ రియర్ కెమెరా సెటప్ కొనసాగనుంది. కెమెరా మాడ్యూల్ పరిమాణం పెరగనున్నట్లు లీక్‌లు సూచిస్తున్న నేపథ్యంలో, ఇందులో ఉపయోగించే సెన్సార్ల విషయంలోనూ మార్పులు ఉండొచ్చనే అంచనాలు ఉన్నాయి. Pixel 10aలో 48 మెగాపిక్సెల్ మెయిన్ కెమెరాతో పాటు 13 మెగాపిక్సెల్ అల్ట్రా వైడ్ కెమెరా ఉన్నాయి. Pixel 11aలో వీటి కంటే మెరుగైన సెన్సార్లను ఉపయోగించే అవకాశం ఉంది. అయితే Google నుంచి అధికారిక ధ్రువీకరణ వచ్చే వరకు ఖచ్చితమైన కెమెరా వివరాలను నిర్ధారించలేం.

కెమెరా హార్డ్‌వేర్‌తో పాటు AI ఆధారిత ఫోటోగ్రఫీ ఫీచర్లు కూడా ఈ ఫోన్‌లో కీలకంగా మారవచ్చు. Google ఇప్పటికే తన Pixel ఫోన్లలో సాఫ్ట్‌వేర్ ఆధారిత కెమెరా మెరుగుదలలకు ప్రాధాన్యం ఇస్తోంది. అదే విధానం Pixel 11aలోనూ కొనసాగితే తక్కువ ధర విభాగంలో కెమెరా అనుభవానికి ప్రాధాన్యం ఇచ్చే వారికి ఈ మోడల్ ఆకర్షణగా మారవచ్చు. బ్యాటరీ విషయానికి వస్తే Pixel 10aలో ఉన్న 5100mAh బ్యాటరీ సామర్థ్యం కొనసాగించే అవకాశం ఉంది. అలాగే 30W వైర్డ్ ఛార్జింగ్, 10W వైర్‌లెస్ ఛార్జింగ్ ఫీచర్లు కూడా కొత్త మోడల్‌లో కనిపించవచ్చని సమాచారం. Titan M2 సెక్యూరిటీ చిప్ వంటి భద్రతా అంశాలు కూడా కొనసాగవచ్చని తెలుస్తోంది.