పెట్రోల్‌ ధరలు తగ్గేలా లేవుకానీ.. రూ.10 లక్షల లోపు బెస్ట్ ఎలక్ట్రిక్ కార్లపై ఓ లుక్కేయండి!

దేశంలో పెట్రోల్, డీజిల్, సీఎన్‌జీ ధరలు వరుసగా పెరుగుతుండటంతో ఎలక్ట్రిక్ వాహనాలపై ప్రజల ఆసక్తి గణనీయంగా పెరుగుతోంది. తక్కువ నిర్వహణ ఖర్చులు, ప్రభుత్వ ప్రోత్సాహకాలు, పర్యావరణ పరిరక్షణ వంటి కారణాలతో చాలా మంది ఇప్పుడు ఎలక్ట్రిక్ కార్ల వైపు మొగ్గుచూపుతున్నారు. ముఖ్యంగా రూ.10 లక్షల లోపు లభించే సరసమైన EVల కోసం డిమాండ్ పెరుగుతోంది. ఈ నేపథ్యంలో ప్రస్తుతం భారత మార్కెట్లో అందుబాటులో ఉన్న కొన్ని ప్రముఖ బడ్జెట్ ఎలక్ట్రిక్ కార్లు వినియోగదారుల దృష్టిని ఆకర్షిస్తున్నాయి.

భారతీయ మార్కెట్లో అత్యంత ప్రజాదరణ పొందుతున్న ఎలక్ట్రిక్ SUVల్లో టాటా పంచ్‌ EV ఒకటి. దీని ప్రారంభ ధర సుమారు రూ.9.69 లక్షలుగా ఉంది. 30kWh బ్యాటరీతో వచ్చే ఈ వాహనం ఒకసారి పూర్తి ఛార్జ్ చేస్తే 375 కిలోమీటర్ల వరకు ప్రయాణించగలదని కంపెనీ చెబుతోంది. అయితే వాస్తవ వినియోగంలో సుమారు 275 కిలోమీటర్ల రేంజ్ లభించే అవకాశం ఉందని నిపుణులు అంటున్నారు. ఈ కారులో శక్తివంతమైన ఎలక్ట్రిక్ మోటార్‌తో పాటు విశాలమైన బూట్ స్పేస్, మంచి గ్రౌండ్ క్లియరెన్స్ వంటి ఫీచర్లు అందుబాటులో ఉన్నాయి.

బడ్జెట్ హ్యాచ్‌బ్యాక్ విభాగంలో టాటా టియాగో EV మంచి ఎంపికగా నిలుస్తోంది. దీని ప్రారంభ ధర రూ.7.99 లక్షలుగా ఉంది. 19.2kWh బ్యాటరీతో వచ్చే ఈ కారు నగర ప్రయాణాలకు అనువైనదిగా భావిస్తున్నారు. కంపెనీ ప్రకారం ఇది 223 కిలోమీటర్ల వరకు రేంజ్ ఇస్తుంది. అయితే సాధారణ వినియోగంలో సుమారు 168 కిలోమీటర్ల వరకు ప్రయాణించగలదని నివేదికలు సూచిస్తున్నాయి. అత్యంత చౌకైన ఎలక్ట్రిక్ కార్లలో MG Comet EV కూడా ఒకటి. దీని ధర రూ.7.62 లక్షల నుంచి ప్రారంభమవుతుంది. 17.3kWh బ్యాటరీతో వచ్చే ఈ కారు ఒకే ఛార్జ్‌పై 230 కిలోమీటర్ల వరకు ప్రయాణించగలదని కంపెనీ చెబుతోంది. అయితే ఈ వాహనంలో ఫాస్ట్ ఛార్జింగ్ సౌకర్యం లేకపోవడం ఒక చిన్న లోపంగా భావిస్తున్నారు. ఇంధన ధరలు పెరుగుతున్న ప్రస్తుత పరిస్థితుల్లో తక్కువ ఖర్చుతో ప్రయాణం, పర్యావరణహిత సాంకేతికత కారణంగా ఎలక్ట్రిక్ కార్లు భారతీయ కుటుంబాలకు ఆకర్షణీయమైన ప్రత్యామ్నాయంగా మారుతున్నాయి.

మరిన్ని టెక్‌ వార్తల కోసం ఇక్కడ క్లిక్‌ చేయండి