ఇంట్లో స్మార్ట్​ ఓవెన్లు, ఫ్రిజ్‌ వాడుతున్నారా! ఈ విషయాలు తెలియకపోతే AI ముప్పు

ఇప్పటివరకు శక్తివంతమైన AI వ్యవస్థల నిర్వహణకు భారీ కంప్యూటింగ్ వనరులు అవసరమని భావించేవారు. అయితే చిన్న AI మోడల్స్‌ కూడా సాధారణ గృహోపకరణాలను ఉపయోగించుకుని విస్తరించే స్థాయికి చేరుకుంటే సైబర్‌ భద్రతకు కొత్త సవాళ్లు ఎదురయ్యే అవకాశం ఉంది. ఈ అంశంపై Anthropicకు చెందిన AI భద్రతా పరిశోధకులు తమ ఆందోళనలను వ్యక్తం చేశారు.

చిన్న AI మోడల్స్‌తో..

AI సాంకేతికత అభివృద్ధి చెందుతున్న కొద్దీ దాని వినియోగంతో పాటు దుర్వినియోగం జరిగే అవకాశాలపైనా నిపుణులు దృష్టి సారిస్తున్నారు. Anthropicకు చెందిన Frontier Red Team పరిశోధకులు విలియం జౌ (William Zhou), డేనియల్ ఫ్రీమన్ (Daniel Freeman) వెల్లడించిన వివరాల ప్రకారం.. చిన్న AI మోడల్స్‌ వాణిజ్యపరంగా అందుబాటులో ఉన్న ఇంటర్నెట్ ఆఫ్ థింగ్స్ (IoT) పరికరాల్లోకి స్వయంగా వ్యాపించే సామర్థ్యాన్ని సాధించే స్థాయికి కొన్ని నెలల్లో చేరవచ్చని ప్రయోగాలు సూచిస్తున్నాయి.

స్మార్ట్ ఓవెన్లు, తక్కువ ధరలో లభించే Android TV బాక్స్‌లు వంటి పరికరాలు ఈ తరహా ప్రమాదాలకు గురయ్యే అవకాశం ఉందని పరిశోధకులు పేర్కొన్నారు. అయితే ఇది ఇప్పటికే విస్తృతంగా జరుగుతున్న దాడి అని కాదు. భవిష్యత్తులో ఎదురయ్యే అవకాశాలను అంచనా వేస్తూ చేసిన హెచ్చరికగా దీన్ని చూడాలి.

స్వయంగా ప్రతిరూపాలను సృష్టించుకునే AI వ్యవస్థను Self-Replicating AI అంటారు. ఇది తన కోడ్‌ లేదా సూచనలను ఇతర కంప్యూటర్లు, సర్వర్లు, ఇంటర్నెట్‌కు అనుసంధానమైన పరికరాలకు వ్యాప్తి చేయగలదు. ఈ విధానం కంప్యూటర్ వార్మ్‌లను పోలి ఉంటుంది. వార్మ్ అనేది ఇతర కంప్యూటర్లకు వ్యాపించేందుకు తన ప్రతులను తానే సృష్టించుకోగల మాల్‌వేర్‌ రకం.

బోట్‌నెట్‌ ప్రమాదం!

పరిశోధకులు లేవనెత్తిన మరో కీలక అంశం బోట్‌నెట్‌. సైబర్‌ దాడుల ద్వారా నియంత్రణలోకి తీసుకున్న అనేక పరికరాల నెట్‌వర్క్‌ను బోట్‌నెట్‌ అంటారు. తక్కువ ధరలో లభించే, భద్రతా పరిరక్షణలు పరిమితంగా ఉండే IoT పరికరాలను పెద్ద సంఖ్యలో నియంత్రించగలిగితే.. వాటి కంప్యూటింగ్ సామర్థ్యాన్ని కలిపి AI మోడల్‌ను అమలు చేయడానికి ఉపయోగించే అవకాశం ఉందని వారు హెచ్చరిస్తున్నారు.

ఇలాంటి వ్యవస్థకు ఒకే కేంద్రం ఉండకపోవడం వల్ల దాన్ని పూర్తిగా నిలిపివేయడం కష్టమవుతుందని పరిశోధకులు అభిప్రాయపడ్డారు. అయితే దాని విస్తరణ వేగం తక్కువగా ఉండవచ్చని, పరికరాల సంఖ్య రెట్టింపు కావడానికి కొన్ని రోజులు పట్టవచ్చని పేర్కొన్నారు. ఇళ్లలోని స్మార్ట్ టీవీలు, ఫ్రిజ్‌లు, సెక్యూరిటీ కెమెరాలతో పాటు చిన్న వ్యాపార సంస్థలు ఉపయోగించే IoT పరికరాలు కూడా ప్రమాదంలో పడే అవకాశం ఉంది. ఇవి ఇంటర్నెట్‌కు నిరంతరం అనుసంధానమై ఉండటం, కొన్ని పరికరాల్లో భద్రతా ఏర్పాట్లు బలహీనంగా ఉండటం ప్రధాన కారణాలు.

అందుకే వినియోగదారులు పరికరాల సాఫ్ట్‌వేర్‌ను ఎప్పటికప్పుడు అప్‌డేట్ చేయడం, డిఫాల్ట్ పాస్‌వర్డ్‌లను మార్చడం, అవసరం లేని రిమోట్ యాక్సెస్‌ను నిలిపివేయడం వంటి జాగ్రత్తలు తీసుకోవాలి. తయారీ సంస్థలు కూడా భద్రతా లోపాలను సరిచేసే అప్‌డేట్‌లను అందించడం అత్యవసరం. AI అభివృద్ధితో పాటు దాని భద్రతకు సంబంధించిన పరిశోధనలు కూడా కీలకంగా మారుతున్నాయి.