Aadhar Update: సరికొత్త యాప్‌ .. ఇక మీరే ఇంట్లోనే ఫోన్లో ఆధార్‌ ఆప్డేట్‌ చేసుకోవచ్చు..!

ఆధార్ అనేది ఒక వ్యక్తి గుర్తింపును ప్రామాణీకరించే 12 అంకెల ప్రత్యేక ID నంబర్. ఇది ప్రభుత్వ పథకాలు, బ్యాంకింగ్ సౌకర్యాలను పొందటానికి చాలా ముఖ్యమైనదిగా మారింది. ప్రతి వ్యక్తి ప్రతి 10 సంవత్సరాలకు ఒకసారి వారి ఆధార్ కార్డును అప్‌డేట్‌ చేసుకోవడం అవసరం. పిల్లల కోసం జారీ చేయబడిన బాల్ ఆధార్‌ను 5 సంవత్సరాల వయస్సు, 15 సంవత్సరాల వయస్సు ముందు అప్‌డేట్‌ చేయాలి. అలాగే పేరు (కొన్ని షరతులతో), చిరునామా, పుట్టిన తేదీ, లింగం, ఇతర జనాభా వివరాలలో ఆన్‌లైన్‌లో మార్పులు చేయవచ్చు. కానీ మొబైల్ నంబర్, ఇమెయిల్ ఐడి, బయోమెట్రిక్ డేటా లేదా ఫోటోలో మార్పుల కోసం, మీరు సమీపంలోని ఆధార్ సేవా కేంద్రానికి వెళ్లి రూ. 50 రుసుముతో ప్రక్రియను పూర్తి చేయాలి. అయితే రాబోయే రోజుల్లో ఇంత ఇబ్బంది ఉండదు. మీరు కేవలం బయోమెట్రిక్స్, IRIS కోసం మాత్రమే సేవా కేంద్రానికి వెళ్లాలి.

ఆధార్‌ను అప్‌డేట్ చేయడానికి మీరు యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) కేంద్రానికి వెళ్లి, లైన్లో గంటల తరబడి నిలబడాల్సిన అవసరం లేదు. నవంబర్ నాటికి అందుబాటులోకి వచ్చేలా సరికొత్త యాప్‌ను అభివృద్ధి చేస్తున్నారు. దీంతో ఇంట్లో కూర్చొని ఆ యాప్ ద్వారా మీ ఆధార్‌లోని ప్రతిదాన్ని మీరే అప్‌డేట్ చేసుకోవచ్చు. భద్రత దృష్ట్యా, ఆధార్‌ను అప్‌డేట్ చేయడానికి మొబైల్ నంబర్‌కు వచ్చే OTP ఫీచర్ ఉంటుంది. రిజిస్ట్రేషన్ సమయంలో మీరు నంబర్‌ను నమోదు చేసుకోవడం తప్పనిసరి అవుతుంది.

ఈ యంత్రాలను అథారిటీ డేటాబేస్‌కు అనుసంధానిస్తోంది. ఇప్పటివరకు దాదాపు రెండు వేల యంత్రాలు లింక్ చేయబడ్డాయి, ఇంకా 98 వేల యంత్రాలు లింక్ చేయాల్సి ఉంది. ఈ పని నవంబర్ ముందు పూర్తవుతుంది. యాప్ ప్రారంభించిన తర్వాత ఆధార్‌లో ఏదైనా మార్పు స్వయంగా చేసుకోవచ్చు. ఈ డేటాబేస్ జనన ధృవీకరణ పత్రం, డ్రైవింగ్ లైసెన్స్, పాస్‌పోర్ట్, మొబైల్ నంబర్‌తో సహా అన్ని ఇతర ప్రామాణీకరించబడిన సమాచారానికి అనుసంధానించబడుతుంది. బయోమెట్రిక్స్, కంటి గుర్తింపు (IRIS) నమోదు చేయడానికి మాత్రమే ఆధార్ కేంద్రానికి వెళ్లాలి. ఇది కాకుండా ఇతర మార్పులు రిజిస్టర్డ్ వ్యక్తి స్వయంగా చేయవచ్చు.