T20 World Cup 2026: టీ20 వరల్డ్ కప్ 2026లో కలకలం.. 24 గంటల్లో నలుగురు ఆటగాళ్లు అవుట్

T20 World Cup 2026: టీ20 వరల్డ్ కప్ 2026 రసవత్తరంగా సాగుతున్న వేళ, జట్లకు ఆటగాళ్ల గాయాల బెడద కంటిమీద కునుకు లేకుండా చేస్తోంది. కేవలం 24 గంటల వ్యవధిలోనే నలుగురు స్టార్ ఆటగాళ్లు టోర్నీ నుంచి నిష్క్రమించడం క్రికెట్ వర్గాల్లో చర్చనీయాంశమైంది. కివీస్ స్టార్ మైకేల్ బ్రేస్‌వెల్ మొదలుకొని, శ్రీలంక స్పిన్ మాంత్రికుడు వానిందు హసరంగ వరకు.. వరుస గాయాలతో జట్లు కుదేలవుతున్నాయి.

ఒక్కరోజే నలుగురు అవుట్: ఏం జరిగింది?

టీ20 వరల్డ్ కప్ 2026 రౌండ్-1 పోటీలు ముగుస్తున్న తరుణంలో జట్లకు ఊహించని ఎదురుదెబ్బలు తగిలాయి. గత 24 గంటల్లో టోర్నీకి దూరమైన ఆటగాళ్ల వివరాలు ఇవే..

మైకేల్ బ్రేస్‌వెల్ (న్యూజిలాండ్): కివీస్ స్టార్ ఆల్‌రౌండర్ బ్రేస్‌వెల్ ఎడమ కాలి పిక్క గాయం తిరగబెట్టడంతో టోర్నీ మొత్తానికి దూరమయ్యాడు. ఆఫ్ఘనిస్తాన్‌తో మ్యాచ్‌కు ముందు వార్మప్‌లో ఆయనకు ఈ గాయమైంది. ఆయన స్థానంలో కోల్ మెక్‌కాన్చీని జట్టులోకి తీసుకున్నారు.

వానిందు హసరంగ (శ్రీలంక): లంక స్పిన్ మాంత్రికుడు హసరంగకు హ్యామ్‌స్ట్రింగ్ గాయమైంది. ఐర్లాండ్‌తో జరిగిన తొలి మ్యాచ్‌లో కీలక పాత్ర పోషించిన హసరంగ, ఆ తర్వాత గాయం కారణంగా తప్పుకోవాల్సి వచ్చింది. ఆయన స్థానంలో దుషన్ హేమంత జట్టులోకి వచ్చారు.

జస్‌దీప్ సింగ్ (USA): అమెరికా ఫాస్ట్ బౌలర్ జస్‌దీప్ సింగ్ వార్మప్ మ్యాచ్‌లో డైవింగ్ క్యాచ్ పట్టబోయి భుజానికి తీవ్ర గాయం చేసుకున్నాడు. దీంతో ఆయన కూడా వరల్డ్ కప్ నుంచి నిష్క్రమించారు. ఆయన స్థానంలో పాక్ మాజీ బౌలర్ ఎహ్సాన్ ఆదిల్ యూఎస్ఏ జట్టులో చేరారు.

మహమ్మద్ జోహైబ్ (UAE): ఈయన గాయం వల్ల కాదు, క్రమశిక్షణా రాహిత్యం వల్ల టోర్నీ నుంచి తప్పుకోవాల్సి వచ్చింది. యూఏఈ క్రికెట్ బోర్డు ఈయనను తక్షణమే ఇంటికి పంపేసింది.

న్యూజిలాండ్, శ్రీలంక జట్లకు గట్టి దెబ్బ

న్యూజిలాండ్ ఇప్పటికే రెండు విజయాలతో దూసుకుపోతున్నా, బ్రేస్‌వెల్ వంటి అనుభవజ్ఞుడైన ఆల్‌రౌండర్ లేకపోవడం ఆ జట్టుకు లోటే. 2023 వన్డే వరల్డ్ కప్ సమయంలోనూ బ్రేస్‌వెల్ గాయంతో దూరమవ్వడం గమనార్హం. మరోవైపు, శ్రీలంకకు హసరంగ మెయిన్ వెపన్. ఆయన లేకపోతే స్పిన్ విభాగం బలహీనపడే అవకాశం ఉంది.

వరల్డ్ కప్ 2026 తాజా అప్‌డేట్స్

స్కాట్లాండ్ రికార్డు: బంగ్లాదేశ్ స్థానంలో వచ్చిన స్కాట్లాండ్, ఇటలీపై 207 పరుగులు చేసి అసోసియేట్ దేశాల్లో అత్యధిక స్కోరు చేసిన జట్టుగా రికార్డు సృష్టించింది.

భారత్ పరిస్థితి: ఓపెనర్ అభిషేక్ శర్మ పెట్ ఇన్ఫెక్షన్‌తో ఆస్పత్రి పాలవ్వడం భారత అభిమానులను ఆందోళనకు గురిచేస్తోంది.