T20 World Cup 2028: టీ20 ప్రపంచకప్ 2028కు నేరుగా అర్హత సాధించిన 9 జట్లు ఇవే.. ఆస్ట్రేలియా పరిస్థితి ఏంటో తెలుసా?

T20 World Cup 2028 Teams

2028 T20 World Cup Automatic Entry: ఐసీసీ మెన్స్ టీ20 వరల్డ్ కప్ 2026లో సూపర్-8కు అర్హత సాధించిన జట్లు తదుపరి ఎడిషన్‌(2028)కు నేరుగా ప్రవేశం పొందాయి. గ్రూప్-Aలో నమీబియాపై గెలిచిన పాకిస్తాన్, భారత్‌తో పాటు సూపర్-8కు చేరింది. గ్రూప్-B నుంచి శ్రీలంక, జింబాబ్వే; గ్రూప్-C నుంచి వెస్టిండీస్, ఇంగ్లాండ్; గ్రూప్-D నుంచి దక్షిణాఫ్రికా, న్యూజిలాండ్ రెండో దశకు అర్హత సాధించాయి.

2028 టీ20 వరల్డ్ కప్‌కు ఆటోమేటిక్ క్వాలిఫికేషన్ ఎలా?

2028లో ఆస్ట్రేలియా, న్యూజిలాండ్‌లో జరిగే టీ20 వరల్డ్ కప్‌నకు ఆ రెండు దేశాలు సహ-ఆతిథ్య దేశాలుగా ఉండటంతో ముందే నేరుగా అర్హత పొందాయి. టోర్నమెంట్ అర్హత నిబంధనల ప్రకారం, 2026లో సూపర్-8కు వచ్చిన అన్ని జట్లు కూడా 2028 ఎడిషన్‌కు తమ స్థానాన్ని ఖరారు చేసుకున్నాయి. దీని వల్ల టాప్ పెర్ఫార్మింగ్ జట్లు తదుపరి వరల్డ్ కప్‌లో కొనసాగేందుకు అవకాశం లభిస్తుంది.

మొత్తం 12 ఆటోమేటిక్ క్వాలిఫయర్ల జాబితాలో మిగిలిన మూడు స్థానాలు మార్చి 9 (ఫైనల్ తర్వాత రోజు) నాటికి ఐసీసీ మెన్స్ టీ20ఐ ర్యాంకింగ్స్‌లో టాప్‌లో ఉన్న జట్లకు ఇవ్వనున్నారు. ప్రస్తుతం బంగ్లాదేశ్, అఫ్గానిస్తాన్, ఐర్లాండ్ ఈ మూడు స్థానాలను దక్కించుకునే అవకాశాల్లో ముందున్నాయి. కట్-ఆఫ్ తేదీకి ముందు ఆయా జట్ల ర్యాంకింగ్స్‌ను ప్రభావితం చేసే మ్యాచ్‌లు లేవని సమాచారం.

మిగిలిన 8 స్థానాలు ప్రాంతీయ క్వాలిఫికేషన్ మార్గం ద్వారా భర్తీ చేయబడతాయి.దీని ద్వారా 2028 టోర్నమెంట్‌లో గ్లోబల్ ప్రాతినిధ్యం ఉండేలా ఐసీసీ చర్యలు తీసుకుంటోంది.

సూపర్-8 దశకు రంగం సిద్ధం..

ఐసీసీ మెన్స్ టీ20 వరల్డ్ కప్ 2026లో సూపర్-8 దశ ఫిబ్రవరి 21 నుంచి మార్చి 1 వరకు జరుగుతుంది. భారత్, శ్రీలంకలోని పలు వేదికల్లో మ్యాచ్‌లు నిర్వహించనున్నారు. ఈ దశలో నాలుగు సెమీఫైనల్ స్థానాల కోసం ఎనిమిది జట్లు తలపడనున్నాయి.

డిఫెండింగ్ చాంపియన్స్ అయిన భారత్ సూపర్-8లో బలమైన జట్టుగా బరిలోకి దిగుతోంది. వెస్టిండీస్, ఇంగ్లాండ్, పాకిస్తాన్, శ్రీలంక వంటి జట్లకు కూడా టైటిల్ గెలిచిన అనుభవం ఉంది. దక్షిణాఫ్రికా, న్యూజిలాండ్ స్థిరమైన కంటెండర్లుగా కొనసాగుతుండగా, జింబాబ్వే ఈ టోర్నీలో సర్ప్రైజ్ ప్యాకేజీగా అవతరించింది.