IPL 2026: ఐపీఎల్ హిస్టరీలో తొలిసారి ఇలా.. ఇంతకుముందెన్నడు చూడని వింత భయ్యా..

Orange Cap Holder List in IPL 2026: ఐపీఎల్ 2026 సీజన్ ముగింపు దశకు చేరిన వేళ ఆరెంజ్ క్యాప్ రేస్ ఊహించని మలుపులు తిరుగుతోంది. లీగ్ చరిత్రలోనే తొలిసారిగా ముగ్గురు బ్యాటర్లు 700 పరుగుల మైలురాయిని దాటి సరికొత్త రికార్డు సృష్టించారు. ప్రస్తుతం రాజస్థాన్ యువ సంచలనం వైభవ్ సూర్యవంశీ అగ్రస్థానంలో ఉండగా, ఫైనల్ మ్యాచ్‌లో అతని కిరీటాన్ని లాగేసుకోవడానికి గుజరాత్ టైటాన్స్ ఓపెనర్లు శుభ్‌మన్ గిల్, సాయి సుదర్శన్ సిద్ధమయ్యారు.

చరిత్రలో ఎన్నడూ లేని విధంగా.. ఒకే సీజన్‌లో ముగ్గురు ‘700’ ప్లస్!

ఇండియన్ ప్రీమియర్ లీగ్ 19 ఏళ్ల సుదీర్ఘ చరిత్రలో ఇప్పటివరకు ఇలాంటి అద్భుతం ఎప్పుడూ జరగలేదు. ఒకే సీజన్‌లో ముగ్గురు వేర్వేరు బ్యాటర్లు 700 పరుగుల మార్కును దాటడం ఇదే మొదటిసారి. రాజస్థాన్ రాయల్స్ వండర్ కిడ్ వైభవ్ సూర్యవంశీ, గుజరాత్ టైటాన్స్ కెప్టెన్ శుభ్‌మన్ గిల్, లీగ్‌లో నిలకడకు మారుపేరుగా మారిన సాయి సుదర్శన్ ఈ అరుదైన ఘనతను తమ ఖాతాలో వేసుకున్నారు. గుజరాత్ జట్టు ఫైనల్‌కు దూసుకురావడంతో ఈ ముగ్గురి మధ్య ఆరెంజ్ క్యాప్ పోరు ఇప్పుడు క్లైమాక్స్ రసవత్తరంగా మారింది.

రాజస్థాన్ అవుట్ అయినా.. నంబర్ వన్ స్థానంలోనే వైభవ్..

క్వాలిఫయర్-2 పోరులో రాజస్థాన్ రాయల్స్ జట్టు ఓటమిపాలై టోర్నీ నుంచి నిష్క్రమించినప్పటికీ, ఆ జట్టు ఓపెనర్ వైభవ్ సూర్యవంశీ మాత్రం పరుగుల వేటలో ఇంకా అగ్రస్థానంలోనే కొనసాగుతున్నాడు. కేవలం 15 ఏళ్ల వయసున్న ఈ యువ సంచలనం ఈ సీజన్‌లో ఆడిన 16 మ్యాచ్‌ల్లో ఏకంగా 237.30 అనే నమ్మశక్యం కాని స్ట్రైక్ రేట్‌తో 776 పరుగులు సాధించాడు. ప్రత్యర్థి బౌలర్లకు చుక్కలు చూపిస్తూ ఈ సీజన్‌లో వైభవ్ ఏకంగా 72 సిక్సర్లు, 63 ఫోర్లు బాదడం విశేషం.

మే 31 ఫైనల్ పోరు.. వైభవ్ రికార్డును గిల్, సుదర్శన్ బద్దలు కొడతారా?

రాజస్థాన్ రాయల్స్ ప్రస్థానం ముగియడంతో వైభవ్ తన పరుగుల సంఖ్యను పెంచుకునే అవకాశం లేదు. దీన్ని గుజరాత్ టైటాన్స్ ఓపెనర్లు పూర్తిగా సద్వినియోగం చేసుకోవాలని చూస్తున్నారు. మే 31న రాయల్ ఛాలెంజర్స్ బెంగళూరుతో జరిగే ఫైనల్ మహాసంగ్రామంలో శుభ్‌మన్ గిల్, సాయి సుదర్శన్‌లకు ఆరెంజ్ క్యాప్ సాధించే సువర్ణావకాశం ఉంది.

ప్రస్తుతం గిల్ 15 మ్యాచ్‌ల్లో 722 పరుగులతో రెండో స్థానంలో ఉన్నాడు. అతను వైభవ్‌ను వెనక్కి నెట్టి టాప్‌లోకి వెళ్లాలంటే ఫైనల్‌లో మరో 55 పరుగులు చేయాలి. అలాగే 16 మ్యాచ్‌ల్లో 710 పరుగులతో మూడో స్థానంలో ఉన్న సాయి సుదర్శన్ ఆరెంజ్ క్యాప్ కింగ్ కావాలంటే ఫైనల్ మ్యాచ్‌లో 67 పరుగుల ఇన్నింగ్స్ ఆడాల్సి ఉంటుంది. గుజరాత్ ఓపెనర్లు ఇద్దరూ సూపర్‌ ఫామ్‌లో ఉండటంతో వైభవ్ రికార్డు ప్రమాదంలో పడినట్లే కనిపిస్తోంది.

ఐపీఎల్ 2026 సీజన్ కేవలం ట్రోఫీ విజేతను మాత్రమే కాదు, సరికొత్త పరుగుల రారాజును కూడా డిసైడ్ చేయబోతోంది. ఒకవైపు అనుభవం లేకపోయినా అద్భుతమైన ఇన్నింగ్స్‌లతో ఆకట్టుకున్న 15 ఏళ్ల కుర్రాడు వైభవ్ సూర్యవంశీ ఆరెంజ్ క్యాప్ రేసులో చరిత్ర సృష్టించేందుకు అడుగు దూరంలో ఉన్నాడు. మరోవైపు అంతర్జాతీయ స్థాయి అనుభవం ఉన్న శుభ్‌మన్ గిల్, సాయి సుదర్శన్ ఆ కిరీటాన్ని అందుకోవడానికి సర్వశక్తులూ ఒడ్డనున్నారు. మే 31న జరిగే ఫైనల్ పోరులో ఏం జరగబోతుందో చూడాలి!

మరిన్ని ఐపీఎల్ వార్తల కోసం ఇక్కడ క్లిక్ చేయండి..