టీమిండియాలోకి వైభవ్ సూర్యవంశీ ఎంట్రీ.. సూర్య, గిల్‌కు హ్యాండిచ్చిన బీసీసీఐ.. జాబితా చూశారా?

BCCI 30 Probables List For Asian Games Cricket: ఈ ఏడాది జరగబోయే ప్రతిష్ఠాత్మక ఆసియా క్రీడల కోసం భారత క్రికెట్ నియంత్రణ మండలి (బీసీసీఐ) భారీ వ్యూహాన్నే సిద్ధం చేసింది. ఐపీఎల్‌లో తన మెరుపు బ్యాటింగ్‌తో యావత్ క్రికెట్ ప్రపంచాన్ని ఆకర్షించిన యువ సంచలనం వైభవ్‌ సూర్యవంశీకి ఈ టోర్నీలో చోటు దక్కింది. అయితే, అందరినీ ఆశ్చర్యపరుస్తూ సీనియర్ ఆటగాళ్లు సూర్యకుమార్ యాదవ్, శుభ్‌మన్ గిల్ పేర్లు ఈ జాబితాలో కనిపించకపోవడం ఇప్పుడు హాట్ టాపిక్‌గా మారింది.

యువ సంచలనానికి బంపర్ ఆఫర్.. ఐపీఎల్ జోరుతో జాతీయ జట్టులోకి..!

ఇటీవల ముగిసిన ఐపీఎల్ సీజన్లలో తన అసాధారణమైన బ్యాటింగ్ శైలితో అభిమానులను అలరించిన వైభవ్‌ సూర్యవంశీకి బీసీసీఐ పెద్ద పీట వేసింది. మైదానంలో దిగితే చాలు బౌండరీల వర్షం కురిపించే ఈ యువ లెఫ్ట్ హ్యాండ్ బ్యాటర్, సెలక్టర్ల దృష్టిని బలంగా ఆకర్షించాడు. జపాన్ వేదికగా సెప్టెంబరు 19 నుంచి అక్టోబరు 4 వరకు జరగనున్న ఆసియా గేమ్స్ కోసం ఇండియన్ ఒలింపిక్ అసోసియేషన్‌కు బీసీసీఐ పంపిన 30 మంది ప్రాబబుల్స్ జాబితాలో వైభవ్‌ చోటు దక్కించుకున్నాడు. ఈ మెగా టోర్నీ ద్వారా అంతర్జాతీయ వేదికపై తన ముద్ర వేసేందుకు ఈ యువ ఆటగాడికి సువర్ణావకాశం లభించింది.

సూర్య, గిల్ ఎందుకు దూరం? అసలు కారణం ఇదే..!

భారత టీ20 కెప్టెన్ సూర్యకుమార్ యాదవ్, వన్డే సారథి శుభ్‌మన్ గిల్ ఈ టోర్నీకి దూరం కావడం వెనుక బీసీసీఐ పక్కా ప్రణాళిక ఉంది. సరిగ్గా ఆసియా క్రీడలు జరిగే సమయంలోనే భారత్ స్వదేశంలో వెస్టిండీస్‌తో మూడు వన్డేలు, ఐదు టీ20ల సిరీస్ ఆడనుంది. సెప్టెంబర్ 27 నుంచి అక్టోబర్ 19 వరకు ఈ సిరీస్ జరగనుంది.

ఇది కూడా చదవండి: టీమిండియాలోకి వైభవ్ ఎంట్రీకి మూహుర్తం ఫిక్స్.. ఫస్ట్ బలయ్యే టీం ఏదంటే?

ఒకే సమయంలో రెండు కీలక టోర్నీలు ఉండటంతో బీసీసీఐ రెండు వేర్వేరు జట్లను బరిలోకి దించాలని నిర్ణయించింది. 2028 ఒలింపిక్స్, రాబోయే టీ20 ప్రపంచకప్‌ను దృష్టిలో ఉంచుకుని, వర్క్‌లోడ్ మేనేజ్‌మెంట్‌లో భాగంగానే సూర్యకుమార్‌కు విశ్రాంతిని ఇచ్చారు. మరోవైపు, వెస్టిండీస్‌తో జరిగే వన్డే సిరీస్‌కు శుభ్‌మన్ గిల్ సారథ్యం వహించాల్సి ఉండటంతో అతడిని ఆసియా గేమ్స్‌కు ఎంపిక చేయలేదు.

సారథ్య రేసులో ముగ్గురు.. బూమ్రాపై వీడని ఉత్కంఠ..!

ఆసియా గేమ్స్‌లో బరిలోకి దిగే భారత జట్టుకు కెప్టెన్ ఎవరనే దానిపై ఉత్కంఠ నెలకొంది. ప్రస్తుతం శ్రేయస్ అయ్యర్, సంజు శాంసన్, తిలక్ వర్మ పేర్లు కెప్టెన్సీ రేసులో ప్రముఖంగా వినిపిస్తున్నాయి. ఈ ముగ్గురిలో ఒకరికి జట్టు బాధ్యతలు అప్పగించే అవకాశం ఉంది. కాగా, బీసీసీఐ పంపిన 30 మంది ప్రాబబుల్స్ జాబితాలో స్టార్ పేసర్ జస్‌ప్రీత్ బుమ్రా పేరు ఉన్నప్పటికీ, అతను తుది జట్టులో ఉంటాడా లేదా అనేది ఇంకా ఖరారు కాలేదు. వెస్టిండీస్ సిరీస్ కూడా ముఖ్యం కావడంతో బుమ్రాను ఎక్కడ ఉపయోగిస్తారనేది ఆసక్తికరంగా మారింది.

టాప్ స్పిన్నర్ల పోటీ.. తుది జట్టులో ఇద్దరికే చాన్స్..!

ఈ జాబితాలో కుల్‌దీప్ యాదవ్, అక్షర్ పటేల్, వాషింగ్టన్ సుందర్, హర్ష్ దూబే వంటి అనుభవజ్ఞులైన స్పిన్నర్లకు చోటు లభించింది. అయితే, ఆసియా గేమ్స్ పిచ్‌ల పరిస్థితులను బట్టి తుది జట్టులో ఇద్దరు స్పిన్నర్లకు మాత్రమే అవకాశం దక్కేలా కనిపిస్తోంది. దీనితో స్పిన్ విభాగంలో తీవ్ర పోటీ నెలకొననుంది. హార్దిక్ పాండ్య, రిషభ్ పంత్, ఇషాన్ కిషన్, యశస్వి జైస్వాల్ వంటి స్టార్ ఆటగాళ్లు కూడా ఈ 30 మంది జాబితాలో ఉన్నారు.

భారత క్రికెట్‌లో యువ రక్తాన్ని ప్రోత్సహిస్తూనే, సీనియర్ల వర్క్‌లోడ్‌ను సమతుల్యం చేయడంలో బీసీసీఐ తీసుకున్న ఈ నిర్ణయం నిజంగా అభినందనీయం. ఆసియా గేమ్స్ వంటి ప్రతిష్ఠాత్మక వేదికపై వైభవ్‌ సూర్యవంశీ లాంటి యువ ఆటగాళ్లు ఏ మేరకు రాణిస్తారో, భారత్‌కు మరోసారి బంగారు పతకాన్ని అందిస్తారో చూడాలి.

30మంది ఆటగాళ్ల జాబితాలో ఎవరున్నారంటే?

వైభవ్‌ సూర్యవంశీ, యశస్వి జైస్వాల్‌, అభిషేక్‌ శర్మ, ఇషాన్‌ కిషన్‌, సంజు శాంసన్‌, శ్రేయస్‌ అయ్యర్‌, రిషభ్‌ పంత్‌, అర్ష్‌దీప్‌ సింగ్‌, ప్రసిద్ధ్‌ కృష్ణ, హార్దిక్‌ పాండ్య, నితీశ్‌ కుమార్‌ రెడ్డి, శివమ్‌ దుబె, రింకు సింగ్‌, ధ్రువ్‌ జురెల్‌, ఖలీల్‌ అహ్మద్‌, విప్రాజ్‌ నిగమ్‌, తిలక్‌ వర్మ, జస్‌ప్రీత్‌ బుమ్రా, అక్షర్‌ పటేల్‌, కుల్‌దీప్‌ యాదవ్‌, వరుణ్‌ చక్రవర్తి, అనుకుల్‌ రాయ్‌, ఆయుష్‌ బదోనీ, హర్ష్‌ దుబె, రుతురాజ్‌ గైక్వాడ్‌, హర్షిత్‌ రాణా, యశ్‌ ఠాకూర్‌, వాషింగ్టన్‌ సుందర్‌, రవి బిష్ణోయ్‌, షాబాజ్‌ అహ్మద్‌.