PAK vs SL: 24 ఏళ్లుగా కాపాడుకున్న భారత్ రికార్డు.. ఒక్క మ్యాచ్‌లోనే బద్దలు కొట్టిన పాకిస్తాన్

PAK vs SL: పాకిస్థాన్, శ్రీలంక మధ్య జరిగిన ట్రై సిరీస్ ఫైనల్ వన్డే క్రికెట్ చరిత్రలో ప్రత్యేకంగా నిలిచిపోయింది. ఈ ఒక్క మ్యాచ్‌లోనే రెండు జట్లు కలిపి 656 పరుగులు చేశాయి. తొలుత బ్యాటింగ్ చేసిన శ్రీలంక 50 ఓవర్లలో 325 పరుగులు సాధించింది. కమిందు మెండిస్ 131 పరుగులతో అద్భుత సెంచరీ చేశాడు. భారీ లక్ష్యంతో బరిలోకి దిగిన పాకిస్థాన్ 49వ ఓవర్లోనే ఏడు వికెట్లు కోల్పోయి లక్ష్యాన్ని అందుకుంది. ఫఖర్ జమాన్ 99 బంతుల్లో 11 ఫోర్లు, 6 సిక్సర్లతో 127 పరుగులు చేసి జట్టును గెలిపించాడు. ఈ మ్యాచ్‌లో మొత్తం 10 కీలక రికార్డులు బద్దలయ్యాయి.

భారత్ 24 ఏళ్ల రికార్డు బద్దలు

1. వన్డే ఫైనల్లో అత్యధిక లక్ష్య ఛేదన: 326 పరుగుల లక్ష్యాన్ని ఛేదించిన పాకిస్థాన్ వన్డే ఫైనల్లో సంయుక్తంగా అత్యధిక లక్ష్యాన్ని అందుకున్న జట్టుగా నిలిచింది. 2002లో ఇంగ్లండ్‌పై భారత్ కూడా 326 పరుగుల లక్ష్యాన్ని ఛేదించింది.

2. నాకౌట్ మ్యాచ్‌లోనూ అదే రికార్డు: పురుషుల వన్డే నాకౌట్ మ్యాచ్‌ల్లోనూ 326 పరుగుల లక్ష్య ఛేదన అత్యధికంగా నమోదైన స్కోరుగా నిలిచింది. ఈ ఘనతను భారత్‌తో కలిసి పాకిస్థాన్ పంచుకుంది.

3. శ్రీలంకపై రెండో భారీ ఛేదన: శ్రీలంకపై పాకిస్థాన్ చేసిన రెండో అత్యధిక పరుగుల ఛేదన ఇది. 2023 ప్రపంచకప్‌లో 345 పరుగుల లక్ష్యాన్ని ఛేదించడం పాక్‌కు ఈ జాబితాలో మొదటి స్థానాన్ని తెచ్చింది.

4. వన్డే ఫైనల్లో అత్యధిక పరుగులు: రెండు జట్లు కలిపి 656 పరుగులు చేయడంతో వన్డే ఫైనల్లో అత్యధిక పరుగుల రికార్డు నమోదైంది. 2002లో భారత్, ఇంగ్లండ్ మధ్య ఫైనల్లో నమోదైన 651 పరుగుల రికార్డు చెరిగిపోయింది.

5. నాకౌట్ మ్యాచ్‌ల్లో మూడో అత్యధిక స్కోరు: ఈ ఫైనల్లో నమోదైన 656 పరుగులు పురుషుల వన్డే నాకౌట్ మ్యాచ్‌ల చరిత్రలో మూడో అత్యధిక మొత్తం స్కోరుగా నిలిచాయి.

6. 2017 తర్వాత తొలి ఫైనల్ విజయం: 2017 తర్వాత పాకిస్థాన్ వన్డేల్లో బహుళ దేశాల టోర్నీ ఫైనల్ గెలవడం ఇదే తొలిసారి.

7. ఫైనల్లో రెండో సెంచరీ: ఫఖర్ జమాన్ తాను ఆడిన మూడు వన్డే ఫైనళ్లలో రెండు సెంచరీలు సాధించాడు. 2017 ఛాంపియన్స్ ట్రోఫీ ఫైనల్లో భారత్‌పై కూడా శతకం చేశాడు. వన్డే ఫైనళ్లలో రెండు సెంచరీలు చేసిన రెండో పాకిస్థాన్ బ్యాటర్‌గా నిలిచాడు. అంతకుముందు సయీద్ అన్వర్ ఈ ఘనత సాధించాడు.

8. 300కు పైగా లక్ష్య ఛేదనల్లో నాలుగు సెంచరీలు: 300కు పైగా లక్ష్యాన్ని ఛేదించే క్రమంలో ఫఖర్ ఇప్పటివరకు నాలుగు సెంచరీలు చేశాడు. పాకిస్థాన్ తరఫున ఈ జాబితాలో అతడే ముందున్నాడు. బాబర్ ఆజమ్, యూనిస్ ఖాన్ చెరో మూడు సెంచరీలతో తర్వాతి స్థానాల్లో ఉన్నారు.

9. అరాఫత్ మిన్హాస్ అరుదైన ఘనత: తన తొలి 8 వన్డేల్లో అరాఫత్ మిన్హాస్ రెండు హాఫ్ సెంచరీలకు పైగా స్కోర్లు, రెండుసార్లు ఐదు వికెట్ల ఘనత సాధించాడు. తొలి పది వన్డేల్లో ఇలాంటి ఘనత సాధించిన మరో ఆటగాడిగా నమీబియాకు చెందిన జేజే స్మిట్ ఉన్నాడు.

10. కమిందు మెండిస్‌కు మూడో స్థానం: ఫైనల్లో కమిందు మెండిస్ చేసిన 131 పరుగులు వన్డే ఫైనళ్లలో శ్రీలంక బ్యాటర్ చేసిన మూడో అత్యధిక స్కోరుగా నిలిచాయి. 2000లో సనత్ జయసూర్య చేసిన 189 పరుగులు మొదటి స్థానంలో ఉన్నాయి. 1998లో మార్వన్ అటపట్టు చేసిన 132 నాటౌట్ రెండో స్థానంలో కొనసాగుతోంది.

మరిన్ని క్రీడా వార్తల కోసం ఇక్కడ క్లిక్ చేయండి..