Video: వామ్మో.. ఐపీఎల్ 2025లో డేంజరస్ యార్కర్.. మ్యాచ్ ఫలితాన్నే మర్చేసిన బుమ్రా డెడ్లీ బాల్..

Jasprit Bumrah Dangerous Yo

Jasprit Bumrah Most Dangerous Yorker: ఐపీఎల్ 2025 సీజన్‌లో భాగంగా మే 30, 2025న ముల్లాన్‌పూర్‌లో ముంబై ఇండియన్స్ (MI) వర్సెస్ గుజరాత్ టైటాన్స్ (GT) జట్ల మధ్య జరిగిన హోరాహోరీ ఎలిమినేటర్ మ్యాచ్‌లో, భారత క్రికెట్ యార్కర్ల రారాజు జస్ప్రీత్ బుమ్రా మరోసారి తన విశ్వరూపాన్ని ప్రదర్శించాడు. ఈ సీజన్‌లోనే అత్యంత ప్రమాదకరమైన యార్కర్‌తో గుజరాత్ టైటాన్స్ ఆల్‌రౌండర్ వాషింగ్టన్ సుందర్‌ను క్లీన్ బౌల్డ్ చేసి, మ్యాచ్‌ను ముంబై వైపు తిప్పడంలో కీలక పాత్ర పోషించాడు. ఈ అద్భుతమైన డెలివరీతో క్రికెట్ మాజీలు, అభిమానుల నుంచి ప్రశంసల వర్షం కురిపించింది.

మ్యాచ్‌ను మలుపు తిప్పిన బుమ్రా అస్త్రం..

గుజరాత్ టైటాన్స్ 229 పరుగుల భారీ లక్ష్యాన్ని ఛేదిస్తున్న తరుణంలో, వాషింగ్టన్ సుందర్ (24 బంతుల్లో 48 పరుగులు, 5 ఫోర్లు, 3 సిక్సర్లు) సాయి సుదర్శన్‌తో కలిసి అద్భుతమైన భాగస్వామ్యాన్ని నెలకొల్పుతూ ముంబై బౌలర్లపై విరుచుకుపడుతున్నాడు. ఈ దశలో గుజరాత్ విజయానికి చేరువవుతున్నట్లు కనిపించింది. అయితే, 14వ ఓవర్‌లో బౌలింగ్‌కు వచ్చిన జస్ప్రీత్ బుమ్రా, తన అమ్ములపొదిలోని పదునైన యార్కర్‌ను సంధించాడు. ఆ బంతిని అంచనా వేయడంలో పూర్తిగా విఫలమైన సుందర్, దానిని ఆడే ప్రయత్నంలో తన వికెట్లను సమర్పించుకున్నాడు. బంతి నేరుగా లెగ్ స్టంప్‌ను తాకడంతో సుందర్ నిరాశగా పెవిలియన్ చేరాడు. ఈ వికెట్ మ్యాచ్ గతిని పూర్తిగా మార్చేసింది.

సుందర్ నుంచి సమాధానం లేని డేంజరస్ యార్కర్..

బుమ్రా వేసిన ఈ యార్కర్ ఎంతటి ప్రమాదకరమైనదో సుందర్ పడిపోయిన తీరులోనే అర్థమవుతుంది. క్రికెట్ విశ్లేషకులు ఈ డెలివరీని “టో-క్రషింగ్ యార్కర్” (కాలి వేళ్లను చితక్కొట్టే యార్కర్) గా అభివర్ణించారు. టోర్నమెంట్‌లోని అత్యుత్తమ బంతుల్లో ఒకటిగా పేర్కొన్నారు. ఈ మ్యాచ్‌లో బుమ్రా తన నాలుగు ఓవర్లలో కేవలం 27 పరుగులు మాత్రమే ఇచ్చి ఒక కీలక వికెట్ పడగొట్టాడు. అతని అద్భుతమైన బౌలింగ్ ప్రదర్శన ముంబై ఇండియన్స్‌ను 20 పరుగుల తేడాతో విజయం సాధించి, క్వాలిఫైయర్ 2కు చేర్చడంలో దోహదపడింది.

ముంబై ఇండియన్స్ కెప్టెన్ హార్దిక్ పాండ్యా మాట్లాడుతూ, “బుమ్రా వంటి బౌలర్ జట్టులో ఉండటం ఒక లగ్జరీ. ఆట చేజారిపోతోందని భావించినప్పుడల్లా, బుమ్రాను బౌలింగ్‌కు దించడమే నా పని” అని ప్రశంసించాడు.

ఈ అద్భుతమైన యార్కర్‌తో జస్ప్రీత్ బుమ్రా మరోసారి తనను తాను ప్రపంచంలోని అత్యుత్తమ బౌలర్లలో ఒకడిగా నిరూపించుకున్నాడు. రాబోయే మ్యాచ్‌లలో కూడా అతని ప్రదర్శన ముంబై ఇండియన్స్ విజయాలకు కీలకం కానుంది.