Delhi Capitals: మైదానంలోనే అపస్మారక స్థితి.. కట్‌చేస్తే.. ఢిల్లీకి దూరమైన స్టార్ ప్లేయర్..!

Lungi Ngidi Injury: అరుణ్ జైట్లీ స్టేడియంలో పంజాబ్ కింగ్స్‌తో జరిగిన పోరులో ఓ విషాద ఘటన చోటుచేసుకుంది. పంజాబ్ బ్యాటింగ్ చేస్తున్న సమయంలో ప్రియాన్ష్ ఆర్య కొట్టిన బంతిని క్యాచ్ పట్టేందుకు ఎన్గిడి ప్రయత్నించాడు. అయితే బంతి వేగాన్ని, దిశను అంచనా వేయడంలో తడబడిన ఎన్గిడి, అదుపు తప్పి బోర్లా పడ్డాడు. ఈ క్రమంలో అతని తల నేలకు బలంగా తగిలింది. దెబ్బ తీవ్రతకు అతను కొద్దిసేపు మైదానంలోనే స్పృహ కోల్పోయాడు. వెంటనే వైద్య బృందం మైదానంలోకి చేరుకుని ప్రాథమిక చికిత్స అందించిన అనంతరం, మెరుగైన వైద్యం కోసం అతడిని ఆసుపత్రికి తరలించారు.

వైద్య నివేదికలు ఏం చెబుతున్నాయి?

ఆసుపత్రిలో చేరిన తర్వాత ఎన్గిడికి వివిధ రకాల పరీక్షలు నిర్వహించారు. స్కానింగ్ నివేదికల ప్రకారం, అతని తలకు ఎటువంటి తీవ్రమైన అంతర్గత గాయాలు కాలేదని తేలింది. ఇది ఢిల్లీ జట్టు యాజమాన్యానికి పెద్ద ఊరటనిచ్చే అంశం. అయితే, తలకు దెబ్బ తగిలినందున వైద్యులు అతడికి విశ్రాంతి అవసరమని సూచించారు. దీంతో అదే రోజు సాయంత్రం అతడిని ఆసుపత్రి నుంచి విడుదల చేశారు.

తిరిగి ఎప్పుడు బరిలోకి దిగుతాడు?

అంతర్జాతీయ క్రికెట్ మండలి నిబంధనల ప్రకారం, తలకు గాయమై స్పృహ కోల్పోయిన (కన్కషన్) ఆటగాడు కనీసం ఏడు రోజుల పాటు విశ్రాంతి తీసుకోవాలి. ఈ నిబంధన కారణంగా ఎన్గిడి రాబోయే రెండు కీలక మ్యాచ్‌లకు దూరం కానున్నాడు. సోమవారం రాయల్ ఛాలెంజర్స్ బెంగళూరుతో జరిగే మ్యాచ్‌తో పాటు, మే 1న రాజస్థాన్ రాయల్స్‌తో జరిగే పోరుకు కూడా అతను అందుబాటులో ఉండడు. మే 5న చెన్నై సూపర్ కింగ్స్‌తో జరగనున్న హోమ్ మ్యాచ్ ద్వారా అతను మళ్ళీ మైదానంలోకి అడుగుపెట్టే అవకాశం ఉందని సమాచారం.

ఢిల్లీ క్యాపిటల్స్‌పై ప్రభావం..

ఈ సీజన్‌లో ఢిల్లీ బౌలింగ్ విభాగంలో ఎన్గిడి కీలక పాత్ర పోషిస్తున్నాడు. పంజాబ్ చేతిలో ఎదురైన ఓటమిలో అతని గైర్హాజరీ స్పష్టంగా కనిపించింది. కీలక సమయాల్లో వికెట్లు తీయగల సామర్థ్యం ఉన్న ఎన్గిడి లేకపోవడం జట్టు సమతుల్యతను దెబ్బతీసింది. రాబోయే మ్యాచ్‌ల్లో అతని స్థానాన్ని ఎవరు భర్తీ చేస్తారనేది ఇప్పుడు ఆసక్తికరంగా మారింది.