UAE Vs AFG: 4 ఫోర్లు, 5 సిక్సర్లతో శివాలెత్తిన ఆల్‌రౌండర్.. 22 బంతుల్లో మ్యాచ్ బిగ్ ‘టర్న్’.. ఎవరంటే!
అసలే డిసైడర్ మ్యాచ్.. పైగా సిరీస్ చేజిక్కించుకోవాలంటే తప్పక గెలవాల్సిందే. ఈ తరుణంలో ఓ ప్లేయర్ ప్రత్యర్ధి బౌలర్లపై శివాలెత్తాడు..
Updated on: Feb 20, 2023 | 8:25 PM
అసలే డిసైడర్ మ్యాచ్.. పైగా సిరీస్ చేజిక్కించుకోవాలంటే తప్పక గెలవాల్సిందే. ఈ తరుణంలో ఓ ప్లేయర్ ప్రత్యర్ధి బౌలర్లపై శివాలెత్తాడు. 4 ఫోర్లు, 5 సిక్సర్లతో 22 బంతుల్లో మ్యాచ్ మలుపు తిప్పాడు.. సీన్ కట్ చేస్తే.. ఆ ప్లేయర్ ఆడుతోన్న జట్టు సిరీస్ కైవసం చేసుకుంది. ఇంతకీ ఆ మ్యాచ్ ఏంటి.? ఆ బౌలర్ ఎవరంటే.?
3 మ్యాచ్‌ల టీ20 సిరీస్ కోసం ఆఫ్గనిస్తాన్.. యూఏఈలో పర్యటించిన సంగతి తెలిసిందే. ఫిబ్రవరి 19న ఆదివారం జరిగిన నిర్ణయాత్మక మూడో టీ20లో ఆఫ్ఘన్ 6 వికెట్ల తేడాతో యూఏఈపై అద్భుత విజయాన్ని అందుకుని.. సిరీస్‌ను 2-1తో కైవసం చేసుకుంది. ఈ మ్యాచ్‌లో తొలుత టాస్ ఓడి బ్యాటింగ్‌కు దిగిన యూఏఈ.. నిర్ణీత 20 ఓవర్లలో 6 వికెట్ల నష్టానికి 163 పరుగులు చేసింది. ఆ జట్టు ఓపెనర్లు ముహమ్మద్‌ వసీం(75), అరవింద్‌ (59) అర్ధశతకాలతో టాప్ స్కోరర్లుగా నిలిచారు. అఫ్గన్ బౌలర్లలో కెప్టెన్‌ రషీద్‌ ఖాన్‌, గుల్బదిన్‌ చెరో 2 వికెట్లు పడగొట్టారు.
అనంతరం 164 పరుగుల లక్ష్యాన్ని చేధించేందుకు బరిలోకి దిగిన ఆఫ్ఘనిస్తాన్‌ జట్టును.. ఇబ్రహీం జద్రాన్‌ (60 నాటౌట్), కరీమ్‌ జనత్(56 నాటౌట్) ఆదుకున్నారు. ఈ ఇద్దరూ తుఫాన్ ఇన్నింగ్స్‌తో మరో 5 బంతులు మిగిలి ఉండగా లక్ష్యాన్ని చేదించింది ఆఫ్గనిస్తాన్ జట్టు. ముఖ్యంగా కరీం జనత్ ఆకాశమే హద్దుగా చెలరేగిపోయాడు. కేవలం 21 బంతుల్లోనే హాఫ్‌ సెంచరీ చేయడమే కాకుండా, సిక్సర్ కొట్టి తన జట్టును గెలిపించాడు. మొత్తంగా జనత్ 22 బంతుల్లో 4 ఫోర్లు, 5 సిక్సర్లతో 56 పరుగులు బాదేశాడు. ఇక యూఏఈ బౌలర్లలో జహుర్‌ ఖాన్‌ 2 వికెట్లు, అకీఫ్‌ రాజా, జవార్‌ ఫరీద్‌ తలో వికెట్‌ పడగొట్టారు.
