IPL 2026 : అన్ని మ్యాచ్‌లు ఓడిపోయినా ధైర్యం మాత్రం తగ్గలేదు.. జట్టుపై గర్వంగా ఉంది అన్న కోల్‎కతా కెప్టెన్

IPL 2026 : ఐపీఎల్ 2026 సీజన్‌లో కోల్‌కతా నైట్ రైడర్స్ (KKR) పరిస్థితి ఏమీ బాగోలేదు. ఆడిన నాలుగు మ్యాచ్‌ల్లోనూ ఓటమి పాలై పాయింట్ల పట్టికలో అట్టడుగున నిలిచింది. గురువారం ఈడెన్ గార్డెన్స్‌లో లక్నో సూపర్ జెయింట్స్ (LSG)తో జరిగిన ఉత్కంఠభరిత పోరులో కేకేఆర్ మరోసారి తడబడింది. అయితే వరుస ఓటములతో కుంగిపోతున్నా, తన జట్టు ప్రదర్శన పట్ల కెప్టెన్ అజింక్యా రహానే గర్వంగా ఉన్నానని చెప్పడం ఇప్పుడు చర్చనీయాంశమైంది. లక్నో సూపర్ జెయింట్స్‌తో జరిగిన మ్యాచ్‌లో కోల్‌కతా నైట్ రైడర్స్ గెలిచినంత పని చేసింది. మొదట బ్యాటింగ్ చేసిన కేకేఆర్ 181/4 పరుగుల గౌరవప్రదమైన స్కోరు సాధించింది. కెప్టెన్ రహానే (41), రఘువంశీ (45), రోవ్‌మన్ పావెల్ (39*) రాణించడంతో కోల్‌కతా విజయంపై నమ్మకంగా ఉంది. అయితే, లక్నో యువ బ్యాటర్ ముకుల్ చౌదరి కేవలం 27 బంతుల్లో 54 పరుగులు చేసి మ్యాచ్‌ను లాగేసుకున్నాడు. చివరి ఓవర్లో ఉత్కంఠ రేపిన ఈ మ్యాచ్‌లో లక్నో 3 వికెట్ల తేడాతో విజయం సాధించింది.

వరుసగా నాలుగో ఓటమి తర్వాత రహానే మాట్లాడుతూ.. “ఈ ఓటమిని జీర్ణించుకోవడం చాలా కష్టం. కానీ, మా అబ్బాయిలు ఆడిన విధానం చూస్తుంటే గర్వంగా ఉంది. మేము పోరాడాము, కానీ ముకుల్ చౌదరి ఇన్నింగ్స్ గేమ్ ఛేంజర్‌గా మారింది. చివరి రెండు ఓవర్లలో మా ప్లాన్స్ అమలు చేయడంలో చిన్న చిన్న తప్పులు జరిగాయి. అయితే ముకుల్ అద్భుతంగా బ్యాటింగ్ చేశాడు, ఆ క్రెడిట్ అతనికి ఇవ్వాల్సిందే” అని పేర్కొన్నాడు. పిచ్ స్లోగా ఉన్నప్పటికీ 180 స్కోరు సరిపోతుందని భావించామని, కానీ చిన్న మార్జిన్లతో మ్యాచ్ చేజారిందని రహానే విచారం వ్యక్తం చేశాడు.

చివరి ఓవర్లో ముకుల్ చౌదరిని కట్టడి చేసేందుకు ఆవేశ్ ఖాన్ ను స్ట్రైకింగ్‌లో ఉంచాలని కేకేఆర్ భావించింది. కానీ, ముకుల్ ఏ బంతినీ వదలకుండా సిక్సర్లతో విరుచుకుపడటంతో కేకేఆర్ బౌలర్లు ఒత్తిడికి గురయ్యారు. ఐదుగురు ఫీల్డర్లను లోపలే ఉంచినా, ముకుల్ హిట్టింగ్‌ను ఆపలేకపోయారు. ఈ సీజన్‌లో ఇప్పటివరకు ఒక్క గెలుపు కూడా లేని ఏకైక జట్టుగా కేకేఆర్ మిగిలిపోయింది.

ఈ ఓటములను పక్కనపెట్టి కేకేఆర్ ఇప్పుడు తన తదుపరి మ్యాచ్ కోసం సిద్ధం కావాల్సి ఉంది. ఏప్రిల్ 14న ఐదుసార్లు ఛాంపియన్ అయిన చెన్నై సూపర్ కింగ్స్ (CSK) తో కేకేఆర్ తలపడనుంది. కనీసం ఆ మ్యాచ్‌తోనైనా విజయాల ఖాతా తెరవాలని కోల్‌కతా అభిమానులు కోరుకుంటున్నారు.

మరిన్ని క్రీడా వార్తల కోసం ఇక్కడ క్లిక్ చేయండి..