IPL 2026 Prize Money: ఐపీఎల్ విజేతకే కాదు.. రన్నరప్‌తోపాటు ఆ జట్లపైనా కాసుల వర్షం.. !

IPL 2026 Prize Money: క్రికెట్ వర్గాల సమాచారం ప్రకారం.. ఈసారి ఐపీఎల్ ప్రైజ్ పూల్‌ను బీసీసీఐ మరింత భారీగా పెంచేందుకు ప్రణాళికలు సిద్ధం చేసింది. మునుపటి సీజన్ల ట్రెండ్‌ను పరిశీలిస్తే, ఈసారి ఐపీఎల్ 2026 ఛాంపియన్‌గా నిలిచే జట్టుకు కనీసం రూ. 20 కోట్ల భారీ బహుమతి లభించడం ఖాయంగా కనిపిస్తోంది. అలాగే ఫైనల్ చేరి తృటిలో టైటిల్ చేజార్చుకునే రన్నరప్ జట్టుకు దాదాపు రూ. 13 కోట్లు దక్కనున్నాయి.

టాప్-2 జట్లతో పాటు ప్లేఆఫ్స్ చేరిన మిగిలిన రెండు జట్లకు కూడా భారీగానే ముట్టనుంది. పాయింట్ల పట్టికలో మూడో స్థానంలో నిలిచే జట్టుకు రూ. 7 కోట్లు, నాలుగో స్థానంలో నిలిచే జట్టుకు రూ. 6.5 కోట్ల ప్రైజ్ మనీ లభిస్తుంది.

2008 నుంచి 2026 వరకు.. ఎంత మార్పు..!

2008లో ఐపీఎల్ ప్రారంభమైనప్పటి నుంచి ఇప్పటివరకు ఈ లీగ్ బ్రాండ్ వాల్యూ వేల రెట్లు పెరిగింది. తొలి సీజన్‌లో విజేతగా నిలిచిన రాజస్థాన్ రాయల్స్ జట్టుకు లభించిన ప్రైజ్ మనీ కేవలం రూ. 4.8 కోట్లు మాత్రమే. ఆ తర్వాత 2010లో దీనిని రూ. 10 కోట్లకు, 2014లో రూ. 15 కోట్లకు, 2018లో రూ. 20 కోట్లకు పెంచారు. గత కొన్ని సీజన్లుగా మొత్తం ప్రైజ్ పూల్ దాదాపు రూ. 45 కోట్లకు పైగా ఉంటోంది. ఈసారి ఫ్రాంచైజీల వాల్యూ ఆకాశాన్ని తాకడంతో బీసీసీఐ ఈ మొత్తాన్ని మరింత పెంచే అవకాశం ఉంది.

ఇది కూడా చదవండి: ఐపీఎల్‌లో మరో కొత్త ఫ్రాంచైజీ.. ఒకే టీంలోకి ఇషాన్ కిషన్, వైభవ్ సూర్యవంశీ? రంగంలోకి భారతీయ బిలియనీర్!

చివరి స్థానంలో నిలిచినా కోటీశ్వరులే..

ఈ లీగ్‌లో కేవలం టాప్-4 జట్లకు మాత్రమే కాకుండా, పాయింట్ల పట్టికలో చివరి స్థానంలో నిలిచే 10వ జట్టుకు కూడా కోట్ల రూపాయలు లభిస్తాయి. లీగ్ స్టేజ్ సమయంలో ప్రతి మ్యాచ్ గెలిచినందుకు జట్లకు నిర్దిష్ట మొత్తం అందుతుంది. దీనివల్ల ఏ జట్టు కూడా ఖాళీ చేతులతో ఇంటికి వెళ్లదు. వీటితో పాటు ఆరెంజ్ క్యాప్, పర్పుల్ క్యాప్, ఎమర్జింగ్ ప్లేయర్, మోస్ట్ వాల్యుబుల్ ప్లేయర్ (MVP) వంటి వ్యక్తిగత అవార్డులు గెలుచుకునే ఆటగాళ్లకు కూడా లక్షల రూపాయల నగదు బహుమతులు అందనున్నాయి.

ఈ ప్రైజ్ మనీ డబ్బులు ఆటగాళ్లకు ఎలా అందుతాయి?

చాలా మంది క్రికెట్ అభిమానులు ఈ ప్రైజ్ మనీ మొత్తం నేరుగా ఆటగాళ్ల బ్యాంక్ ఖాతాల్లోకి వెళ్తుందని అనుకుంటారు. కానీ నిబంధనల ప్రకారం.. బీసీసీఐ ఇచ్చే ఈ బహుమతి డబ్బు నేరుగా ఆయా ఫ్రాంచైజీల ఖాతాల్లోకి వెళ్తుంది. ఆ తర్వాత ఫ్రాంచైజీ యాజమాన్యం ఈ డబ్బును పంపిణీ చేస్తుంది. సాధారణంగా ఎక్కువ భాగాన్ని ఆటగాళ్లకు, సపోర్ట్ స్టాఫ్‌కు బోనస్ రూపంలో ఇస్తారు. అయితే ఏ ఆటగాడికి ఎంత డబ్బు ఇవ్వాలనే తుది నిర్ణయం పూర్తిగా ఫ్రాంచైజీ మేనేజ్‌మెంట్‌పైనే ఆధారపడి ఉంటుంది.

ఇది కూడా చదవండి: Video: తూచ్.. వాడిదసలు బౌలింగేనా.. స్టాండ్స్‌లో శివాలెత్తిన కావ్యపాప..

ఐపీఎల్ 2026 సీజన్ కేవలం క్రికెట్ పరంగానే కాకుండా, ఆర్థికంగా కూడా ఇప్పటివరకు జరిగిన అన్ని సీజన్ల కంటే అతిపెద్దదిగా నిలవబోతోంది. మైదానంలో ఆటగాళ్లు చూపే ప్రతిభకు తగినట్లుగానే వారిపై కాసుల వర్షం కురవడం ఖాయం.