IND vs SA : భారత్ గెలిస్తే రికార్డులే రికార్డులు.. సౌతాఫ్రికాకు చుక్కలు చూపించబోతున్న టీమిండియా లక్కీ జోడీ

IND vs SA : భారత్, సౌతాఫ్రికా మధ్య జరుగుతున్న 5 మ్యాచ్‌ల టీ20 సిరీస్‌లో నాల్గవ మ్యాచ్ లక్నోలో జరగనుంది. ప్రస్తుతం టీమిండియా 2-1 ఆధిక్యంలో ఉంది. ఈ మ్యాచ్ ఇరు జట్లకు చాలా కీలకం. లక్నోలో భారత్ గెలిస్తే టీ20 సిరీస్‌ను కైవసం చేసుకుంటుంది. ఒకవేళ సౌతాఫ్రికా గెలిస్తే, సిరీస్ సమం అయి, చివరి టీ20 మరింత ఆసక్తికరంగా మారుతుంది. ఈ కీలక పోరు కోసం ఇరు జట్లు పటిష్టమైన టీమ్ కాంబినేషన్‌తో బరిలోకి దిగాలని చూస్తున్నాయి. లక్నో పిచ్ పరిస్థితులను బట్టి టీమిండియా తన లక్కీ జోడీతో బరిలోకి దిగే అవకాశం ఉంది.

టీమిండియా విజయానికి ప్రధాన ఆయుధంగా మారిన స్పిన్ ద్వయం కుల్దీప్ యాదవ్, వరుణ్ చక్రవర్తిల కలయికే ఇక్కడ లక్కీ జోడీ. వీరిద్దరూ కలిసి ఆడినప్పుడు భారత జట్టు అద్భుతమైన రికార్డును నమోదు చేసింది. 2025 లో ఈ ఇద్దరు కలిసి ఆడిన 8 పూర్తి టీ20 మ్యాచ్‌లలో, భారత్ ఏకంగా 7 మ్యాచ్‌లను గెలుచుకుంది. సౌత్ ఆఫ్రికాతో జరిగిన ప్రస్తుత సిరీస్‌లోని మూడవ టీ20 మ్యాచ్‌లో కూడా వీరిద్దరూ కలిసి ఆడారు, ఆ మ్యాచ్‌ను భారత్ గెలిచి సిరీస్‌లో ఆధిక్యాన్ని సంపాదించింది. ఈ లక్కీ కాంబినేషన్ చూస్తుంటే సిరీస్‌ను ఇక్కడే ముగించడానికి భారత టీమ్ మేనేజ్‌మెంట్ వీరిని ప్లేయింగ్ ఎలెవన్‌లో ఉంచడం దాదాపు ఖాయంగా కనిపిస్తోంది.

లక్నో స్టేడియంలో టీమిండియా ఇప్పటివరకు మూడు టీ20 మ్యాచ్‌లను ఆడింది. ఆ మూడింటిలోనూ 100 శాతం విజయాన్ని నమోదు చేసింది. సౌతాఫ్రికాపై మాత్రం ఇదే మొదటి టీ20 మ్యాచ్. లక్నోలో భారత్ ఇంతకు ముందు ఆడిన రెండు టీ20 మ్యాచ్‌లలో కుల్దీప్ యాదవ్ కూడా భాగమయ్యాడు. రెండు వికెట్లు తీశాడు. వరుణ్ చక్రవర్తికి మాత్రం లక్నోలో టీ20 అంతర్జాతీయ మ్యాచ్ ఆడటం ఇదే మొదటిసారి కానుంది. లక్నోలో ఈ సెంటిమెంట్‌ను స్పిన్ జోడీ ప్రభావాన్ని దృష్టిలో ఉంచుకుని భారత్ బలమైన ఆటతీరును ప్రదర్శించాలని భావిస్తోంది.

నాల్గవ టీ20I కోసం ఇరు జట్ల అంచనా ప్లేయింగ్ ఎలెవన్ ఈ విధంగా ఉండవచ్చు

టీమిండియా: అభిషేక్ శర్మ, శుభ్‌మన్ గిల్, తిలక్ వర్మ, సూర్యకుమార్ యాదవ్ (కెప్టెన్), హార్దిక్ పాండ్యా, శివమ్ దూబే, జితేష్ శర్మ, కుల్దీప్ యాదవ్, అర్ష్‌దీప్ సింగ్, హర్షిత్ రాణా, వరుణ్ చక్రవర్తి.

సౌతాఫ్రికా: క్వింటన్ డికాక్, రీజా హెండ్రిక్స్, ఐడెన్ మార్కరమ్ (కెప్టెన్), డివాల్డ్ బ్రెవిస్, డేవిడ్ మిల్లర్, డొనోవన్ ఫెరీరా, మార్కో యాన్సెన్, కార్బిన్ బాస్, కేశవ్ మహారాజ్, ఎన్రిక్ నోర్ట్జే, లుంగీ ఎన్గిడి.

లక్నోలో తన 100 శాతం విజయ రికార్డును కాపాడుకుంటూ టీమిండియా గెలిస్తే, అది భారత్‌కు వరుసగా 14వ టీ20 సిరీస్ విజయం అవుతుంది. అదే జరిగితే, సౌతాఫ్రికాకు 29 టీ20 మ్యాచ్‌లలో ఇది 19వ ఓటమి అవుతుంది.