IND vs SL: ఎన్నేళ్ళో వేచిన ఉదయం.. 31 ఏళ్ల వయసులో డెబ్యూ! ఎవరీ సారాంశ్ జైన్..?
శ్రీలంకతో కొలంబోలో ప్రారంభమైన రెండో టెస్టులో భారత ఆఫ్ స్పిన్ ఆల్రౌండర్ సారాంశ్ జైన్ అరంగేట్రం చేశాడు. టాస్ గెలిచిన భారత్ తొలుత బ్యాటింగ్ ఎంచుకుంది. ఇన్ఫెక్షన్ కారణంగా కుల్దీప్ యాదవ్ దూరం కావడంతో సారాంశ్కు తుది జట్టులో చోటు దక్కింది.
Updated on: Aug 23, 2026 | 10:19 AM
శ్రీలంకతో జరుగుతున్న రెండో టెస్టులో భారత ఆఫ్ స్పిన్ బౌలింగ్ ఆల్రౌండర్ సారాంశ్ జైన్కు అంతర్జాతీయ టెస్టు అరంగేట్రం చేసే అవకాశం లభించింది. కొలంబోలోని సింహళీస్ స్పోర్ట్స్ క్లబ్ (SSC) మైదానంలో ఆదివారం ప్రారంభమైన మ్యాచ్లో టాస్ గెలిచిన భారత్ తొలుత బ్యాటింగ్ ఎంచుకుంది. దీంతో మధ్యప్రదేశ్కు చెందిన సారాంశ్ తొలిసారి భారత టెస్టు జెర్సీ ధరించాడు.
కుల్దీప్ స్థానంలో సారాంశ్కు ఛాన్స్
తొలి టెస్టులో గాలే వేదికగా శ్రీలంకపై భారత్ 165 పరుగుల తేడాతో ఘన విజయం సాధించింది. దీంతో రెండు టెస్టుల సిరీస్లో టీమిండియా 1-0 ఆధిక్యంలో ఉంది. రెండో టెస్టుకు కూడా టాస్ గెలిచిన కెప్టెన్ శుభ్మన్ గిల్.. ఇన్ఫెక్షన్ కారణంగా జట్టుకు దూరమైన ఎడమచేతి మణికట్టు స్పిన్నర్ కుల్దీప్ యాదవ్ స్థానంలో సారాంశ్ను తుది జట్టులోకి తీసుకున్నట్లు వెల్లడించాడు. జట్టు సమావేశంలో సీనియర్ ఆల్రౌండర్ రవీంద్ర జడేజా చేతుల మీదుగా సారాంశ్ తన అరంగేట్రపు టెస్టు క్యాప్ను అందుకున్నాడు. దీంతో భారత టెస్టు క్రికెట్లోకి అడుగుపెట్టాలన్న అతని సుదీర్ఘకాల కల సాకారమైంది.
శ్రీలంక తరఫున ఇద్దరు..
మరోవైపు శ్రీలంక తుది జట్టులోనూ ఇద్దరు ఆటగాళ్లు టెస్టు అరంగేట్రం చేశారు. కామిల్ మిశ్రా, పసిందు సూరియబండారకు తుది జట్టులో చోటు లభించినట్లు శ్రీలంక కెప్టెన్ ధనంజయ డి సిల్వా తెలిపాడు. తొలి టెస్టులో దినేశ్ చండిమాల్ ఫీల్డింగ్ సమయంలో మెడ, భుజానికి గాయపడటంతో పసిందు సూరియబండార కంకషన్ సబ్స్టిట్యూట్గా మైదానంలోకి వచ్చాడు. ఇప్పుడు రెండో టెస్టులో అతనికి పూర్తిస్థాయి అరంగేట్రం చేసే అవకాశం దక్కింది. కొలంబోలో వాతావరణం మేఘావృతంగా ఉండటంతో ప్రారంభంలో బౌలర్లకు సహకారం లభించవచ్చని శ్రీలంక కెప్టెన్ ధనంజయ డి సిల్వా అభిప్రాయపడ్డాడు. భారత్పై ఒత్తిడి పెంచాలంటే ఆరంభంలోనే వికెట్లు తీయాలని, బ్యాటింగ్లోనూ తొందరగా వికెట్లు కోల్పోకుండా స్కోర్బోర్డును ముందుకు తీసుకెళ్లాలని ఆటగాళ్లకు సూచించినట్లు చెప్పాడు.
ప్లేయింగ్ ఎలెవన్..
టీమిండియా.. యశస్వి జైస్వాల్, కేఎల్ రాహుల్, దేవదత్ పడిక్కల్, శుభ్మన్ గిల్, రిషబ్ పంత్, రవీంద్ర జడేజా, ధ్రువ్ జురెల్, సారాంశ్ జైన్, మానవ్ సుతార్, మహ్మద్ సిరాజ్, ప్రసిద్ధ్ కృష్ణ
శ్రీలంక.. లహిరు ఉదరా, కమిల్దు మెండిస్, ధనంజయ డి సిల్వా, సోనాల్ దినుషా, నిరోషన్ డిక్వెల్లా, కేశర నువంత, ప్రబాత్ జయసూర్య, లహిరు కుమార, అసిత ఫెర్నాండో
మరిన్ని క్రికెట్ వార్తల కోసం ఇక్కడ క్లిక్ చేయండి
