Faruk Ahmed : మాజీ కెప్టెన్‌కు గుండెపోటు.. ఆస్పతిలో చేరిక.. స్టంట్ వేసిన డాక్టర్లు!

Faruk Ahmed : బంగ్లాదేశ్ క్రికెట్ జట్టు మాజీ కెప్టెన్ ఫారూక్ అహ్మద్ ఆదివారం (నవంబర్ 10) గుండెపోటుకు గురయ్యారు. ఛాతీలో నొప్పి రావడంతో వెంటనే బంగ్లాదేశ్ రాజధాని ఢాకాలోని ఆసుపత్రిలో చేర్చగా, వైద్యులు ఆయనకు ఒక ఆర్టరీలో బ్లాకేజ్ ఉన్నట్లు గుర్తించారు. 11 సంవత్సరాల అంతర్జాతీయ కెరీర్‌లో కేవలం ఏడు మ్యాచ్‌లు మాత్రమే ఆడినప్పటికీ, బంగ్లాదేశ్ క్రికెట్‌లో కీలక పాత్ర పోషించిన ఫారూక్ అహ్మద్‌కు ప్రస్తుతం ఆసుపత్రిలో శస్త్రచికిత్స జరిగింది.

బంగ్లాదేశ్ క్రికెట్ మాజీ కెప్టెన్ ఫారూక్ అహ్మద్ ఆదివారం ఛాతీలో నొప్పి రావడంతో ఢాకాలోని ఒక ఆసుపత్రిలో చేరారు. క్రిక్‌బజ్ నివేదిక ప్రకారం, వైద్యులు ఆయనకు చేసిన పరీక్షల్లో ఒక ఆర్టరీలో బ్లాకేజ్ ఉన్నట్లు గుర్తించారు. బంగ్లాదేశ్ క్రికెట్ బోర్డు అధికారులు తెలిపిన వివరాల ప్రకారం.. ఫారూక్ అహ్మద్ గుండెకు సర్జరీ చేశారు. యాంజియోగ్రామ్ ద్వారా బ్లాకేజ్‌ను గుర్తించిన అనంతరం.. వైద్యులు సాయంత్రం ఆయన గుండెలో స్టంట్ అమర్చారు. ప్రస్తుతం ఆయన వైద్యుల పర్యవేక్షణలో ఆసుపత్రిలో చికిత్స పొందుతున్నారు.

ఫారూక్ అహ్మద్ అంతర్జాతీయ క్రికెట్ కెరీర్ సుదీర్ఘంగా 11 సంవత్సరాలు ఉన్నప్పటికీ, ఆయన ఆడిన మ్యాచ్‌ల సంఖ్య చాలా తక్కువ. 1988 అక్టోబర్ 29న పాకిస్తాన్‌పై వన్డే మ్యాచ్‌తో అంతర్జాతీయ అరంగేట్రం చేసిన ఫారూక్, చివరిసారిగా 1999 మే 21న ఆస్ట్రేలియాపై ఆడారు. 11 ఏళ్ల అంతర్జాతీయ కెరీర్‌లో ఆయన కేవలం 7 వన్డే మ్యాచ్‌లు మాత్రమే ఆడారు. ఈ ఏడు మ్యాచ్‌లలోనే ఆయనకు జట్టుకు కెప్టెన్‌గా వ్యవహరించే అవకాశం కూడా లభించింది.

ఆయన అంతర్జాతీయ కెరీర్‌లో అత్యధిక స్కోరు 57 పరుగులు. 1990లో చండీగఢ్‌లో భారత్‌తో జరిగిన వన్డే మ్యాచ్‌లో ఆయన ఈ పరుగులు చేశారు. అంతర్జాతీయ క్రికెట్‌లో తక్కువ మ్యాచ్‌లు ఆడిన ఫారూక్ అహ్మద్, దేశీయ క్రికెట్‌లో మాత్రం మంచి పేరు తెచ్చుకున్నారు. దేశీయ క్రికెట్‌లో విజయవంతమైన కెప్టెన్‌గా గుర్తింపు పొందారు. దీని కారణంగానే 1993-94లో ఆయనకు బంగ్లాదేశ్ వన్డే జట్టు కెప్టెన్సీ పగ్గాలు అప్పగించారు. అయితే, బీసీబీ ఈ నిర్ణయం సరిగా పనిచేయకపోవడంతో ఆయనను త్వరలోనే కెప్టెన్సీ నుంచి తొలగించారు. ఆయన 5 ఫస్ట్ క్లాస్ మ్యాచ్‌లు ఆడి, 8 ఇన్నింగ్స్‌లలో 258 పరుగులు చేశారు. ఫస్ట్ క్లాస్‌లో ఆయన అత్యధిక స్కోరు 68 పరుగులు.

మరిన్ని క్రీడా వార్తల కోసం ఇక్కడ క్లిక్ చేయండి..