Video: పాకిస్తాన్ జిందాబాద్ అంటూ చేయి కలిపిన ఫ్యాన్.. ఊహించని షాకిచ్చిన గిల్..

Pakistan Fan Shouts Slogan at Shubman Gill: ఆస్ట్రేలియా పర్యటనలో ఉన్న భారత వన్డే జట్టు కెప్టెన్ శుభ్‌మన్ గిల్‌కు అనుకోని సంఘటన ఎదురైంది. అడిలైడ్ వీధుల్లో మామూలుగా నడుచుకుంటూ వెళ్తున్న గిల్‌ను కలిసిన ఓ అభిమాని, ఆయనతో కరచాలనం చేసిన వెంటనే “పాకిస్తాన్ జిందాబాద్” అని నినాదం చేశాడు. ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది. అయితే, భారత కెప్టెన్ ఈ పరిస్థితిని అద్భుతంగా, సంయమనంతో హ్యాండిల్ చేసిన తీరుపై సర్వత్రా ప్రశంసలు కురుస్తున్నాయి.

అసలేం జరిగింది?

భారత్-ఆస్ట్రేలియా వన్డే సిరీస్‌లో భాగంగా రెండో మ్యాచ్‌కు సిద్ధమవుతున్న నేపథ్యంలో, గిల్ విశ్రాంతి సమయంలో బయటకు వచ్చాడు. ఈ క్రమంలో, ఓ అభిమాని గిల్ దగ్గరికి వచ్చి షేక్ హ్యాండ్ ఇవ్వడానికి ప్రయత్నించాడు. భారత కెప్టెన్ కూడా అభిమానిని పలకరించి, చేయి కలిపాడు. అయితే, చేయి కలిపిన వెంటనే ఆ వ్యక్తి ఒక్కసారిగా “పాకిస్తాన్ జిందాబాద్” అని బిగ్గరగా అరిచాడు. ఈ అనూహ్య నినాదానికి గిల్ ఒక్క క్షణం పాటు ఆశ్చర్యానికి గురైనప్పటికీ, ఏమాత్రం స్పందించకుండా తన చేయి వెనక్కి తీసుకుని, ముందుకు వెళ్లిపోయాడు.

గిల్ సంయమనంపై అభిమానుల ప్రశంసలు..

A Pakistani fan met Shubman Gill in Adelaide and said, “Pakistan Zindabad.” 🇵🇰🇮🇳🔥 pic.twitter.com/2NVLpjwFo7

— Cric Passion (@CricPassionTV) October 22, 2025

ఈ మొత్తం సంఘటన వీడియో సోషల్ మీడియాలో షేర్ చేశారు. చాలా మంది నెటిజన్లు ఆ అభిమాని చర్యను నిరసిస్తూనే, శుభ్‌మన్ గిల్ చూపిన పరిణతికి, సంయమనానికి హ్యాట్సాఫ్ చెబుతున్నారు. ఒక అంతర్జాతీయ క్రికెట్ కెప్టెన్‌గా, మైదానం వెలుపల ఇలాంటి ఉద్రిక్త పరిస్థితులను కూడా ప్రశాంతంగా ఎదుర్కోవడం ఆయనలోని వృత్తి నైపుణ్యాన్ని, మానసిక స్థైర్యాన్ని తెలియజేస్తుందని అభిమానులు వ్యాఖ్యానిస్తున్నారు. ఎటువంటి ప్రతిస్పందన ఇవ్వకుండా, వివాదానికి తావివ్వకుండా ముందుకు సాగిపోవడం ద్వారా గిల్ ఈ పరిస్థితిని చాలా తెలివిగా ఎదుర్కొన్నారని విశ్లేషకులు కూడా అభిప్రాయపడుతున్నారు.

ప్రస్తుతం ఆస్ట్రేలియాలో మూడు వన్డేల సిరీస్‌లో భారత్ 0-1 తేడాతో వెనుకబడి ఉంది. ఈ సంఘటనను పక్కనపెట్టి, గిల్ తన దృష్టిని జట్టును విజయపథంలో నడిపించడంపై కేంద్రీకరించనున్నారు. ఈరోజు జరిగే రెండో వన్డేలో గెలిచి సిరీస్‌ను సమం చేయాలనే లక్ష్యంతో టీమిండియా బరిలోకి దిగనుంది.