PAK vs ENG: ఇంగ్లీషోళ్ల చేతిలో 17 ఏళ్లుగా బడిత పూజే.. ఒక్క మ్యాచ్‌లోనూ గెలవని పాకిస్తాన్.. కట్‌చేస్తే..

PAK vs ENG: టీ20 వరల్డ్ కప్ 2026 సూపర్-8 దశలో పాకిస్థాన్‌కు చారిత్రాత్మక సవాల్ ఎదురైంది. సూపర్-8లో పాకిస్థాన్ ఆడాల్సిన తొలి మ్యాచ్ వర్షం కారణంగా రద్దయ్యింది. అందుకే మిగిలిన మ్యాచ్‌లలో తప్పనిసరిగా గెలిచి సెమీఫైనల్ టికెట్ సాధించాల్సిన పరిస్థితి. అయితే, పాకిస్థాన్ ముందున్న పెద్ద సవాల్ ఏంటంటే – టీ20 వరల్డ్ కప్ చరిత్రలో ఎప్పుడూ గెలవని జట్టుతోనే తలపడాల్సి రావడం.

సెమీస్ చేరాలంటే.. చరిత్రను మార్చాల్సిందే..

పాకిస్థాన్ తదుపరి మ్యాచ్ ఇంగ్లాండ్‌తో కాండీలోని పల్లెకెలె ఇంటర్నేషనల్ స్టేడియంలో జరగనుంది. ఈ మ్యాచ్ పాకిస్థాన్‌కు ఎంతో కీలకం. ఎందుకంటే టీ20 వరల్డ్ కప్‌లో ఇప్పటివరకు పాకిస్థాన్ ఎప్పుడూ ఇంగ్లాండ్‌ను ఓడించలేకపోయింది. 2009లో తొలిసారి ఇంగ్లాండ్‌తో టి20 వరల్డ్ కప్‌లో తలపడిన పాకిస్థాన్, ఈ 17 ఏళ్లలో ఒక్క విజయాన్నీ నమోదు చేయలేకపోయింది. ఫిబ్రవరి 24న జరిగే ఈ మ్యాచ్‌లో పాకిస్థాన్ గెలిస్తే, అది టీ20 వరల్డ్ కప్ చరిత్రలో ఇంగ్లాండ్‌పై తొలి విజయం అవుతుంది.

ప్రతిసారీ పాకిస్థాన్‌కు పరాజయం..

టీ20 వరల్డ్ కప్‌లో ఇంగ్లాండ్ – పాకిస్థాన్ మధ్య ఇప్పటివరకు 3 మ్యాచ్‌లు జరిగాయి. మూడు సార్లూ పాకిస్థాన్ ఓటమిపాలైంది.

2009 గ్రూప్ దశలో ఇంగ్లాండ్ 48 పరుగుల తేడాతో గెలిచింది.

2010 సూపర్-8 రౌండ్‌లో 6 వికెట్ల తేడాతో పాకిస్థాన్ ఓడింది.

చివరిసారిగా 2022 టీ20 వరల్డ్ కప్ ఫైనల్లో ఇంగ్లాండ్ 5 వికెట్ల తేడాతో పాకిస్థాన్‌ను ఓడించి ట్రోఫీని కైవసం చేసుకుంది.

మొత్తం టీ20 అంతర్జాతీయ మ్యాచ్‌ల్లో కూడా ఇంగ్లాండ్ ఆధిపత్యం కొనసాగుతోంది. రెండు జట్ల మధ్య జరిగిన 31 మ్యాచ్‌ల్లో ఇంగ్లాండ్ 21 విజయాలు సాధించగా, పాకిస్థాన్ 9 మాత్రమే గెలిచింది. ఒక మ్యాచ్ ఫలితం తేలలేదు. కాబట్టి ఈ మ్యాచ్ పాకిస్థాన్‌కు కేవలం పాయింట్ల కోసమే కాదు, మానసికంగా, చారిత్రాత్మకంగా ఉన్న భారం తీరిపోయే అవకాశం కూడా. అయితే ఇంగ్లాండ్ ప్రస్తుతం మంచి ఫామ్‌లో ఉంది. సూపర్-8లో ఇప్పటికే ఒక మ్యాచ్ గెలిచిన ఇంగ్లాండ్‌తో ఈ పోరు ఉత్కంఠభరితంగా సాగనుంది.