Cricket History : క్రికెట్ చరిత్రలో వింత అవుట్‌లు.. బ్యాట్స్‌మెన్ చేసిన తప్పులెంటో తెలుసా ?

Cricket History : క్రికెట్‌లో అత్యుత్తమ ఫార్మాట్‌గా టెస్ట్ క్రికెట్‌ను పరిగణిస్తారు. ఇక్కడ బ్యాట్స్‌మెన్ నైపుణ్యం, ఓర్పు అసలైన పరీక్షగా నిలుస్తాయి. అయితే, ఈ క్లాసిక్ ఫార్మాట్‌లో కూడా కొన్నిసార్లు రూల్స్ పాటించకపోవడం వల్ల బ్యాట్స్‌మెన్ తమ వికెట్ కోల్పోతుంటారు. క్రికెట్ చరిత్రలో చాలా అరుదుగా కనిపించే అత్యంత అసాధారణమైన రీతిలో బ్యాట్స్‌మెన్ అవుట్ అయిన కొన్ని సంఘటనల గురించి ఈ వార్తలో తెలుసుకుందాం.

1. లెన్ హట్టన్ – ఇంగ్లాండ్ (ఆబ్స్ట్రక్టింగ్ ది ఫీల్డ్)

టెస్ట్ క్రికెట్ చరిత్రలో ఇలాంటి మొదటి సంఘటన 1951లో జరిగింది. ఇంగ్లాండ్ దిగ్గజ బ్యాట్స్‌మెన్ లెన్ హట్టన్ దక్షిణాఫ్రికాపై ఓవల్ మైదానంలో ఆడుతూ 27 పరుగులు చేసి ఆబ్స్ట్రక్టింగ్ ది ఫీల్డ్ నిబంధన కింద అవుట్ అయ్యాడు. క్రికెట్ చరిత్రలో ఉద్దేశపూర్వకంగా ఫీల్డింగ్‌కు అడ్డుపడినందుకు గాను ఒక ఆటగాడిని అవుట్ చేయడం ఇదే మొదటిసారి.

2. రస్సెల్ ఎండీన్ – దక్షిణాఫ్రికా (హ్యాండిల్డ్ ది బాల్)

కొన్నిఏళ్ల తర్వాత 1957లో దక్షిణాఫ్రికా ఆటగాడు రస్సెల్ ఎండీన్ కేప్‌టౌన్ టెస్టులో ఇంగ్లాండ్‌పై కేవలం 3 పరుగులు చేసి హ్యాండిల్డ్ ది బాల్ నిబంధన కింద అవుట్ అయ్యాడు. ఎండీన్ ఆట సమయంలో బంతిని చేతితో తాకాడు. దీంతో అంపైర్ అప్పీల్ చేయకుండానే అతన్ని అవుట్‌గా ప్రకటించాడు. టెస్ట్ క్రికెట్‌లో ఈ రకమైన మొదటి అవుట్ ఇది. ఇది ఆటగాళ్లకు రూల్స్ పట్ల మరింత అప్రమత్తంగా ఉండాలని మెసేజ్ ఇచ్చింది.

3. ఆండ్రూ హిల్డిచ్ – ఆస్ట్రేలియా (హ్యాండిల్డ్ ది బాల్)

1979లో ఆస్ట్రేలియా ఆటగాడు ఆండ్రూ హిల్డిచ్ విషయంలో మరో ఆసక్తికరమైన సంఘటన జరిగింది. అతను పెర్త్‌లో పాకిస్థాన్‌తో ఆడుతుండగా, ఫీల్డర్ నుంచి వచ్చిన బంతిని బౌలర్‌కు తిరిగి ఇచ్చాడు. కానీ దురదృష్టవశాత్తు రూల్స్ ప్రకారం ఇది హ్యాండిల్డ్ ది బాల్ గా పరిగణించబడింది. అతన్ని అవుట్‌గా ప్రకటించారు. ఈ నిర్ణయం చాలా వివాదాస్పదంగా మారినప్పటికీ, నిబంధనల ప్రకారం ఇది సరైనదే.

4. మొహసిన్ ఖాన్ – పాకిస్థాన్ (హ్యాండిల్డ్ ది బాల్)

అదే విధంగా 1982లో కరాచీ టెస్టులో పాకిస్థాన్ ఆటగాడు మొహసిన్ ఖాన్ ఆస్ట్రేలియాపై 58 పరుగులు చేస్తూ బంతిని చేతితో తాకాడు. దీంతో అతను కూడా హ్యాండిల్డ్ ది బాల్ నిబంధన కింద పెవిలియన్ చేరాల్సి వచ్చింది. మొహసిన్ మంచి లయలో బ్యాటింగ్ చేస్తుండటంతో ఈ అవుట్ అప్పట్లో చాలా చర్చనీయాంశమైంది.

5. డెస్మండ్ హేన్స్ – వెస్టిండీస్ (హ్యాండిల్డ్ ది బాల్)

1983లో ముంబైలోని వాంఖడే స్టేడియంలో వెస్టిండీస్ ఓపెనర్ డెస్మండ్ హేన్స్ భారత్‌పై 55 పరుగులు చేస్తూ ఆడుతున్నప్పుడు ఇలాంటి ఘటనే జరిగింది. అతను బంతిని చేతితో ఆపడానికి ప్రయత్నించాడు. దీంతో అతన్ని హ్యాండిల్డ్ ది బాల్ అవుట్‌గా ప్రకటించారు. అతని ఇన్నింగ్స్ అక్కడే ముగిసింది.

మరిన్ని క్రికెట్ వార్తల కోసం ఇక్కడ క్లిక్ చేయండి