Video: సంజు శాంసన్ ట్రేడ్ పుకార్లపై సీఎస్కే మైండ్ బ్లోయింగ్ రియాక్షన్.. ఏమందంటే..?

IPL 2026 Auction: ఐపీఎల్ 2026 సీజన్ ముంగిట క్రికెట్ అభిమానుల దృష్టినంతా ఆకర్షిస్తున్న అంశం.. రాజస్థాన్ రాయల్స్ (RR) కెప్టెన్ సంజు శాంసన్ (Sanju Samson) చెన్నై సూపర్ కింగ్స్ (CSK) జట్టులోకి ట్రేడ్ అవుతారా లేదా అనేది. ఈ మెగా ట్రేడ్ డీల్‌పై గత కొద్ది రోజులుగా సోషల్ మీడియాలో, క్రికెట్ వర్గాల్లో ఊహాగానాలు తారాస్థాయికి చేరుకున్నాయి. అయితే, ఈ మొత్తం చర్చపై చెన్నై సూపర్ కింగ్స్ ఫ్రాంచైజీ తాజాగా ఇచ్చిన ‘హింట్’ (Cheeky Hint) ఇప్పుడు వైరల్ అవుతోంది.

ట్రేడ్ వార్తలతో హీటెక్కిన వెదర్..

ఐపీఎల్ 2026 సీజన్‌కు ముందు నవంబర్ 15 రిటెన్షన్ డెడ్‌లైన్ దగ్గరపడుతున్న నేపథ్యంలో, సంజు శాంసన్ తనను రాజస్థాన్ రాయల్స్ నుంచి విడుదల చేయాలని కోరినట్లు వార్తలు వచ్చాయి. దీంతో, మహేంద్ర సింగ్ ధోనీ వారసుడి కోసం చూస్తున్న సీఎస్కే యాజమాన్యం శాంసన్‌ను ట్రేడ్ ద్వారా తీసుకోవాలని ప్రయత్నిస్తున్నట్లు కథనాలు వెలువడ్డాయి.

కొన్ని నివేదికల ప్రకారం, ఈ ట్రేడ్ డీల్‌లో సీఎస్కే తమ స్టార్ ప్లేయర్‌లలో ఒకరిని రాజస్థాన్ రాయల్స్‌కు ఇచ్చేందుకు కూడా సిద్ధమైందని తెలుస్తోంది. ఇందులో రవీంద్ర జడేజా పేరు ప్రముఖంగా వినిపించింది. దీంతో ఈ ట్రేడ్ జరగడం దాదాపు ఖాయమనే ప్రచారం జరిగింది.

సీఎస్కే సీఈఓతో సరదా వీడియో..

We heard your questions 💬 Here’s Kasi Sir’s a̶n̶s̶w̶e̶r̶ twist! 😂

Use #LeoHotline and ask your questions! 💛👇 #WhistlePodu pic.twitter.com/59gBKCrr2L

— Chennai Super Kings (@ChennaiIPL) November 8, 2025

ఈ పుకార్లకు చెక్ పెట్టే ఉద్దేశంలోనో లేక అభిమానులను కాస్త ఆటపట్టించేందుకో కానీ, చెన్నై సూపర్ కింగ్స్ ఫ్రాంచైజీ తమ అధికారిక సోషల్ మీడియా ఖాతాలో ఒక ఫన్నీ వీడియోను పోస్ట్ చేసింది.

ఈ వీడియోలో సీఎస్కే సీఈఓ కాశీ విశ్వనాథన్ స్వయంగా కనిపించారు. ఆయన తమ మస్కట్ ‘లియో’తో కలిసి మాట్లాడుతూ, ఇంటర్నెట్‌లో వస్తున్న ట్రేడ్ పుకార్ల గురించి సరదాగా ప్రస్తావించారు. “సోషల్ మీడియాలో వస్తున్న వార్తల ప్రకారం చూస్తే, నన్నే ఏకంగా ప్రీతి జింటా (పంజాబ్ కింగ్స్) కోసం ట్రేడ్ చేస్తారేమో!” అంటూ కాశీ విశ్వనాథన్ నవ్వుతూ చమత్కరించారు.

ఈ వీడియో చివర్లో ఒక టెక్స్ట్ మెసేజ్ కూడా ఉంది. అందులో ఇలా రాసి ఉంది: “Trade rumours are subject to mental health risks. Wait till the official announcement for sanity.” (ట్రేడ్ పుకార్లు మానసిక ఆరోగ్యానికి ప్రమాదకరం. అధికారిక ప్రకటన వచ్చేవరకు సంయమనం పాటించండి.)

సంజు రాకపై అభిమానుల్లో ఆసక్తి..

ఈ సరదా పోస్ట్ ద్వారా సీఎస్కే యాజమాన్యం తమను చుట్టుముట్టిన పుకార్లకు స్పష్టమైన సమాధానం ఇవ్వకుండా, ఒక సరదా సంకేతం మాత్రమే ఇచ్చింది. అయితే, ఈ పోస్ట్, ఈ ట్రేడ్ వార్తల్లో ఏదో ‘నిజం’ ఉందనే భావనను మరింత పెంచింది.

ధోనీ (MS Dhoni) వచ్చే సీజన్‌కు కూడా అందుబాటులో ఉంటారని సీఎస్కే సీఈఓ ఇప్పటికే ధృవీకరించినప్పటికీ, భవిష్యత్తు కోసం ఒక వికెట్ కీపర్-బ్యాటర్, కెప్టెన్సీ చేసే అవకాశం ఉన్న ఆటగాడి కోసం సీఎస్కే గట్టి ప్రయత్నాలు చేస్తోందనేది మాత్రం స్పష్టం. సంజు శాంసన్ రాకపై తుది నిర్ణయం నవంబర్ 15 రిటెన్షన్ డెడ్‌లైన్ నాటికి వెలువడే అవకాశం ఉంది.