World Record: 400 పరుగులతో అదరగొట్టిన చిన్మయ్ సుతార్.. 501 రన్స్ రికార్డు ఎప్పటికి బ్రేక్ అవుతుందో?

World Record: భారత దేశవాళీ క్రికెట్‌లో యంగ్ బ్యాటర్ చిన్మయ్ సుతార్ సంచలనం సృష్టించాడు. రంజీ ట్రోఫీ 2026-27 సీజన్‌లో మిజోరం తరఫున ఆడుతున్న అతడు నాగాలాండ్‌తో జరిగిన మ్యాచ్‌లో అజేయంగా 400 పరుగులు చేసి అందరి దృష్టిని ఆకర్షించాడు. సోమవారం జరిగిన ఈ మ్యాచ్‌లో చిన్మయ్ 517 బంతులు ఎదుర్కొని భారీ ఇన్నింగ్స్ ఆడాడు. అతడి అద్భుత బ్యాటింగ్‌తో మిజోరం తొలి ఇన్నింగ్స్‌లో 9 వికెట్ల నష్టానికి 581 పరుగులు చేసి డిక్లేర్ చేసింది. వ్యక్తిగతంగా 400 పరుగులు చేయడమే కాకుండా, జట్టుకు భారీ స్కోరు అందించడంలో చిన్మయ్ కీలక పాత్ర పోషించాడు. దీంతో ఫస్ట్ క్లాస్ క్రికెట్‌లో అత్యధిక వ్యక్తిగత స్కోర్లు సాధించిన ఆటగాళ్ల జాబితాలో అతడి పేరు చేరింది.

400 పరుగులు చేసిన రెండో భారత బ్యాటర్

ఫస్ట్ క్లాస్ క్రికెట్‌లో 400 పరుగుల మైలురాయిని అందుకోవడం అంత ఈజీ కాదు. భారత క్రికెట్ చరిత్రలో ఇప్పటివరకు ఈ ఘనత సాధించిన ఆటగాళ్లు ఇద్దరే. 1948-49 సీజన్‌లో మహారాష్ట్ర తరఫున ఆడిన భౌసాహెబ్ నింబాల్కర్ కాఠియావార్ జట్టుపై అజేయంగా 443 పరుగులు చేశాడు. అప్పటి నుంచి దాదాపు 78 ఏళ్ల తర్వాత మరో భారత బ్యాటర్ ఈ అరుదైన ఘనత సాధించాడు. తాజాగా చిన్మయ్ సుతార్ 400 పరుగులతో నాటౌట్‌గా నిలిచి నింబాల్కర్ తర్వాత ఈ ఘనత సాధించిన రెండో భారతీయుడిగా రికార్డు సృష్టించాడు. దేశవాళీ క్రికెట్‌లో అతడి ప్రదర్శన యువ ఆటగాళ్లకు స్ఫూర్తిగా నిలుస్తోంది.

బ్రియాన్ లారా పేరిట చెక్కుచెదరని రికార్డు

ఫస్ట్ క్లాస్ క్రికెట్‌లో అత్యధిక వ్యక్తిగత స్కోరు రికార్డు వెస్టిండీస్ దిగ్గజం బ్రియాన్ లారా పేరిట ఉంది. 1994లో ఇంగ్లండ్ కౌంటీ క్రికెట్‌లో వార్విక్‌షైర్ తరఫున ఆడిన లారా, డర్హామ్‌పై అజేయంగా 501 పరుగులు సాధించాడు. ఆ ఇన్నింగ్స్‌లో 62 ఫోర్లు, 10 సిక్సర్లు బాదాడు. అంటే బౌండరీల ద్వారానే 308 పరుగులు సాధించడం విశేషం. ఒకే ఇన్నింగ్స్‌లో 500 పరుగుల మార్కును దాటిన ఏకైక బ్యాటర్‌గా లారా చరిత్రలో నిలిచిపోయాడు. చిన్మయ్ సుతార్ 400 పరుగులు చేసినప్పటికీ, లారా రికార్డును అధిగమించాలంటే మరో 102 పరుగులు చేయాల్సి ఉంటుంది. ఇప్పటికీ ఆ రికార్డును ఎవరూ బద్దలు కొట్టలేకపోయారు.

టాప్-5 అత్యధిక వ్యక్తిగత స్కోర్లు ఇవే

ఫస్ట్ క్లాస్ క్రికెట్ చరిత్రలో అత్యధిక వ్యక్తిగత స్కోర్లు సాధించిన ఆటగాళ్ల జాబితాలో లారా అగ్రస్థానంలో కొనసాగుతున్నాడు. పాకిస్థాన్ బ్యాటర్ హనీఫ్ మహమ్మద్ 499 పరుగులతో రెండో స్థానంలో ఉన్నాడు. ఆస్ట్రేలియా దిగ్గజం డాన్ బ్రాడ్‌మన్ 452 పరుగులతో మూడో స్థానంలో నిలిచాడు. భౌసాహెబ్ నింబాల్కర్ 443 పరుగులతో నాలుగో స్థానంలో ఉండగా, ఆస్ట్రేలియాకు చెందిన విలియం పాన్స్‌ఫోర్డ్ 437 పరుగులతో ఐదో స్థానంలో ఉన్నాడు.

* 501 పరుగులు – బ్రియాన్ లారా (వెస్టిండీస్)

* 499 పరుగులు – హనీఫ్ మహమ్మద్ (పాకిస్థాన్)

* 452 పరుగులు – డాన్ బ్రాడ్‌మన్ (ఆస్ట్రేలియా)

* 443 పరుగులు – భౌసాహెబ్ నింబాల్కర్ (భారత్)

* 437 పరుగులు – విలియం పాన్స్‌ఫోర్డ్ (ఆస్ట్రేలియా)

మరిన్ని క్రీడా వార్తల కోసం ఇక్కడ క్లిక్ చేయండి..