WTC 2025 SA Playing XI: లార్డ్ బవుమా ప్లాన్ అదిరిపోయిందిగా! కంగారులకు పంచ్ ఇచ్చే తోపులు వీరే!

ప్రతిష్టాత్మక వరల్డ్ టెస్ట్ ఛాంపియన్‌షిప్ (WTC) ఫైనల్‌ కోసం దక్షిణాఫ్రికా జట్టు తమ ప్లేయింగ్ XIను అధికారికంగా ప్రకటించింది. జూన్ 11న లార్డ్స్ మైదానంలో ఆస్ట్రేలియాతో తలపడబోయే ఈ మ్యాచ్‌కు ముందు దక్షిణాఫ్రికా కెప్టెన్ టెంబా బావుమా జరిపిన విలేకరుల సమావేశంలో పూర్తి జట్టును వెల్లడించారు. గత కొన్ని మ్యాచ్‌లలో అద్భుతంగా రాణించిన కార్బిన్ బాష్, డేన్ పాటర్సన్‌లకు స్థానాలు దక్కకపోవడం కొంత ఆశ్చర్యాన్ని కలిగించినా, వారి స్థానంలో అనుభవజ్ఞుడైన లుంగీ ఎన్‌గిడిని మూడవ పేసర్‌గా ఎంపిక చేయడంపై యాజమాన్యం నమ్మకం పెట్టుకుంది. ఎన్‌గిడి, కగిసో రబాడా, మార్కో జాన్సెన్‌లతో కలిసి బౌలింగ్ విభాగాన్ని నడిపించనున్నాడు, అలాగే వియాన్ ముల్డర్ నాల్గవ సీమర్‌గా తోడవుతాడు.

ఈ మ్యాచ్‌కు దక్షిణాఫ్రికా బలమైన బ్యాటింగ్ లైనప్‌తో బరిలోకి దిగనుంది. ఓపెనర్లుగా ఐడెన్ మార్క్రామ్, ర్యాన్ రికెల్టన్ జోడీగా వస్తారు. ఇటీవల పాకిస్తాన్‌తో జరిగిన టెస్ట్‌లో డబుల్ సెంచరీ సాధించిన రికెల్టన్‌కు టోనీ డి జోర్జీ స్థానంలో ప్రాధాన్యం ఇవ్వడం గమనార్హం. నంబర్ 3 స్థానం కోసం వియాన్ ముల్డర్ లేదా ట్రిస్టన్ స్టబ్స్ లలో ఒకరికి అవకాశం ఉండగా, వారి మధ్య ఎంపికపై బావుమా చివరిమినిట్లో నిర్ణయం తీసుకోనున్నారు. స్టబ్స్, కెప్టెన్ బావుమా, డేవిడ్ బెడింగ్‌హామ్, కైల్ వెర్రెయిన్ వంటి మిడిల్ ఆర్డర్ బ్యాట్స్‌మెన్ జట్టుకు స్థిరతను అందించగల సామర్థ్యం కలవారు. కెప్టెన్‌గా బావుమా సారథ్యం వహించనుండగా, వెర్రెయిన్ వికెట్ కీపర్‌గా బాధ్యతలు చేపడతాడు.

బౌలింగ్ విభాగంలో జాన్సెన్, రబాడా, ఎన్‌గిడి, ముల్డర్ వంటి నలుగురు పేసర్లు ఉండగా, కేశవ్ మహరాజ్ ఏకైక ఫుల్టైమ్ స్పిన్నర్‌గా బరిలోకి దిగతాడు. అదనంగా అవసరమైతే ఐడెన్ మార్క్రామ్, ట్రిస్టన్ స్టబ్స్ లాంటి పార్ట్‌టైమ్ స్పిన్నర్లు తగిన మద్దతు అందించగలరు. ఇది దక్షిణాఫ్రికా చరిత్రలో మొదటి WTC ఫైనల్ కాగా, గత సీజన్ విజేతలైన ఆస్ట్రేలియాతో తలపడే ఈ మ్యాచ్‌లో ప్రోటీస్ జట్టుకు ఇది కీలకమైన అవకాశం. 1998లో చివరిసారిగా ICC టైటిల్ గెలిచిన తర్వాత, దక్షిణాఫ్రికా ఇప్పుడు మరోసారి విజయం సాధించాలనే లక్ష్యంతో బరిలోకి దిగనుంది. బ్యాటింగ్ విభాగంలో కొంత అనుభవం కొరవడినా, బౌలింగ్ యూనిట్ చాలా బలంగా ఉండటంతో, ప్రోటీస్ జట్టు ఫైనల్‌లో ఆశాజనక ప్రదర్శన ఇవ్వగలదన్న నమ్మకం ఏర్పడింది.

WTC ఫైనల్ vs ఆస్ట్రేలియా కోసం దక్షిణాఫ్రికా ప్లేయింగ్ XI: ఐడెన్ మార్క్రామ్, ర్యాన్ రికెల్టన్, వియాన్ ముల్డర్, ట్రిస్టన్ స్టబ్స్, టెంబా బావుమా (కెప్టెన్), డేవిడ్ బెడింగ్‌హామ్, కైల్ వెర్రెయిన్ (వికెట్ కీపర్), మార్కో జాన్సెన్, కేశవ్ మహరాజ్, కగిసో రబాడా, లుంగీ ఎన్‌గిడి.

మరిన్ని క్రికెట్ వార్తల కోసం ఇక్కడ క్లిక్ చేయండి..