Stuart MacGill: అతిపెద్ద జైలు ఖైదు నుంచి బయటపడ్డ ఆసీస్ లెజెండరీ స్పిన్నర్! లేకపోతే కథ కంచికేగా..

ఆస్ట్రేలియన్ క్రికెట్‌లో ఒక కీలక స్పిన్నర్‌గా పేరు గాంచిన స్టువర్ట్ మాక్‌గిల్ తాజాగా నేరంలో దోషిగా తేలడం షాక్‌కు గురిచేసింది. కొకైన్ సరఫరా కేసులో సంబంధం ఉందని తేలిన తర్వాత, ఆయనకు ఆస్ట్రేలియన్ కోర్టు శిక్ష విధించింది. 2021లో జరిగిన కొకైన్ సరఫరా ఆపరేషన్‌లో భాగంగా మాక్‌గిల్ తన బావమరిది, డ్రగ్ డీలర్ మధ్య ఒప్పందాన్ని కుదుర్చుకున్నట్టు తేలింది. అయితే, అతను పెద్ద ఎత్తున మాదకద్రవ్యాల రవాణా నుంచి విముక్తి పొందాడు. ఈ కేసులో ఓ హింసాత్మక ఘటన కూడా చోటుచేసుకుంది. మాక్‌గిల్‌ను అపహరించి, దాడికి గురి చేసి, డ్రగ్ అప్పుల విషయంలో బెదిరించారని తెలిసింది. ఈ ఘటనపై అతను కొన్ని రోజులు తర్వాత పోలీసులకు ఫిర్యాదు చేసినా, తన ప్రమేయాన్ని 2023లో అరెస్టు అయ్యే వరకు ఖండిస్తూనే ఉన్నాడు.

సిడ్నీలోని డౌనింగ్ సెంటర్ డిస్ట్రిక్ట్ కోర్టులో శుక్రవారం న్యాయమూర్తి నికోల్ నోమన్, మాక్‌గిల్‌కు ఒక సంవత్సరం 10 నెలల ఇంటెన్సివ్ కరెక్షన్స్ ఆర్డర్‌ను విధించారు. దీనితో పాటు, 495 గంటల కమ్యూనిటీ సర్వీస్, క్రమం తప్పకుండా మాదకద్రవ్య పరీక్ష చేయించుకోవాలనే నిబంధనను కూడా విధించారు. న్యాయమూర్తి స్పష్టంగా పేర్కొన్నది, మాక్‌గిల్ ఈ డీలింగ్ ఒప్పందానికి కీలకంగా వ్యవహరించాడని, పార్టీలను ఒకే చోటకి తెచ్చే బాధ్యత అతనిది అని. ఈ నేరంలో అతని పాత్రను తీవ్రంగా పరిగణించిన న్యాయస్థానం, ఆయన తీర్పు లోపం బహిరంగంగా పతనానికి దారి తీసిందని వ్యాఖ్యానించింది.

స్టువర్ట్ మాక్‌గిల్ క్రికెట్ కెరీర్‌ను పరిశీలిస్తే, 1998 నుంచి 2008 వరకు ఆస్ట్రేలియా తరఫున 44 టెస్టులు ఆడి 208 వికెట్లు సాధించాడు. అతని స్ట్రైక్ రేట్ అద్భుతంగా ఉండి, ప్రతి 54 బంతులకు వికెట్ పడగొట్టే సామర్థ్యం ఉన్నాడు. షేన్ వార్న్ వంటి దిగ్గజ స్పిన్నర్ వెనుక ఉండటంతో ఎక్కువ అవకాశాలు రాకపోయినా, తనదైన శైలిలో తన స్థానం నిలబెట్టుకున్నాడు. 1998లో దక్షిణాఫ్రికాపై టెస్ట్ అరంగేట్రం చేసిన మాక్‌గిల్, అదే సంవత్సరం యాషెస్ సిరీస్‌లో అత్యధిక వికెట్లు తీసి 17.70 సగటుతో 27 వికెట్లతో ఆకట్టుకున్నాడు. అతని అత్యుత్తమ బౌలింగ్ ఫిగర్స్ బంగ్లాదేశ్‌పై 8/108 కాగా, పరిమిత ఓవర్ల క్రికెట్‌లో కూడా మాక్‌గిల్ తనదైన ముద్ర వేశాడు. మూడు వన్డేల్లో ఆడి 3.50 ఎకానమీతో 6 వికెట్లు పడగొట్టాడు.

దేశవాళీ క్రికెట్‌లో మాక్‌గిల్ న్యూ సౌత్ వేల్స్, వెస్ట్రన్ ఆస్ట్రేలియా, సోమర్‌సెట్, నాటింగ్‌హామ్‌షైర్, బిగ్ బాష్ లీగ్‌లో సిడ్నీ సిక్సర్స్‌కు ప్రాతినిధ్యం వహించాడు. ఒకప్పుడు అత్యుత్తమ స్పిన్నర్‌గా గుర్తింపు పొందిన మాక్‌గిల్, తన తర్వాతి జీవితంలో అక్రమ మార్గాల్లోకి వెళ్లడం విచారకరం. క్రికెట్‌కు తన సేవలు సమర్పించినప్పటికీ, వ్యక్తిగత జీవితంలో చేసిన తప్పులు అతని పరువు దిగజార్చాయి. అయినప్పటికీ, ఈ శిక్షతో అతను మారతాడనే ఆశ అందరిలో ఉంది.

మరిన్ని క్రికెట్ వార్తల కోసం ఇక్కడ క్లిక్ చేయండి..