Ram Lalla: కోట్లాది మందితో పూజలను అందుకోనున్న రామ్ లల్లా విగ్రహాన్ని చెక్కిన శిల్పి ఎవరో తెలుసా.. ఎంబీఏ చదివి శిల్పిగా మారిన అరుణ్.. గురించి ఆసక్తికర విశేషాలు

Ram Lalla Idol

అయోధ్యలో నిర్మిస్తున్న రామమందిరాన్ని జనవరి 22న ప్రారంభించనున్నారు. రామమందిరంలో ప్రతిష్టించడానికి మూడు విగ్రహాలను.. ముగ్గురు శిల్పులు చెక్కగా.. కర్ణటక మైసూరుకు చెందిన శిల్పి అరుణ్ యోగిరాజ్ చెక్కిన రామలల్లా విగ్రహాన్ని గర్భ గుడిలో ప్రతిష్టించడానికి ఎంపిక చేశారు. ఈ విషయాన్ని రామజన్మ భూమి ట్రస్ట్‌ సమాచారం ఇచ్చింది. ఓటింగ్ ద్వారా రాంలల్లా విగ్రహాన్ని ఏకగ్రీవంగా ఎన్నుకున్నారు. ఈ విగ్రహాన్ని జనవరి 22న ప్రతిష్ఠించనున్నారు. MBA గ్రాడ్యుయేట్ అయిన అరుణ్ యోగిరాజ్ తన కార్పొరేట్ ఉద్యోగాన్ని వదిలి తన కుటుంబ వారసత్వంగా వస్తున్న శిల్ప కళా వృత్తిని ఎంచుకున్నాడు. ఇప్పుడు అతను అయోధ్యలోని రామమందిరంలో ప్రతిష్టించే రామ లల్లా మూర్తిని చెక్కాడు.

మైసూరుకు చెందిన అరుణ్‌తో పాటు బెంగళూరుకు చెందిన జిఎల్ భట్, రాజస్థాన్‌కు చెందిన సత్యనారాయణ పాండే కూడా ఈ రామ్ లల్లా విగ్రహాన్ని చెక్కారు. విగ్రహం పొడవు 51 అంగుళాలు, విగ్రహం మొత్తం ఘరా 8 అడుగుల ఎత్తు .. మూడు అడుగుల వెడల్పు ఉంటుంది. ఈ విగ్రహాన్ని ప్రధాని నరేంద్ర మోదీ ఆవిష్కరించనున్నారు.

జనవరి 22న అయోధ్య రామ మందారలో జరగనున్న ప్రాణ ప్రతిష్ఠాపన కార్యక్రమానికి 2,000 మంది ఆహ్వానితులలో అరుణ్ ఒకరు. MBA గ్రాడ్యుయేట్ అయిన అరుణ్ తన కార్పొరేట్ ఉద్యోగాన్ని విడిచిపెట్టి.. తన కుటుంబం వారసత్వంగా నిర్వహిస్తున్న శిల్పకళా వృత్తిని ఎంచుకున్నాడు. 2008 నుండి వెయ్యికి పైగా విభిన్న విగ్రహాలను చెక్కాడు. గతంలో కేదార్‌నాథ్ ఆలయంలో ఆదిశంకరాచార్య విగ్రహాన్ని అరుణ్ చెక్కారు. ఢిల్లీలోని ఇండియా గేట్ దగ్గర ప్రధాని నరేంద్ర మోడీ ప్రారంభించిన సుభాష్ చంద్రబోస్ విగ్రహాన్ని కూడా అరుణ్ చెక్కారు.

ఇప్పుడు ఢిల్లీలోని జైసల్మేర్ హౌస్‌లో డాక్టర్ బి.ఆర్. అంబేద్కర్‌ విగ్రహాన్ని చేక్కేందుకు న్యాయశాఖ అరుణ్‌కు ఆఫర్ ఇచ్చింది. ఈ విగ్రహాన్ని ఫిబ్రవరి నెలాఖరులోగా విగ్రహాన్ని అందజేయాలని ఆదేశించింది. ఇది ఏప్రిల్ 14న ప్రారంభించబడుతుంది. రామలల్లా విగ్రహాన్ని చెక్కడం గురించి టీవీ9తో మాట్లాడిన అరుణ్ .. రామ్ లల్లా రాతి విగ్రహాన్ని చెక్కే అవకాశం తనకు లభించినందుకు ఆనందాన్ని వ్యక్తం చేశారు.

బాల రామయ్య రాతి విగ్రహం

అయోధ్య అనగానే ముందుగా గుర్తుకు వచ్చేది రామ్ లల్లా.. లల్లా అంటే బిడ్డ. రామ్ లల్లా అంటే రాముడి చిన్ననాటి విగ్రహం. అయోధ్య రామమందిరంలోని గర్భ గుడిలో బాల రాముడి రాతి విగ్రహం ప్రతిష్టించనున్నారు. రాముడు బాలుడిగా ఉన్నప్పుడు ఎలా ఉండేవాడు అనే కాన్సెప్ట్ ఆధారంగా ఈ విగ్రహాన్ని రూపొందించారు. 51 అంగుళాల రాతి విగ్రహం రాముడి చిన్ననాటి స్వభావాన్ని రాముడి అమాయకత్వం, అల్లరి, మహిమను అభివర్ణిస్తుంది. చిన్న పిల్లవాడు ఉన్న రాముడి రూపు రేకలు పురాణాల్లో, కథల్లో, సీరియల్స్‌లో, సినిమాల్లో, పుస్తకాల పేజీల్లో ఎక్కడా కనిపించక పోవడం విశేషం. పురాణాల ద్వారా రాముడి బాల్యానికి సంబంధించిన చిత్రాలు.. శ్రీ కృష్ణుని బాల్యనికి సంబంధించిన కొన్ని విషయాలు మాత్రమే. కనుక ఇదొక విభిన్న కళాఖండంగా వెలుగొందుతుందనడంలో సందేహం లేదు. ఇంత విభిన్నమైన, ప్రత్యేకమైన విగ్రహాన్ని అరుణ్ రూపొందించడం విశేషం.

అరుణ్ యోగిరాజ్ మైసూరుకి చెందిన అపర మేధావి. రాతి విగ్రహ శిల్పకళలో అరుణ్ కు 200 సంవత్సరాల తరతరాల వారసత్వం ఉంది. అరుణ్ తండ్రి, తాత, ముత్తాత.. ఇలా దాదాపు ఐదు తరాల నుండి రాళ్ళను శిల్పాలుగా మలచే పనిలో కళలో నిమగ్నమై ఉన్నారు. అరుణ్ తండ్రి యోగిరాజ్ కూడా నైపుణ్యం కలిగిన శిల్పి. అతని తాత బసవన్న శిల్పి మైసూర్ రాజభవనంలో ఉండేవాడు. తాత ముత్తాతలు కూడా శిల్పులే. అరుణ్‌కి దాదాపు 200 ఏళ్ల క్రితం నాటి శిల్ప కళ వారసత్వంగా వచ్చింది. అరుణ్ యోగిరాజ్‌కి చిన్నప్పటి నుంచి కార్వింగ్‌లో అభిరుచి ఉంది. అయితే ఎంబీఏ పూర్తి చేసిన తర్వాత ఓ ప్రైవేట్ కంపెనీలో కొంతకాలం పనిచేశాడు. అయితే అతనికి సంతృప్తినివ్వలేదు. అప్పుడు తమ పూర్వీకుల నుంచి వస్తున్న శిల్పకళను కొనసాగించాలని భావించారు. దీంతో తన కోరికను తండ్రికి చెప్పాడు. దీనికి తండ్రి ముందుగా అంగీకరించలేదు. అయితే కొడుకు కోరిక ముందు తలొగ్గాల్సి వచ్చింది. ఓ షరతుతో కొడుకుకు అనుమతి ఇచ్చాడు. MBA గ్రాడ్యుయేట్ వి కనుక శిల్ప కళను ఓ వ్యాపార వస్తువుగా భావించవద్దు. భక్తీ శ్రద్ధతో పని చేయాలి. అంతేకాని రాతి విగ్రహాల కొనుగోలు, అమ్మకాలు వంటి మార్కెటింగ్ చేయరాదు.. ఇక్కడ కళాసేవ మాత్రమే చేయాలి అని తండ్రి కండిషన్స్ పెట్టాడు. తండ్రి షరత్తులకు అరుణ్ యోగిరాజ్ దానికి అంగీకరించి 2008 నుండి తన శిల్పకళా వృత్తిని కొనసాగించాడు.

సాంస్కృతిక రాజధాని నుంచి దేశ రాజధాని వరకు……!

అరుణ్ యోగిరాజ్ తన కళలో నిమగ్నమయ్యాడు. కళ అతని రక్తంలో ఉందని నిరూపించుకున్నాడు.  అద్భుతాలు పుట్టుకొచ్చాయి. మొదట్లో చిన్న చిన్న మంటపాలను చెక్కి కొత్త ఇన్నింగ్స్‌ను ప్రారంభించాడు. అనంతరం పంచముఖి గణపతి, మహావిష్ణువు, బుద్ధుడు, నంది, స్వామి శివబాల యోగి, శివకుమార్, బనశంకరీ దేవి విగ్రహాలను చెక్కి ఆలయాలకు అందజేశారు. దీని తరువాత, మైసూర్‌లో 5 అడుగుల గరుడ దేవుని విగ్రహం. KR నగర్‌లోని 7 అడుగుల లార్డ్ యోగనరసింహ స్వామి విగ్రహం, భారతదేశంలోనే అతిపెద్ద 10 అడుగుల ఏకశిలా తెల్ల పాలరాతి శ్రీ రామకృష్ణ పరమహంస శిల్పం, 11 అడుగుల ఏకశిలా ఆధునిక కళ రాతి శిల్పం మైసూర్ విశ్వవిద్యాలయంలో “క్రియేషన్ ఆఫ్ క్రియేషన్”, 15 అడుగుల ఏకశిలా తెలుపు పాలరాతి మైసూర్ మహారాజా జయచామరాజ వడయార్ పీఠంతో, శిల్పం, 15 అడుగుల తెల్లని పాలరాతి ఏకశిలా పీఠంతో కూడిన అంబేద్కర్ శిల్పం. KR నగర్‌లోని చుంచకట్టెలో 21 అడుగుల ఏకశిలా హనుమాన్ హొయసల శిల్పం అరుణ్ నైపుణ్యంతో అద్భుతంగా రూపొందించాడు. ఉత్తరాఖండ్‌లోని కేదార్‌నాథ్‌లో 12 అడుగుల ఆదిశంకరాచార్య విగ్రహం, ఇండియా గేట్ వద్ద 28 అడుగుల ఏకశిలా బ్లాక్ గ్రానైట్ రాయిలో వికసించిన సుభాష్ చంద్రబోస్ కళాఖండాలు రాష్ట్ర స్థాయిలో గుర్తింపు పొందిన అరుణ్ యోగిరాజ్‌ను జాతీయ స్థాయికి తీసుకెళ్లాయి. ఈ కళాఖండాలను ప్రధాని స్వయంగా ఆవిష్కరించారు. ఇప్పుడు రామ్ లల్లా విగ్రహంతో అరుణ్ చేతిలో సృష్టించిన హ్యాట్రిక్ కళాఖండం అవుతుంది.

భక్తి శ్రద్దలతో విగ్రహం

అరుణ్ యోగిరాజ్ ప్రతిభను చూసి ప్రధాని మోడీ మరోసారి బాల రామయ్య విగ్రహాన్ని చెక్కేందుకు అనుమతి ఇచ్చారు. మరో ఇద్దరు శిల్పులు రామ్ లల్లా విగ్రహాన్ని చెక్కారు. ఈ మూడింటిలో ఎవరి విగ్రహం అత్యంత ఆకర్షణీయంగానూ, అర్థవంతంగానూ ఉంటుందో ప్రధాన పల్లవిలో ప్రతిష్ఠించబడుతుంది. మిగిలిన రెండు విగ్రహాలను అయోధ్య రామమందిరంలోనే ప్రతిష్ఠించాలని నిర్ణయించారు. అరుణ్ రామ్ లల్లా విగ్రహాన్ని చెక్కిన తీరు ఆకట్టుకుంటుంది. చెక్కడం కోసం అరుణ్ ఎంపికైనప్పుడు, అతనికి ఒక కంకణం ఇచ్చారు. పని ప్రారంభించే ముందు శ్రీరామ స్తోత్ర పారాయణం చేసి భక్తితో విగ్రహాన్ని చెక్కడం ప్రారంభించారు. బాల రామయ్య విగ్రహం బాల్యం ఉట్టిపడాలనే ఉద్దేశ్యంతో అరుణ్ ఎప్పుడూ పిల్లలతో కలిసి గడిపేవాడు. చిన్నారులు ఉన్న చోట గంటల తరబడి కూర్చొని చిన్నారుల హావభావాలు పరిశీలించేవారు. దీని ఫలితంగా బాల రామయ్య విగ్రహంలో బాల్య రూపం ఉట్టిపడేలా మలిచారు అరుణ్.

మరిన్ని ఆధ్యాత్మిక వార్తల కోసం ఇక్కడ క్లిక్ చేయండి..