ఎన్నికలకు కొద్ది రోజుల ముందు జార్జియా మెలోనీ సంచలన నిర్ణయం.. బుర్ఖాను ఎందుకు నిషేధించారు?

ఇటలీ ప్రధానమంత్రి జార్జియా మెలోనీ (Giorgia Meloni) పాఠశాలల్లో బురఖా, నిఖాబ్ వంటి ముఖాన్ని పూర్తిగా కప్పే వస్త్రాలపై నిషేధం విధిస్తున్నట్లు ప్రకటించారు. సెప్టెంబర్ 20న తన పార్టీ యువజన విభాగం నిర్వహించిన కార్యక్రమంలో మాట్లాడిన మెలోని.. తరగతి గదుల్లో విదేశీ విద్యార్థుల సంఖ్యకు కూడా పరిమితి విధించేలా త్వరలో మంత్రివర్గం ముందుకు ప్రతిపాదన తీసుకురానున్నట్లు తెలిపారు.

మెలోని ప్రకటన ప్రకారం.. ఇటలీ పాఠశాలల్లో విద్యార్థుల మధ్య భాష, సంస్కృతి, సామాజిక సమీకరణకు ఇబ్బందులు రాకుండా చర్యలు తీసుకోవాల్సిన అవసరం ఉందన్నారు. విదేశీ విద్యార్థులకు తీవ్రమైన సమీకరణ సమస్యలు ఉంటే, వారి తల్లిదండ్రులు ఇటాలియన్ భాష నేర్చుకోవాల్సిన నిబంధనను ప్రతిపాదించారు. అయితే తరగతికి ఎంతమంది విదేశీ విద్యార్థులను అనుమతించాలనే గరిష్ఠ పరిమితిని ప్రభుత్వం ఇంకా వెల్లడించలేదు.

ప్రస్తుతం ఇటలీలో బురఖా లేదా నిఖాబ్‌పై దేశవ్యాప్తంగా ప్రత్యేక నిషేధం లేదు. 1975 నాటి చట్టం గుర్తింపును కష్టతరం చేసే ముఖ కవరింగ్‌లపై నిబంధనలు ఉండగా, 2008లో ఇటలీ అత్యున్నత పరిపాలనా న్యాయస్థానం మతపరమైన, సాంస్కృతిక కారణాలతో ముఖాన్ని కప్పుకోవచ్చని, అయితే గుర్తింపు ధృవీకరణ సమయంలో ముఖాన్ని చూపించాల్సి ఉంటుందని స్పష్టం చేసింది.

జార్జియా మెలోని ప్రతిపాదనకు మాత్రం రాజకీయంగా భిన్న స్పందనలు వస్తున్నాయి. పాఠశాలల్లో విదేశీ విద్యార్థుల పరిమితిని అమలు చేయడం ఆచరణలో కష్టమని ఇటలీ పాఠశాల ప్రధానోపాధ్యాయుల సంఘం పేర్కొంది. ఇప్పటికే 30 శాతం పరిమితికి సంబంధించిన మార్గదర్శకాలు ఉన్నప్పటికీ, స్థానిక ప్రాంతాల్లో విద్యార్థుల సంఖ్యను బట్టి వాటిని అమలు చేయడం సమస్యగా ఉందని తెలిపింది.

మొత్తంగా చూస్తే, మెలోని తాజా ప్రతిపాదనలు ఇటలీ విద్యా వ్యవస్థలో సమీకరణ, భాష, సాంస్కృతిక గుర్తింపు, మతపరమైన దుస్తులపై మరోసారి చర్చకు దారితీశాయి. ప్రతిపాదనలు చట్టరూపం దాల్చాలంటే తదుపరి శాసన ప్రక్రియ పూర్తికావాల్సి ఉంటుంది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..