Smartwatches: ఈ వాచ్‌లు మీ చేతికి ఉంటే.. డాక్టర్ వెన్నంటి ఉన్నట్లే.. మీ ఆరోగ్యానికి పూర్తి భద్రత
ఇటీవల కాలంలో స్మార్ట్ వాచ్ వాడకం గణనీయంగా పెరిగింది. ముఖ్యంగా ఫిట్ నెస్, ఆరోగ్యానికి అధిక ప్రాధాన్యం ఇచ్చే వారు పలు రకాల హెల్త్ ట్రాకర్లు ఉన్న స్మార్ట్ వాచ్ లను ఎక్కువగా వినియోగిస్తున్నారు. సెప్టెంబర్ 2022లో రకుటెన్ ఇన్ సైట్ అనే సంస్థ నిర్వహించిన ఓ సర్వేలో 25 నుంచి 34 సంవత్సరాల వయస్సున్న భారతీయ వ్యక్తుల్లో 45 శాతం మంది స్మార్ట్ వాచ్ కలిగి ఉన్నారని తేలింది. శరీరంలోని అవయవాల పనితీరు నుంచి రక్తంలోని ఆక్సిజన్ స్థాయిల వరకూ అన్నింటినీ ట్రాక్ చేసే స్మార్ట్ వాచ్ లు మార్కెట్లో లభ్యమవుతుండటమే దీనికి ప్రధాన కారణం. ఒక వేళ మీరూ కూడా స్మార్ట్ వాచ్ లు కొనుగోలు చేయాలనుకొంటున్నారా? ఆరోగ్యానికి, ఫిట్ నెస్ కు అధిక ప్రధాన్యం ఇస్తూ.. అన్నింటినీ ట్రాక్ చేసే స్మార్ట్ అయితే బాగుండు అని భావిస్తున్నారా? అయితే ఈ కథనం మీ కోసమే. బెస్ట్ హెల్త్ ట్రాకింగ్ సిస్టమ్ కూడిన టాప్ 6 స్మార్ట్ వాచ్ లను మీకు పరిచయం చేస్తున్నాం.. వాటి గురించి ఇక్కడ తెలుసుకోండి..
ఆపిల్ వాచ్ సిరీస్ 6(Apple Watch Series 6).. ఈ స్మార్ట్ వాచ్ లో రక్తంలో ఆక్సిజన్ స్థాయిలను పర్యవేక్షించే యాప్ ఉంటుంది. అంతేకాక ఎల్లప్పుడూ ఆన్‌లో ఉండే ఆల్టిమీటర్, క్రమరహిత గుండె లయలను గుర్తించగల ఈసీజీ యాప్, హృదయ స్పందన రేటులో మార్పులను ట్రాక్ చేయగల హార్ట్ రేట్ మానిటర్ ఉంటుంది. ఇంకా, సిరీస్ 6లో స్లీప్ ట్రాకింగ్, ఆటోమేటిక్ హ్యాండ్‌వాషింగ్ డిటెక్షన్, కొత్త వర్కౌట్ రకాలు వంటి ఫీచర్లు ఉన్నాయి. ఇది బ్రీత్ యాప్‌ను కూడా కలిగి ఉంది. ఈ వాచ్ ప్రారంభ ధర అధికారిక వెబ్‌సైట్ లో రూ. 40,900 గా ఉంది.
1 / 6
శామ్సంగ్ గేలాక్సీ వాచ్ 4(Samsung Galaxy Watch 4).. దీనిలో ఈసీజీ, రక్తపోటు, కొవ్వు శాతం, అస్థిపంజర కండరాలు, శరీరంలో నీటి శాతాన్ని కొలవడానికి ఉపయోగపడే బయోయాక్టివ్ సెన్సార్ ఉంటుంది. ఇది వర్కవుట్ సమయంలో మీ శరీరం ఎలా పనిచేస్తుందో కొలవగలుగుతుంది. 90 కంటే ఎక్కువ వ్యాయామాలకు మద్దతు ఇస్తుంది. రెస్ట్ సమయంలో హృదయ స్పందన స్థాయిని తనిఖీ చేస్తుంది. స్లీప్ కోచింగ్ ఫీచర్‌తో పాటు నిద్ర దశలను గుర్తించడానికి, విశ్లేషించడానికి వాచ్ స్లీప్ ట్రాకర్‌తో ఇది వస్తుంది. ఈ వాచ్ ధర అమెజాన్ లో రూ. 16,999 నుంచి ప్రారంభం అవుతుంది.
2 / 6
ఫిట్ బిట్ వెర్సా3 (Fitbit Versa 3).. ఈ వాచ్ మీ ఆరోగ్యం, ఫిట్‌నెస్‌ని ట్రాక్ చేయడానికి అనేక రకాల ఫీచర్‌లను కలిగి ఉంది. దీని డైలీ రెడీనెస్ స్కోర్ ఫంక్షన్ మీ శరీరం సవాలుతో కూడిన వ్యాయామానికి సిద్ధంగా ఉందా లేదా మీరు కోలుకోవడంపై దృష్టి పెట్టాల్సిన అవసరం ఉందా అని మీకు తెలియజేస్తుంది. ఇది హృదయ స్పందన రేటును ట్రాక్ చేస్తుంది. నిద్రపోతున్నప్పుడు సక్రమంగా లేని గుండె లయ లేదా కర్ణిక దడ సంకేతాలను గుర్తిస్తుంది. బ్యాటరీ ఆరు రోజుల కంటే ఎక్కువ ఉంటుంది. ఛార్జ్ చేయడానికి కేవలం 12 నిమిషాలు పడుతుంది. పీరియడ్ సైకిల్ ని గుర్తిస్తుంది. రోజువారీ ఒత్తిడిని ఎలా నిర్వహిస్తుందో తెలియజేస్తుంది. దీని ధర అమెజాన్ లో రూ. 18,899 నుంచి ప్రారంభమవుతుంది.
3 / 6
ప్లేఫిట్ స్లిమ్(Playfit Slim).. ఇది తక్కువ బడ్జెట్ లో దొరకే బెస్ట్ వాచ్. దీనిలో 1.28-అంగుళాల రౌండ్ ఫుల్-టచ్ ఐపీఎస్ ఎల్సీడీ స్క్రీన్, వాటర్, స్వెట్ రిసిస్టెన్స్, 24 ఎక్సర్ సైజ్ మోడ్స్, హార్ట్ రేట్ ట్రాకింగ్, ఫిట్‌నెస్ ట్రాకర్, స్లీప్, SPO2 మానిటర్, బ్లూటూత్ నోటిఫికేషన్ వంటి అధునాత ఫీచర్లు ఉన్నాయి. ఇందులో 180ఎంఏహెచ్ బ్యాటరీ ఉంటుంది. ఈ బ్యాటరీ 7 రోజుల వరకూ పనిచేస్తుంది. 15 రోజుల స్టాండ్‌బై టైమ్ గ్యారెంటీ ఉంది. దీని ధర అధికారిక వెబ్ సైట్ లో రూ. 2,999 నుంచి ప్రారంభమవుతుంది.
4 / 6
గార్మిన్ వేణు ఎస్క్యూ(Garmin Venu SQ).. దీనిలో హార్ట్ రేట్ మానిటర్, స్లీప్ ట్రాకింగ్, స్ట్రెస్ మానిటరింగ్ సామర్థ్యాలు ఉన్నాయి. ఇది మీరు పని చేయడానికి, విశ్రాంతి తీసుకోవడానికి ఉత్తమ సమయాలను గుర్తించడంలో సహాయపడుతుంది. పల్స్ ఆక్స్ సెన్సార్ 2 పగటిపూట, మీరు నిద్రపోతున్నప్పుడు మీ రక్త ఆక్సిజన్ స్థాయిలను విశ్లేషిస్తుంది. వాచ్ లో ప్రీ-లోడెడ్ వర్కౌట్‌లు, అంతర్నిర్మిత స్పోర్ట్స్ యాప్‌లు, వ్యక్తిగత రన్నింగ్ కోచ్‌తో వస్తుంది. ఈ వాచ్ ధర అధికారిక వెబ్ సైట్ లో రూ. 22,490 నుంచి ప్రారంభమైంది.
5 / 6
అమేజ్‌ఫిట్ జీటీఎస్ 2(Amazfit GTS 2).. ఇది 3డీ బెజెస్ లెస్ డిజైన్ తో వస్తోంది. అలాగే మ్యూజిక్ స్టోరేజ్, ప్లేబ్యాక్‌తో పాటు అమెజాన్ అలెక్సా అంతర్నిర్మితంతో వస్తుంది. ఇది హై-ప్రెసిషన్ బయోలాజికల్ ట్రాకింగ్ ఆప్టిమల్ సెన్సార్‌ను కలిగి ఉంది. తద్వారా ఆల్ రౌండ్ హెల్త్ ప్రొటెక్షన్‌ను అందిస్తుంది. పై హెల్త్ సిస్టమ్ అల్గారిథమ్‌ని ఉపయోగించి మీ హృదయ స్పందన రేటు, వ్యాయామ సమయం, ఇతర ఆరోగ్య సమాచారాన్ని గణిస్తుంది. స్లీప్ ట్రాకింగ్, స్ట్రెస్ మానిటరింగ్, ఆక్సిజన్ ట్రాకింగ్, వర్కౌట్ ట్రాకింగ్ వంటి ఫీచర్లు ఉన్నాయి. దీని ధర అధికారిక వెబ్ సైట్ లో రూ. 12,999 నుంచి ప్రారంభమవుతుంది.
