Anti-Ship Missile: ఎప్పుడైనా.. ఎక్కడైనా మేం సిద్ధం.. యాంటీ షిప్‌ మిసైల్స్‌ను పరీక్షించిన ఇండియన్‌ నేవీ!

పహల్గామ్ ఉగ్రవాద దాడి తర్వాత భారతదేశం, పాకిస్తాన్ మధ్య ఉద్రిక్తతలు తారా స్థాయికి చేరుకున్నాయి. ప్యాక్‌ వ్యతిరేకంగా భారత్‌ కీలక నిర్ణయాలు తీసుకుంది. పాకిస్థాన్‌తో ద్వైపాక్షిక ఒప్పందాలను కూడా రద్దు చేసింది. ఈ నేపథ్యంలో భారత దళాలను రెచ్చగొట్టే విధంగా పాక్‌ ప్రయత్నాలను సాగిస్తోంది. దీంతో సరిహద్దుల్లో సైనికులు అలర్ట్ అయ్యాయి. అయితే దాయాదీ దేశం ఏలాంటి ఎత్తులతో వచ్చినా ధీటుగా సమాధానమిచ్చేందుకు భారత్ త్రివిద దళాలు అప్రమత్తమవుతున్నాయి. ఈ క్రమంలో భారత నౌకాదళం అరేబియా సముద్రంలో యాంటీ-షిప్ మిసైల్ ప్రయోగాలను విజయవంతంగా నిర్వహించింది. యుద్ధ సన్నద్ధతలో భాగంగా అరేబియా సముద్రంలో యుద్ధ నౌకల నుంచి సుదీర్ఘ దూరాన లక్ష్యాలను ఖచ్చితంగా చేధించిది. దేశ ప్రయోజనాలను కాపాడేందుకు భారత నౌకాదళం యుద్ధానికి సిద్ధంగా ఉందని ఈ సందర్భంగా నేవీ స్పష్టం చేసింది. అరేబియా సముద్రం మధ్యలో యుద్ధనౌకల నుంచి చేపట్టిన బ్రహ్మోస్ యాంటీ-షిప్, యాంటీ-సర్ఫేస్ క్రూయిజ్ క్షిపణి ప్రయోగాలకు సంబంధించిన దృశ్యాలను ఇండియన్‌ నేవీ సోషల్‌ మీడియా వేదికగా  పంచుకుంది.

#IndianNavy Ships undertook successful multiple anti-ship firings to revalidate and demonstrate readiness of platforms, systems and crew for long range precision offensive strike.#IndianNavy stands #CombatReady #Credible and #FutureReady in safeguarding the nation’s maritime… pic.twitter.com/NWwSITBzKK

— SpokespersonNavy (@indiannavy) April 27, 2025

పాకిస్థాన్‌ చేసే దాడులను సమర్థవంతంగా తిప్పికొట్టేందుకు తాము సిద్ధమవుతున్నట్టు చూపించేందుకు భారత్‌ ఈ క్షిపణి ప్రయోగాన్ని చేపట్టింది. సముద్రజలాల్లో ఎప్పుడైనా, ఎక్కడైనా భారత ప్రయోజనాలను కాపాడేందుకు తాము సిద్దంగా ఉన్నట్టు ఇండియన్‌ నేవీ తెలిపింది . ఇదే కాకుండా ఇండియన్ నేవీ ఇటీవలే 70 కిలోమీటర్ల పరిధిలోని టార్గెట్లను ఛేదించగలిగిన మీడియం రేంజ్‌ సర్ఫేస్‌ టు ఎయిర్‌ మిసైల్‌(MR-SAM)ను పరీక్షించింది. ఈ సందర్భంగా గైడెడ్‌ మిసైల్‌ డెస్ట్రాయర్‌ అయిన ఐఎన్‌ఎస్‌ సూరత్‌ తొలిసారి గగనతలంలో వస్తున్న లక్ష్యాన్ని అత్యంత కచ్చితత్వంతో ఛేదించిందని భారత నౌకాదళం వెల్లడించింది.

మరిన్ని జాతీయ వార్తల కోసం ఇక్కడ క్లిక్ చేయండి..