పాక్ విన్నపాలనూ వింటాడా ? 23న పాక్ ప్రధాని ఇమ్రాన్‌తో ట్రంప్ భేటీ

అమెరికా అధ్యక్షుడు ట్రంప్… పాకిస్తాన్ ప్రధాని ఇమ్రాన్ ఖాన్ తో ఈ నెల 23 న భేటీ కానున్నారు. 22 (ఆదివారం) ప్రధాని మోదీ గౌరవార్థం హౌదీమోదీ పేరిట టెక్సాస్ లోని హూస్టన్ లో జరగనున్న మెగా ఈవెంట్ లో ఒకే వేదికను పంచుకోనున్న ఆయన.. ఆ మరుసటిరోజు ఇమ్రాన్ తో భేటీ కావడంపై రాజకీయవర్గాలు విస్మయం వ్యక్తం చేస్తున్నాయి. ఇప్పటివరకు ఇమ్రాన్ తో ట్రంప్ సమావేశం అవుతాడన్న విషయం బయటికి పొక్కలేదు. అయితే శనివారం ఈ విషయాన్ని అధికారికంగా ప్రకటించారు. జమ్మూ కాశ్మీర్ అంశంలో మోదీ ప్రభుత్వం అనుసరిస్తున్న ‘ కఠిన ‘ విధానాన్ని ఇమ్రాన్ ఆ సందర్భంగా ట్రంప్ కు విన్నవించవచ్చు.. భారత-పాకిస్తాన్ దేశాల మధ్య కాశ్మీర్ విషయంలో తలెత్తిన ప్రతిష్టంభన ను పరిష్కరించేందుకు అనువుగా జోక్యం చేసుకోవాలని కోరవచ్ఛు. (అయితే మూడో దేశ జోక్యాన్ని భారత్ నిర్ద్వంద్వం గా తోసిపుచ్ఛుతోంది).జోక్యానికి తాను రెడీ అని ట్రంప్ గతంలో పలుమార్లు ప్రకటించారు. అటు-హౌదీమోదీ ఈవెంట్ అనంతరం ట్రంప్ మళ్ళీ మంగళవారం న్యూయార్క్ లో మోదీతో సమావేశమవుతారు. ఐక్యరాజ్యసమితి సర్వ ప్రతినిధి సభ 74 వ సెషన్ ను పురస్కరించుకుని.. న్యూయార్క్ లోనే భారత, పాక్ ప్రధానులను ఆయన కలుసుకుంటారు. ఐరాస సభలో మోదీ, ఇమ్రాన్ ప్రసంగించనున్న విషయం తెలిసిందే. కాగా.. డోనాల్డ్ ట్రంప్ వీరిద్దరినీ కలుసుకుని మాటామంతీ కలిపిన అనంతరం ఓహియో పర్యటనకు వెళ్తారని అధికారవర్గాలు తెలిపాయి.