Jammu Kashmir: పుల్వామాలో బీహార్ కార్మికులపై ఉగ్రవాదుల గ్రెనేడ్ దాడి.. ఒకరు మృతి, ఇద్దరికి గాయాలు..
పుల్వామాలో కార్మికులపై ఉగ్రవాదులు గ్రెనేడ్ విసిరారు. ఈ ఉగ్రదాడిలో ఒక కార్మికుడు మృతి చెందగా.. మరో ఇద్దరు గాయపడ్డారు.
జమ్ముకశ్మీర్‌లోని పుల్వామాలో మరోసారి దాడికి పాల్పడ్డారు. ఇతర రాష్ట్రాల నుంచి వచ్చిన కూలీలపై ఉగ్రవాదులు దాడి చేశారు. పుల్వామాలోని గదూరా ప్రాంతంలో కార్మికులపై ఉగ్రవాదులు గ్రెనేడ్ విసిరారు. ఈ ఉగ్రదాడిలో ఒక కార్మికుడు మృతి చెందగా, మరో ఇద్దరు గాయపడ్డారు. ఈ మేరకు జమ్ముకశ్మీర్‌ పోలీసులు వెల్లడించారు. పోలీసులు ఆ ప్రాంతాన్ని చుట్టుముట్టారు. మృతుడు బీహార్‌లోని సక్వా పర్సా నివాసి మహ్మద్ ముంతాజ్‌గా గుర్తించారు. గాయపడిన వారిని బీహార్‌లోని రాంపూర్‌కు చెందిన మహ్మద్ ఆరిఫ్, మహ్మద్ మజ్‌బూల్‌గా గుర్తించారు. ఇద్దరూ స్థిరంగా ఉన్నారని జమ్ముకశ్మీర్‌ పోలీసులు తెలిపారు. ఈ సంవత్సరం ప్రారంభంలో ఉగ్రవాదులు స్థానికేతర కార్మికులపై దాడులను పెంచారు. అయితే గత రెండు నెలలుగా ఇటువంటి లక్ష్య హత్యలు తగ్గుముఖం పట్టాయి.
పోలీసు బృందంపై కూడా దాడి..
మూడు రోజుల్లో జమ్ముకశ్మీర్‌లో ఉగ్రవాదులు జరిపిన మూడో దాడి ఇది. అయితే అంతకుముందు జరిగిన దాడుల్లో ఎలాంటి ప్రాణనష్టం జరగలేదు. అంతకుముందు రోజు, జమ్ముకశ్మీర్‌లోని అలోచిబాగ్ ప్రాంతంలో ఉగ్రవాదులు పోలీసు పార్టీపై కూడా దాడి చేశారు. అయితే వారు ప్రతీకారం తీర్చుకున్న తర్వాత పారిపోయారు. ఇందులో ఎలాంటి ప్రాణనష్టం జరగలేదు. మంగళవారం కూడా జమ్ముకశ్మీర్‌లోని రాంబన్ జిల్లాలోని పోలీసు పోస్టుపై ఉగ్రవాదులు గ్రెనేడ్ విసిరారు.
గ్రెనేడ్ పోలీసు పోస్టు పైకప్పుపై పడి పేలింది. ఈ దాడిలో ఎలాంటి ప్రాణనష్టం జరగలేదు. రాంబన్ జిల్లాలో జరిగిన దాడికి సంబంధించి అడిషనల్ డైరెక్టర్ జనరల్ ఆఫ్ పోలీస్ ముఖేష్ సింగ్ మాట్లాడుతూ జమ్ముకశ్మీర్‌ గజ్నవి ఫోర్స్ (JKGF) దాడికి బాధ్యత వహించిందని వెల్లడించారు. స్పెషల్ ఆపరేషన్స్ గ్రూప్ (SOG) పార్టీలు, సైన్యం ఆ ప్రాంతాన్ని చుట్టుముట్టడం ద్వారా సెర్చ్ ఆపరేషన్ ప్రారంభించాయి. ఈ మేరకు జిల్లావ్యాప్తంగా అప్రమత్తమై కేసు నమోదు చేశారు.
మరిన్ని జాతీయ వార్తల కోసం
