కలవరపెడుతున్న వరుస ప్రసూతి మరణాలు.. మరో ఇద్దరు మహిళల మృతి.. సర్కార్ అలర్ట్!

రాజస్థాన్‌లో ఇటీవల వరుసగా నమోదవుతున్న ప్రసూతి మరణాలు రాష్ట్రవ్యాప్తంగా ఆందోళనకు గురిచేస్తున్నాయి. జోధ్‌పూర్‌లో చికిత్స పొందుతూ మరో ఇద్దరు మహిళలు మరణించడంతో ఈ అంశం మరోసారి చర్చనీయాంశమైంది. ఈ ఘటనల నేపథ్యంలో ప్రసూతి అనంతర ఆరోగ్య సంరక్షణ, అత్యవసర వైద్య సేవలు, ప్రభుత్వ ఆసుపత్రుల్లో అమలవుతున్న చికిత్సా విధానాలపై ప్రశ్నలు తలెత్తుతున్నాయి. మరోవైపు, వైద్య నిపుణులు మాత్రం ప్రసవానంతర సమస్యలను ప్రారంభ దశలోనే గుర్తించి వెంటనే చికిత్స అందిస్తే చాలా మంది మహిళల ప్రాణాలను కాపాడవచ్చని స్పష్టం చేస్తున్నారు.

జోధ్‌పూర్ సమీపంలోని తిన్వారీ ప్రాంతానికి చెందిన సాము అనే మహిళ జూన్ 24న సాధారణ ప్రసవం ద్వారా ఆడబిడ్డకు జన్మనిచ్చింది. అయితే ప్రసవం అనంతరం ఆమెకు తీవ్ర రక్తస్రావం కావడంతో తొలుత ఉమైద్ ఆసుపత్రికి, అనంతరం మహాత్మా గాంధీ ఆసుపత్రికి తరలించారు. రక్తస్రావాన్ని నియంత్రించేందుకు వైద్యులు ఆమె గర్భాశయాన్ని తొలగించినప్పటికీ, అప్పటికే అధిక రక్తనష్టం కారణంగా మూత్రపిండాలు సహా కీలక అవయవాలు దెబ్బతిన్నాయి. వెంటిలేటర్, డయాలసిస్‌పై 25 రోజులపాటు చికిత్స అందించినా ఆమె ఆదివారం రాత్రి మృతి చెందింది.

ఈ ఘటనపై స్పందించిన మెడికల్ కాలేజీ ప్రిన్సిపాల్ డాక్టర్ బి.ఎస్. జోధా మాట్లాడుతూ, ప్రసూతి అనంతర మరణాలకు ప్రధాన కారణాలు అధిక రక్తస్రావం, అధిక రక్తపోటు, రక్తహీనత, తీవ్రమైన ఇన్ఫెక్షన్లేనని తెలిపారు. ప్రసవం తర్వాత మొదటి రెండు నుంచి మూడు గంటలు అత్యంత కీలకమైనవని, ఈ సమయంలో సమస్యలను గుర్తించి ప్రత్యేక వైద్య కేంద్రానికి తరలిస్తే చాలా సందర్భాల్లో ప్రాణాపాయం తప్పించవచ్చని చెప్పారు. చికిత్సలో జాప్యం జరిగితే కోలుకోలేని షాక్‌కు గురై మూత్రపిండాలు, కాలేయం, ఊపిరితిత్తులు, గుండె వంటి కీలక అవయవాలు దెబ్బతింటాయని వివరించారు.

ఇటీవల నమోదైన కేసుల్లో ఒక గర్భిణీ చికిత్స పొందుతూ మరణించగా, మరో మహిళ ఆసుపత్రికి చేరుకునేలోపే ప్రాణాలు కోల్పోయినట్లు వైద్యులు వెల్లడించారు. ప్రస్తుతం మహాత్మా గాంధీ ఆసుపత్రిలో ఇద్దరు, ఉమైద్ ఆసుపత్రిలో మరో ఇద్దరు గర్భిణీలు చికిత్స పొందుతున్నారని, వారి ఆరోగ్య పరిస్థితి నిలకడగా ఉందని వైద్య బృందం తెలిపింది. రోగుల ఆరోగ్య పరిస్థితిని నిపుణుల బృందం నిరంతరం పర్యవేక్షిస్తున్నట్లు పేర్కొంది.

ఈ వరుస ఘటనల నేపథ్యంలో రాష్ట్ర ప్రభుత్వం అప్రమత్తమైంది. ప్రసూతి గదులు, ఆపరేషన్ థియేటర్లలో ప్రామాణిక కార్యాచరణ విధానాలను (SOP) కచ్చితంగా అమలు చేయాలని ఆసుపత్రులకు ఆదేశాలు జారీ చేసింది. అలాగే ప్రభుత్వ ప్రధాన కార్యదర్శి అధ్యక్షతన ప్రతిరోజూ రాష్ట్రస్థాయి సమీక్షా సమావేశాలు నిర్వహిస్తూ, ప్రతి ప్రసూతి మరణంపై సమగ్ర దర్యాప్తు చేపడుతున్నట్లు అధికారులు వెల్లడించారు.

వైద్య నిపుణులు గర్భిణీలు గర్భధారణ కాలమంతా క్రమం తప్పకుండా ఆరోగ్య పరీక్షలు చేయించుకోవాలని సూచిస్తున్నారు. ముఖ్యంగా రక్తపోటు, హిమోగ్లోబిన్ స్థాయిలను నిరంతరం పరిశీలించుకోవడం, ప్రసవానంతరం అధిక రక్తస్రావం, జ్వరం, శ్వాస తీసుకోవడంలో ఇబ్బంది వంటి లక్షణాలు కనిపిస్తే ఏమాత్రం ఆలస్యం చేయకుండా సమీపంలోని ప్రత్యేక వైద్య కేంద్రాన్ని సంప్రదించాలని సూచించారు. సరైన సమయంలో చికిత్స పొందడం ద్వారా ప్రసూతి మరణాలను గణనీయంగా తగ్గించే అవకాశం ఉందని వైద్యులు స్పష్టం చేస్తున్నారు.

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..