Covishield: కోవిడ్ టీకా గ్యాప్‌పై నిపుణులు ప్యానెల్ సిఫార్సులు… త్వరలోనే కేంద్రం అధికారిక ప్రకటన.!!

Covishield Vaccine

Covishield Doses Gap Increase: దేశంలో కరోనా సెకండ్ వేవ్ వేగంగా వ్యాప్తి చెందుతోంది. ఈ విపత్కర సమయంలో ఎప్పుడు ఏ దుర్వార్త వినాలో అని ప్రజలు ఆందోళన చెందుతున్నారు. ఇదిలా ఉంటే కరోనాను నివారించే మార్గాల్లో ఒకటి వ్యాక్సినేషన్. ఇందులో భాగంగానే దేశవ్యాప్తంగా వ్యాక్సినేషన్ ప్రక్రియ వేగవంతంగా కొనసాగుతోంది. అందరూ కూడా తప్పనిసరిగా వ్యాక్సిన్ తీసుకోవాలని కేంద్రం సూచించింది.

ఇదిలా ఉంటే రాబోయే రోజుల్లో అడ్వైజరీ బృందం సిఫార్సు మేరకు టీకా ప్రోటోకాల్స్‌లో పలు మార్పులు జరిగే అవకాశం ఉందని తెలుస్తోంది. ప్రస్తుతం కోవిషీల్డ్ రెండో డోసును 6 నుంచి 8 వారాల్లో ఇస్తుండగా.. ఇప్పుడు ఆ గడువు 12-16 వారాలకు పొడిగించే అవకాశం ఉంది. అటు గర్భిణీ స్త్రీలు కూడా వ్యాక్సిన్ తీసుకునేందుకు అనుమతి లభించవచ్చునని తెలుస్తోంది. ఇక ఈ కొత్త రూల్స్ కేవలం కోవిషీల్డ్ వ్యాక్సిన్‌కు మాత్రమే వర్తించనున్నాయి. కొవాగ్జిన్‌ వ్యవధిలో మాత్రం ఎటువంటి మార్పులను సూచించలేదు.

నేషనల్ టెక్నికల్ అడ్వైజరీ గ్రూప్ ఆన్ ఇమ్యూనైజేషన్ (ఎన్‌టిఎజిఐ) కోవిషీల్డ్ వ్యాక్సిన్‌కు సంబంధించి కొన్ని ముఖ్యమైన సిఫార్సులు చేసింది. కోవిడ్ సోకిన రోగులకు కోలుకున్న ఆరు నెలల తర్వాత టీకాలు ఇవ్వాలని సూచిస్తోంది. త్వరలోనే దీనిపై ఆరోగ్య మంత్రిత్వ శాఖ అధికారిక ప్రకటన చేసే అవకాశం ఉంది.

ప్రక్రియ ఎలా సాగుతుంది..?

మొదటిగా NTAGI సిఫార్సులు నేషనల్ ఎక్స్‌పర్ట్ గ్రూప్ ఆఫ్ వ్యాక్సిన్ అడ్మినిస్ట్రేషన్‌ ఆన్ కోవిడ్ 19 బృందానికి పంపబడుతుంది. అనంతరం నిపుణుల బృందం తన సిఫార్సులను ఆరోగ్య మంత్రిత్వ శాఖ ఆమోదం కోసం పంపుతుంది. ఈ మొత్తం ప్రక్రియ పూర్తి కావడానికి 1 నుండి 2 రోజులు పట్టవచ్చు.

సమర్థవంతమైన టీకా కోసం NTAGI చేసిన సిఫార్సులు ఇవే..

• కరోనా రోగులకు కోలుకున్న ఆరు నెలల తర్వాత టీకాలు వేయాలి. ప్రస్తుతం, కోలుకున్న రోగులకు 14 రోజుల తర్వాత మొదటి డోస్ ఇస్తున్నారు. ఆరు నెలల తర్వాత టీకాలు ఇచ్చినట్లయితే.. శరీరంలో ఉత్పత్తి అయ్యే సహజమైన యాంటీబాడీల కార్యాచరణను పెంచే అవకాశం ఉంటుందని నిపుణులు భావిస్తున్నారు.
• వ్యాక్సిన్ మొదటి మోతాదు ఇచ్చిన తర్వాత కరోనా సోకితే.. వారికి కోలుకున్న 4-8 వారాల తర్వాత రెండవ మోతాదు ఇవ్వాలి. ప్రస్తుతం, ఈ రోగులకు కోలుకున్న 14 రోజుల తర్వాత రెండవ డోస్ ఇస్తున్నారు.
• చికిత్స సమయంలో ప్లాస్మా థెరపీ చేసిన రోగులకు కోలుకున్న 12 వారాల తర్వాత వ్యాక్సిన్ ఇవ్వాలి. ప్రస్తుతం, ఈ పేషెంట్స్‌కు నిర్దిష్ట నియమం అంటూ ఏం లేదు. కోలుకున్న 14 రోజుల తర్వాత వ్యాక్సిన్ మొదటి షాట్ ఇస్తున్నారు.
• ఇతర దీర్ఘకాలిక రోగాల కారణంగా ఆసుపత్రిలో చేరిన వారికి కోలుకున్న 4 నుంచి 8 వారాల తర్వాత టీకా ఇవ్వాలి. ప్రస్తుతం, ఈ రోగులకు ప్రత్యేక ప్రోటోకాల్ లేదు. దుష్ప్రభావాలు లేకుండా ఉండాలంటే వ్యాక్సిన్‌కు గ్యాప్ తప్పనిసరి అంటున్నారు.
• టీకా వేయించుకునే ముందు ర్యాపిడ్ యాంటిజెన్ టెస్ట్ అవసరం లేదు.
• కోవిషీల్డ్ వ్యాక్సిన్ రెండు డోసుల మధ్య గ్యాప్‌ను 12-16 వారాలకు పెంచాలి. ప్రస్తుతం, 4-8 వారాల మధ్య రెండు డోస్ ఇస్తుండగా.. లాన్సెట్ అధ్యయనం ప్రకారం, 12 వారాల విరామం ఉంటే టీకా ప్రభావాన్ని 81.3% పెంచుతుందని తెలుస్తోంది. ఈ ప్రోటోకాల్ బ్రిటన్‌లో అనుసరిస్తున్నారు.
• గర్భిణీ స్త్రీలకు యాంటినెటల్ సెంటర్లలో టీకాలకు సంబంధించిన లాభాలు, నష్టాలు గురించి తెలియజేయాలి. సైడ్ ఎఫెక్ట్స్‌పై ఒక బుక్‌లెట్ వారికి అందించాలి. వారికి టీకా వేసేలా ప్రణాళికలు సిద్దం చేయాలి. పాలిచ్చే తల్లులు డెలివరీ తర్వాత ఎప్పుడైనా వ్యాక్సిన్ తీసుకోవచ్చునని తెలిపింది.

Also Read:

 షాకింగ్ యాక్సిడెంట్.. గాల్లో ఎగిరిన బైక్‌రైడర్‌.. ఒళ్లుగగుర్పొడిచే వీడియో..!

వాట్సాప్‏లో సీక్రెట్ చాట్ దాచుకోండిలా.. సరికొత్త సర్వీస్ అందుబాటులోకి.. వివరాలు ఇవే.!

గగుర్పాటుకు గురిచేసే వీడియో.. పక్షి గూటిలోకి భారీ పైథాన్.. ఆ తర్వాత ఏం జరిగిందంటే.!

డేంజరస్ స్టంట్స్ చేసిన కోతి.. పులులకు గట్టి షాక్.. నవ్వులు పూయిస్తున్న వీడియో.!