మార్కెట్లో కొత్త ట్రెండ్! ఉద్యోగం బోర్ కొడుతున్నా వదలడం లేదా? ‘జాబ్ హగ్గింగ్’ భయం
పోస్ట్-పాండమిక్ కాలంలో 'జాబ్ హాపింగ్' (తరచుగా ఉద్యోగాలు మారడం) అనేది ఒక గొప్ప విషయంగా ఉండేది. కానీ ఇప్పుడు పరిస్థితి మారింది. ఆర్థిక అనిశ్చితి, నియామకాలు మందగించడం వంటి కారణాల వల్ల ఉద్యోగులు రిస్క్ తీసుకోవడానికి భయపడుతున్నారు. సంతోషం లేకపోయినా సరే, నెల నెలా వచ్చే జీతం ముఖ్యం అని భావించి పాత ఉద్యోగాల్లోనే ఉండిపోవడాన్నే 'జాబ్ హగ్గింగ్' అంటారు.
కార్పొరేట్ ప్రపంచంలో ఎప్పటికప్పుడు కొత్త కొత్త ట్రెండ్లు పుట్టుకొస్తుంటాయి. గతంలో మనం ‘క్వైట్ క్విట్టింగ్’ (నిశ్శబ్దంగా తప్పుకోవడం), ‘బేర్ మినిమమ్ మండేస్’ వంటి పదాలను విన్నాం. ఇప్పుడు తాజాగా ఉద్యోగ వర్గాల్లో బాగా వినిపిస్తున్న మరో ఆసక్తికరమైన పదం జాబ్ హగ్గింగ్. అంటే చేస్తున్న పనిలో సంతోషం లేకపోయినా, ఎదుగుదల లేకపోయినా.. కేవలం భద్రత కోసం ఆ ఉద్యోగాన్ని గట్టిగా హత్తుకుని ఉండిపోవడం. ఈ కొత్త ట్రెండ్ వెనుక ఉన్న కారణాలు, దాని వల్ల కలిగే లాభనష్టాల గురించి వివరంగా తెలుసుకుందాం.
ఎందుకీ పరిస్థితి?
హైరింగ్ ప్రక్రియ 2013 తర్వాత అత్యంత తక్కువ స్థాయికి చేరుకుంది. దీనికి తోడు ఆర్టిఫిషియల్ ఇంటెలిజెన్స్ (AI) మరియు ఆటోమేషన్ వల్ల తమ ఉద్యోగాలు ఎక్కడ పోతాయో అనే ఆందోళన ఉద్యోగుల్లో పెరిగింది. మాన్స్టర్స్ 2025 రిపోర్ట్ ప్రకారం.. సుమారు 75 శాతం మంది ఉద్యోగులు 2027 వరకు తమ ప్రస్తుత ఉద్యోగాల్లోనే ఉండాలని భావిస్తున్నారు. ఇందులో 48 శాతం మంది కేవలం భయం వల్లే ఉండిపోతున్నారు తప్ప, ఉద్యోగ సంతృప్తి వల్ల కాదు.
పైకి ఇది సురక్షితంగా అనిపించినప్పటికీ, ఇందులో కొన్ని ప్రమాదాలు ఉన్నాయి. కొత్త సవాళ్లు లేని చోట ఎక్కువ కాలం ఉండటం వల్ల మీ నైపుణ్యాలు మరుగున పడిపోతాయి. ఎదుగుదల లేని ఉద్యోగంలో ఉండటం వల్ల మెంటల్ బర్న్-అవుట్ అయ్యే అవకాశం ఉంది. ఉత్సాహం లేని ఉద్యోగుల వల్ల కంపెనీల్లో సృజనాత్మకత, కొత్త ఆవిష్కరణలు తగ్గిపోతాయి. కేవలం ఉద్యోగులే కాదు, కంపెనీలు కూడా తమ అనుభవజ్ఞులైన సిబ్బందిని వదులుకోవడానికి ఇష్టపడటం లేదు. గతంలో ‘గ్రేట్ రెసిగ్నేషన్’ సమయంలో టాలెంట్ ఉన్న వ్యక్తులు దొరకక ఇబ్బంది పడటంతో, ఇప్పుడు కంపెనీలు కూడా తమ ఉద్యోగులను గట్టిగా పట్టుకుంటున్నాయి.
ఎలా చేయాలి?
ఒకే చోట ఉండిపోవడం అంటే అక్కడే ఆగిపోవడం కాదు. ‘పివోటింగ్ ఇన్ ప్లేస్’ అనే పద్ధతిని అనుసరించాలని కెరీర్ కోచ్లు సూచిస్తున్నారు. చేస్తున్న కంపెనీలోనే కొత్త ప్రాజెక్టులు తీసుకోవడం లేదా ఇతర విభాగాలతో కలిసి పనిచేయడం ద్వారా స్కిల్స్ పెంచుకోవాలి. భవిష్యత్తులో మంచి అవకాశాలు వచ్చినప్పుడు సిద్ధంగా ఉండటానికి మెంటర్లు, ఇతర కంపెనీల నిపుణులతో పరిచయాలు పెంచుకోవాలి. భద్రత కోసం ఒకే చోట ఉండటం తప్పు కాదు, కానీ ఆ క్రమంలో మీ వ్యక్తిగత ఎదుగుదలను నిర్లక్ష్యం చేయకండి. మీ నైపుణ్యాలను ఎప్పటికప్పుడు అప్డేట్ చేసుకుంటూ ఉంటేనే, మార్కెట్ మళ్ళీ పుంజుకున్నప్పుడు మీరు ముందు వరుసలో ఉంటారు.