పోపు వేసేటప్పుడు నూనె చిట్లి పడుతోందా? ఈ చిన్న చిట్కాతో సమస్యకు చెక్ పెట్టండి!
మనందరి వంటిళ్లలో తాలింపు అనేది తప్పనిసరి.. ఈ తాళింపుకు ఉన్న ప్రాధాన్యత ప్రత్యేకమైనది. పప్పు, కూరలు, చారు లేదా పచ్చళ్లు.. ఏ వంటకమైనా చివరిగా కమ్మటి పోపు వేస్తేనే దానికి పూర్తి రుచి, సువాసన వస్తాయి. అయితే, కాగుతున్న నూనెలో ఆవాలు, జీలకర్ర, మినపప్పు లేదా కరివేపాకు వేయగానే నూనె చిట్లి చేతుల మీద, ముఖం మీద పడటం లేదా స్టవ్ చుట్టూ జిడ్డుగా మారడం మన నిత్య జీవితంలో ఎదురయ్యే పెద్ద సమస్య. ఈ చిన్న ఇబ్బందిని అధిగమించడానికి ఒక అద్భుతమైన కిచెన్ హ్యాక్ అందుబాటులో ఉంది.
Updated on: Aug 15, 2026 | 6:58 PM
వంటింట్లో పోపు వేసే సమయంలో నూనె చిట్లి శరీరం లేదా స్టవ్ చుట్టూ పడటం సాధారణంగా జరిగే ఇబ్బంది. ఈ సమస్యను నివారించడానికి ఒక సులువైన కిచెన్ హ్యాక్ ఎంతగానో ఉపయోగపడుతుంది. ఈ చిన్న చిట్కా మీ వంట పనిని సురక్షితంగా, సులువుగా మారుస్తుంది. అదేంటంటే..
నూనె చిట్లడానికి అసలు కారణం ఏమిటి?:
నూనెలో తేమ చేరినప్పుడు లేదా మనం తాలింపు కోసం వాడే కరివేపాకు, పచ్చిమిర్చి వంటి వాటిలో నీటి చుక్కలు ఉన్నప్పుడు, అధిక వేడి వద్ద నూనె, నీరు చర్య జరిపి బాణలి నుంచి బయటకు చిట్లుతాయి. దీనికి చెక్ పెట్టేందుకు సింపుల్ కిచెన్ హ్యాక్ అద్భుతంగా పనిచేస్తుంది. అది ఉప్పు లేదా పసుపు చిట్కా. అది ఎలాగంటే..
పోపు వేసే సమయంలో నూనె చిట్లకుండా ఉండటానికి ఈ చిన్న చిట్కా పాటించండి. బాణలిలో నూనె పోసి బాగా వేడెక్కిన తర్వాత, అందులో ఆవాలు లేదా కరివేపాకు వేయడానికి ముందే ఒక చిటికెడు ఉప్పు లేదా పసుపు వేయాలి. ఉప్పు లేదా పసుపు నూనెలో వేయగానే, నూనెలో ఉన్న తేమను అవి పీల్చుకుంటాయి. ఫలితంగా నూనె వేడి సమతుల్యంగా మారి, పోపు దినుసులు వేసినప్పుడు నూనె చుక్కలు పైకి ఎగసిపడవు.
పోపు వేసేటప్పుడు పాటించాల్సిన మరికొన్ని జాగ్రత్తలు:
కరివేపాకు, పచ్చిమిర్చి పొడిగా ఉంచడం: తాలింపులో వేసే కరివేపాకు లేదా పచ్చిమిర్చిలను కడిగిన తర్వాత పొడి గుడ్డతో బాగా తుడిచి, తేమ లేకుండా చూసుకున్నాకే నూనెలో వేయాలి.
కడాయి తడి లేకుండా చూసుకోవడం: నూనె పోసే ముందే బాణలి లేదా మూకుడు పూర్తిగా పొడిగా ఉందో లేదో సరిచూసుకోవాలి.
సిమ్లో ఉంచి వేయడం: పోపు దినుసులు వేసే సమయంలో మంటను సిమ్లో ఉంచడం వల్ల నూనె శరీరంపై పడే ప్రమాదం తప్పుతుంది.
