మైగ్రేన్ వల్ల స్ట్రోక్ వచ్చే ప్రమాదం ఉందా..? ఈ లక్షణాలు ఉంటే నిర్లక్ష్యం చేయకండి
మైగ్రేన్ను సాధారణ తలనొప్పిగా తీసుకోకుండా జాగ్రత్తగా గమనించడం అవసరం. తాజా పరిశోధనలు దీని వెనుక గుండె ఆరోగ్యానికి సంబంధించిన సంబంధం ఉండవచ్చని సూచిస్తున్నాయి. సరైన జీవనశైలి, సమయానికి చికిత్స, జాగ్రత్తలు తీసుకుంటే ఈ సమస్యను చాలా వరకు నియంత్రించవచ్చు. ఈ కింది లక్షణాలు కనిపిస్తే వెంటనే వైద్యుడిని సంప్రదించడం మంచిది..
Updated on: Jun 12, 2026 | 8:58 PM
ఇటీవలి కాలంలో మైగ్రేన్ సమస్యతో బాధపడుతున్న వారి సంఖ్య పెరుగుతోంది. చాలా మంది దీనిని సాధారణ తలనొప్పిగా భావించి నిర్లక్ష్యం చేస్తున్నారు. అయితే కొత్త పరిశోధనలు మైగ్రేన్లు కేవలం తలనొప్పి మాత్రమే కాకుండా, గుండె ఆరోగ్యంపై కూడా ప్రభావం చూపవచ్చని సూచిస్తున్నాయి. స్ప్రింగర్ నేచర్ ప్రచురించిన ఒక తాజా అధ్యయనం ప్రకారం.. తరచుగా మైగ్రేన్లతో బాధపడేవారికి గుండె జబ్బులు వచ్చే ప్రమాదం ఎక్కువగా ఉండే అవకాశం ఉంది. ముఖ్యంగా గుండె సంబంధ వ్యాధులు, కరోనరీ హార్ట్ డిసీజ్, ఇస్కీమిక్ స్ట్రోక్ వంటి సమస్యలతో సంబంధం ఉండొచ్చని పరిశోధకులు గుర్తించారు.
మైగ్రేన్ అంటే ఏమిటి?
మైగ్రేన్ అనేది తీవ్రమైన తలనొప్పి సమస్య. ఇది సాధారణంగా కింది లక్షణాలతో కనిపిస్తుంది:
- తీవ్రమైన తలనొప్పి
- వికారం, వాంతులు
- కాంతి లేదా శబ్దానికి అధిక సున్నితత్వం
- రోజువారీ పనుల్లో ఇబ్బంది
తాజా అధ్యయనం ఏమి వెల్లడించింది?
పరిశోధనల్లో మైగ్రేన్లతో బాధపడేవారికి గుండె సంబంధ వ్యాధుల ప్రమాదం ఎక్కువగా ఉండవచ్చని తేలింది. హృదయ సంబంధ వ్యాధులు వచ్చే అవకాశం ఎక్కువ, కరోనరీ హార్ట్ డిసీజ్ ప్రమాదం పెరుగుతుంది, ఇస్కీమిక్ స్ట్రోక్ వచ్చే అవకాశం కూడా ఉంటుంది. 45 ఏళ్ల లోపు మహిళల్లో ఈ ప్రభావం మరింత స్పష్టంగా కనిపించింది. అలాగే ధూమపానం, ఊబకాయం, అధిక రక్తపోటు వంటి ప్రమాద కారకాలు ఉన్నవారిలో ఈ రిస్క్ మరింత పెరుగుతుందని అధ్యయనం చెబుతోంది.
ఈ లక్షణాలను నిర్లక్ష్యం చేయకండి..
- అకస్మాత్తుగా తీవ్రమైన తలనొప్పి
- మాట్లాడటంలో ఇబ్బంది
- శరీరంలో ఒక వైపు బలహీనత
- తల తిరగడం
- దృష్టి మసకబారడం
- స్పృహ కోల్పోవడం
మైగ్రేన్ను ఎలా నియంత్రించాలి?
మైగ్రేన్లను పూర్తిగా నివారించడం కష్టం అయినప్పటికీ, కొన్ని జీవనశైలి మార్పులతో వాటిని నియంత్రించవచ్చు. తగినంత నిద్రపోవడం, ఒత్తిడిని తగ్గించుకోవడం, క్రమబద్ధమైన జీవనశైలి పాటించడం, ట్రిగర్ ఆహారాలను గుర్తించి దూరంగా ఉండడం, తగినంత నీళ్లు తాగడం, సమతుల్య ఆహారం తీసుకోవడం, డాక్టర్లు సూచించిన మందులు మాత్రమే వాడటం.
