పిల్లలకు మంచి అలవాట్లు నేర్పే టైం ఇదే..! లేకుంటే దారి తప్పుతారు..!

పిల్లలు చిన్న వయస్సులో ఉన్నప్పుడు వారు తమ చుట్టూ ఉన్న ప్రపంచాన్ని తెలుసుకోవడంలో బిజీగా ఉంటారు. అయితే వారు 7-8 సంవత్సరాల వయస్సులోకి వచ్చేటప్పుడు వారి ఆలోచనలు, ప్రవర్తన, అభిరుచులు, ఆకాంక్షలు అన్నీ మారిపోతుంటాయి. ఈ వయస్సు నుంచే వారి వ్యక్తిత్వ వికాసానికి పునాది పడుతుంది. అందుకే తల్లిదండ్రులు ఈ సమయంలో ఎంతో జాగ్రత్తగా పిల్లల్ని గమనించాలి, సానుకూలంగా మార్గనిర్దేశనం చేయాలి. ఈ వయస్సులో పిల్లలకు కొన్ని ముఖ్యమైన విషయాలను నేర్పించడం చాలా అవసరం.

చిన్నపిల్లలకు ఎప్పుడెప్పుడు ఎలా మాట్లాడాలో స్పష్టంగా తెలియదు. అందువల్ల వారు కొన్ని సందర్భాల్లో మితిమీరిన మాటలు మాట్లాడే అవకాశముంటుంది. పిల్లలకు మొదటిగా గౌరవంగా ఎలా మాట్లాడాలో, పెద్దలను ఎలా సంభోధించాలో నేర్పాలి. పాఠశాలలో గురువులకి, ఇంట్లో తాతలకి, మామలకి ఎలా గౌరవం ఇవ్వాలో చెప్పాలి. ఈ విధంగా వారు మానవీయ సంబంధాలలో మర్యాదగా వ్యవహరించటం నేర్చుకుంటారు.

ఈ వయస్సులో పిల్లలు చిన్నచిన్నగా డబ్బును ఖర్చు చేయడం మొదలుపెడతారు. అవసరములేని వస్తువులు కొనాలనుకుంటారు. ఈ సమయంలో తల్లిదండ్రులు వారికి డబ్బు విలువ నేర్పించాలి. డబ్బును సరైన విధంగా ఖర్చు చేయడం, అవసరం ఉన్నప్పుడు మాత్రమే ఖర్చు చేయడం వంటి విషయాల్లో అవగాహన కల్పించాలి.

ఈ రోజుల్లో టెక్నాలజీ అతి తక్కువ వయస్సులోనే పిల్లల జీవితంలో ప్రవేశిస్తోంది. మొబైల్, టాబ్లెట్, ల్యాప్‌టాప్‌ల వాడకం పెరుగుతోంది. పిల్లలు సోషల్ మీడియా ప్లాట్‌ఫాంలు వాడే అవకాశం ఉంటుంది. అందుకే వారు ఏవేమి చూస్తున్నారు, ఎవరితో కమ్యూనికేట్ చేస్తున్నారు అనే విషయాలపై తల్లిదండ్రులు జాగ్రత్త వహించాలి. మంచి విషయాలు, చెడు విషయాల మధ్య తేడా వారికి తెలిసేలా వివరించాలి.

పిల్లలు చిన్న వయస్సులోనే తమ పనిని తాము చేయడం నేర్చుకుంటే.. వారు జీవితంలో స్వతంత్రంగా ఎదుగుతారు. ఉదాహరణకు.. బట్టలు శుభ్రం చేసుకోవడం, స్కూల్ బ్యాగ్ సిద్ధం చేయడం, భోజనం తినే సమయాన్ని గుర్తుపెట్టుకోవడం వంటి పనులు తామే చేయాలి. ఇది వారిలో సమయపాలన, బాధ్యత అనే భావనలను పెంపొందించుతుంది.

పిల్లలు తమ కుటుంబ సభ్యుల్ని, స్నేహితుల్ని, గురువుల్ని గౌరవంగా చూసేలా అలవాటు చేయండి. ఇతరుల మనసును గెలవడం ఎలా అనే దానిపై వారితో సంభాషించండి. సహనం, వినయం, సహకారం వంటి గుణాలను పెంపొందించేందుకు మీరు వారికి మంచి ఉదాహరణ కావాలి.

పిల్లల పెరుగుదల అనేది తల్లిదండ్రులపై చాలా ఎక్కువగా ఆధారపడి ఉంటుంది. పాఠశాలలు బోధన ఇస్తే తల్లిదండ్రులు జీవిత పాఠాలు నేర్పాలి. ప్రేమతో, సహనంతో పిల్లల ప్రవర్తనను గమనించండి. అవసరమైన దిశలో వారిని నడిపించండి. ఒక సారి మీరు మంచి మార్గనిర్దేశకులైతే వారు మంచి వ్యక్తులుగా ఎదుగుతారు.