బ్యాంకింగ్‌లో GenZలు ఎటు..! ట్రెడిషనల్ బ్యాంకింగ్స్‌లో మారుతున్న ట్రెండ్స్

ప్రస్తుత కాలంలో ప్రతి రంగం టెక్నాలజీతో ముడిపడి ఉంది. ముఖ్యంగా కొత్త తరం (జెన్ జీ) ప్రతి విషయంలోనూ వేగాన్ని, సౌకర్యాన్ని కోరుకుంటున్నారు. ఈ ప్రభావం ఇప్పుడు బ్యాంకింగ్ రంగంపై స్పష్టంగా కనిపిస్తోంది. పాత తరం వారు తమ జీవితకాలం మొత్తం ఒకే బ్యాంకులో ఖాతాను కలిగి ఉండటాన్ని భద్రతగా భావిస్తే, నేటి యువత మాత్రం తమ అవసరాలకు తగ్గట్టుగా బ్యాంకులు మారడానికి ఏమాత్రం వెనుకాడటం లేదు. ఈతరం యువతీయువకులు డిజిటల్ అనుభవం, వేగవంతమైన లావాదేవీలకే మొదటి ప్రాధాన్యత ఇస్తున్నారు. జెన్ జీ కస్టమర్ల బ్యాంకింగ్ అలవాట్లలో వస్తున్న విప్లవాత్మక మార్పులు, ట్రెడిషనల్ బ్యాంకులు ఎదుర్కొంటున్న సవాళ్ల గురించి తెలుసుకుందాం..

మల్టిపుల్ బ్యాంకింగ్

నేటి యువతలో సుమారు 60 శాతం మంది తమ ఆర్థిక కార్యకలాపాలను కేవలం ఒకే బ్యాంకుకు పరిమితం చేయడం లేదు. వారు తమ నగదును పలు బ్యాంకు ప్రొవైడర్ల మధ్య పంపిణీ చేస్తున్నారు. సగటున ప్రతి ఒక్కరూ రెండు బ్యాంకులు మరియు రెండు డిజిటల్ వాలెట్లను ఉపయోగిస్తున్నట్లు గణాంకాలు చెబుతున్నాయి. ఒక బ్యాంకులో పొదుపు ఖాతా ఉంటే, మరొక బ్యాంకును కేవలం ఖర్చుల కోసం లేదా ఇన్వెస్ట్‌మెంట్స్ కోసం వాడుతున్నారు. దీనివల్ల వారికి వివిధ రకాల ఆఫర్లు మరియు మెరుగైన వడ్డీ రేట్లు పొందే అవకాశం లభిస్తోంది. ముఖ్యంగా లోన్ల కోసం బ్యాంకు మెట్లు ఎక్కడం కంటే, నిమిషాల్లో అప్రూవల్ ఇచ్చే ఫిన్‌టెక్ యాప్‌లనే వారు ఎక్కువగా నమ్ముతున్నారు.

ఇక ప్రైమరీ బ్యాంక్ మార్పు విషయంలో కూడా జెన్ జీ ఎంతో వేగంగా నిర్ణయాలు తీసుకుంటున్నారు. గత ఏడాదిలో మూడింట ఒక వంతు యువత మెరుగైన సేవలు ఎక్కడ లభిస్తే అక్కడికి తమ ప్రధాన అకౌంట్లను మార్చేశారు. సుమారు 82 శాతం మంది జెన్ జీ కస్టమర్లు తమ ప్రస్తుత బ్యాంకు డిజిటల్ ఇంటర్‌ఫేస్ సరిగ్గా లేకపోతే, వెంటనే ఆ బ్యాంకును వదులుకోవడానికి సిద్ధంగా ఉండటం విశేషం.

డిజిటల్ అనుభవం

జెన్ జీ కేవలం తక్కువ చార్జీలు లేదా ఎక్కువ వడ్డీ కోసం మాత్రమే బ్యాంకులను ఎంచుకోవడం లేదు. వారు ఎంచుకునే బ్యాంక్ తమ వ్యక్తిగత విలువలకు, సామాజిక బాధ్యతలకు అనుగుణంగా ఉందా లేదా అని కూడా గమనిస్తున్నారు. కేవలం డబ్బును దాచుకోవడమే కాకుండా, తమ ఖర్చులను ట్రాక్ చేయడానికి, బడ్జెట్ ప్లాన్ చేసుకోవడానికి మరియు ఇన్వెస్ట్ చేయడానికి యాప్‌లోనే అధునాతన టూల్స్ ఉండాలని వారు ఆశిస్తున్నారు. అంటే బ్యాంకింగ్ యాప్ అనేది కేవలం నగదు బదిలీకే పరిమితం కాకుండా, ఒక పర్సనల్ ఫైనాన్షియల్ అసిస్టెంట్ లాగా పనిచేయాలని వారు కోరుకుంటున్నారు.

ఆసక్తికరమైన విషయం ఏమిటంటే, 45 శాతం మంది జెన్ జీ కస్టమర్లు ఫిజికల్ బ్రాంచ్‌లు లేని బ్యాంకుల్లో (నియో బ్యాంకులు) ఖాతా తెరవడానికి ఇష్టపడటం లేదు. ముఖ్యమైన ఆర్థిక సలహాల కోసం లేదా సమస్యల పరిష్కారం కోసం నేరుగా బ్యాంకు సిబ్బందిని కలవాలని వారు భావిస్తున్నారు. అంటే డిజిటల్ స్పీడ్ ఎంత ముఖ్యమో, నమ్మకమైన కస్టమర్ సర్వీస్ కూడా అంతే ముఖ్యమని వారు స్పష్టం చేస్తున్నారు. బ్యాంకులు తమ పాత పద్ధతులను మార్చుకుని, టెక్నాలజీని అందిపుచ్చుకోకపోతే ఈ కొత్త తరం కస్టమర్లను కోల్పోయే ప్రమాదం ఉంది. బెస్ట్ ఎక్స్‌పీరియెన్స్ ఇచ్చే ప్లాట్‌ఫామ్‌లకే జెన్ జీ పట్టం కడుతున్నారు.