శాకాహారమా? మాంసాహారమా? రెండింటి కలయికే ‘ఫ్లెక్సిటేరియన్ డైట్’! మీ పొట్ట ఆరోగ్యం సీక్రెట్

ముఖ్యంగా మన జీర్ణవ్యవస్థలో ఉండే కోట్లాది బ్యాక్టీరియా ఆరోగ్యానికి ఇది ఒక వరం అని గ్యాస్ట్రోఎంటరాలజిస్టులు చెబుతున్నారు. ఆయనకు మాంసాహారం అంటే ప్రాణం, కానీ తిన్న తర్వాత కడుపు ఉబ్బరం, అజీర్ణం వేధిస్తుంటాయి. ఆమె పూర్తి శాఖాహారిగా మారాలనుకుంది, కానీ సోషల్ గ్యాదరింగ్స్‌లో ఆ నియమాన్ని పాటించడం కష్టమై విడిచిపెట్టింది. వీరిద్దరి సమస్యకు పరిష్కారమే ‘ఫ్లెక్సిటేరియన్ డైట్’. ఇది కఠినమైన నియమాలు లేని, అత్యంత అనుకూలమైన ఆహార పద్ధతి. మన శరీరంలోని రోగనిరోధక శక్తిని, మెటబాలిజంను, చివరికి మన మూడ్‌ను కూడా ప్రభావితం చేసే ‘గట్ హెల్త్’ ను ఈ డైట్ ఎలా కాపాడుతుందో తెలిస్తే మీరు ఆశ్చర్యపోతారు.

అసలు ‘ఫ్లెక్సిటేరియన్’ అంటే..

ఈ పదం ‘ఫ్లెక్సిబుల్’ మరియు ‘వెజిటేరియన్’ అనే రెండు పదాల కలయిక. అంటే, మీ ఆహారంలో ఎక్కువ భాగం మొక్కల నుండి వచ్చే వస్తువులు (కూరగాయలు, పండ్లు, ధాన్యాలు, గింజలు) ఉంటాయి. కానీ, అప్పుడప్పుడు పరిమితంగా మాంసం, చేపలు లేదా గుడ్లు తినడానికి కూడా అనుమతి ఉంటుంది. దీనివల్ల డైట్ చేస్తున్నామనే ఒత్తిడి లేకుండా ఆరోగ్యాన్ని కాపాడుకోవచ్చు.

మన పొట్టలో ఉండే బ్యాక్టీరియాకు ‘ప్రీబయోటిక్ ఫైబర్’ ఇంధనం లాంటిది. ఫ్లెక్సిటేరియన్ డైట్‌లో పీచు పదార్థం ఎక్కువగా ఉండటం వల్ల, ఆ బ్యాక్టీరియా దానిని పులియబెట్టి ‘షార్ట్-చైన్ ఫ్యాటీ యాసిడ్స్’ (SCFAs) ను ఉత్పత్తి చేస్తుంది. ఇవి ప్రేగుల లోపలి పొరను బలోపేతం చేసి, ఇన్ఫ్లమేషన్ (మంట)ను తగ్గిస్తాయి.

పూణేలోని సహ్యాద్రి హాస్పిటల్ కన్సల్టెంట్ డాక్టర్ కిరణ్ షిండే ప్రకారం, ఇది కేవలం ఒక ట్రెండ్ కాదు, మన జీర్ణవ్యవస్థకు అవసరమైన శాస్త్రీయ విధానం. భారతీయ సంప్రదాయ ఆహారాలైన పెరుగు, మజ్జిగ, పులియబెట్టిన అన్నం వంటివి ఈ డైట్‌కు పర్ఫెక్ట్‌గా సరిపోతాయి. ఇవి ప్రోబయోటిక్స్‌గా పనిచేసి పొట్టలో మంచి బ్యాక్టీరియాను పెంచుతాయి. బరువు తగ్గాలనుకునే వారు, జీర్ణ సమస్యలతో బాధపడేవారు ఈ విధానంలో మంచి ఫలితాలు చూస్తున్నారని నిపుణులు చెబుతున్నారు.

ఎలా పాటించాలి?

• మీ భోజనంలో పప్పులు, తృణధాన్యాలు, ఆకుకూరలు ఎక్కువగా ఉండేలా చూసుకోండి.
• మాంసాహారాన్ని రోజూ కాకుండా, వారంలో ఒకటి రెండు సార్లు మాత్రమే తీసుకోండి.
• శాఖాహారం కదా అని ప్రాసెస్ చేసిన జంక్ ఫుడ్ తినకూడదు. ప్యాక్ చేసిన వెజిటేరియన్ స్నాక్స్ కంటే సహజమైన ఆహారానికే ప్రాధాన్యత ఇవ్వాలి.
• మజ్జిగ, పండ్ల రసాలు (చక్కెర లేకుండా) తీసుకోవడం వల్ల జీర్ణక్రియ సాఫీగా సాగుతుంది.

కఠినమైన నియమాలతో డైట్ చేసి మధ్యలోనే వదిలేయడం కంటే, శరీరానికి సరిపోయేలా మార్పులు చేసుకుంటూ సాగే ఈ ‘ఫ్లెక్సిటేరియన్’ జీవనశైలి ఎంతో ఉత్తమం. ఇది మీ గుండెకు, మెటబాలిజంకు మరియు ముఖ్యంగా మీ పొట్టకు ఎంతో మేలు చేస్తుంది.