రూ.3 లక్షల ఐఫోన్‌లో డిస్‌ప్లే సమస్య.. అసలు కారణం ఇదేనా?

యాపిల్ సంస్థ ఎంతో ప్రతిష్టాత్మకంగా విడుదల చేసిన తొలి ఫోల్డబుల్ ఫోన్ ‘ఐఫోన్ డ్యుయో’ కొనుగోలు చేసిన వినియోగదారులకు కొత్త కష్టాలు ఎదురవుతున్నాయి. దాదాపు రూ.3 లక్షల ప్రారంభ ధర కలిగిన ఈ ప్రీమియం ఫోన్‌ను మడుస్తున్నప్పుడు వింత శబ్దాలు రావడం, లోపలి డిస్‌ప్లేపై పగుళ్లు ఏర్పడటం, తెల్లటి గీతలు కనిపించడం వంటి సమస్యలను కొందరు వినియోగదారులు ఎదుర్కొంటున్నారు. తాజాగా ఈ సమస్యకు గల కారణాలపై ప్రసిద్ధ రిపేర్ సంస్థ ‘ఐఫిక్సిట్’ నిర్వహించిన పరిశీలనలో కొన్ని కీలక విషయాలు వెలుగులోకి వచ్చాయి. ఫోన్ హింజ్ డిజైన్‌లో ఉన్న లోపం వల్లే ఈ సమస్య తలెత్తి ఉండొచ్చని ఐఫిక్సిట్ అంచనా వేసింది. అయితే, ఇదే అసలు కారణమని యాపిల్ ఇంకా అధికారికంగా నిర్ధారించలేదు. ఐఫిక్సిట్ బృందం ఐఫోన్ డ్యుయో హింజ్‌కు సంబంధించిన 3డీ నమూనాను రూపొందించి, టియర్‌డౌన్ వీడియోలు, పేటెంట్లు, సీటీ స్కాన్ల ఆధారంగా లోతుగా విశ్లేషించింది. ఫోన్ మడిచినప్పుడు డిస్‌ప్లే కేబుల్ వెళ్లే ఖాళీ ప్రాంతం, హింజ్‌కు మధ్యలో ఉండే సపోర్ట్ భాగం కలిసే చోట అధిక ఒత్తిడి ఏర్పడుతున్నట్లు గుర్తించింది. ఫోన్ మూసినప్పుడు మధ్యలో ఉండే సపోర్ట్ బార్ పూర్తిగా వెనక్కి జరగకపోతే స్క్రీన్‌పై ఒత్తిడి పెరిగి ఈ ప్రమాదం జరగవచ్చని వివరించింది. కేవలం కొన్నిసార్లు మాత్రమే ఫోన్ మడిచినా డిస్‌ప్లే దెబ్బతిన్నట్లు ఆన్‌లైన్‌లో ఫిర్యాదులు వస్తున్నాయి. స్క్రీన్ బయటకు పగలకపోయినా, అంతర్గత విద్యుత్ కనెక్షన్లు దెబ్బతినడం వల్ల పిక్సెల్స్ పనిచేయకపోవచ్చని నిపుణులు చెబుతున్నారు. ఈ డిస్‌ప్లే సమస్యకు వారంటీ వర్తించకపోతే మరమ్మతు కోసం సుమారు రూ.1,49,900 వరకు ఖర్చవుతుందని సమాచారం. అయితే, ఈ సమస్య ఎదురైన వినియోగదారులకు యాపిల్ సంస్థ ప్రస్తుతం ఉచితంగా రీప్లేస్‌మెంట్ ఫోన్లు అందిస్తున్నట్లు నివేదికలు పేర్కొంటున్నాయి. కాగా, ఈ ఫోన్ భారత మార్కెట్లో 256 జీబీ వేరియంట్‌కు రూ.2,99,900 కాగా, టాప్ ఎండ్ 2 టీబీ మోడల్ ధర రూ.4,49,900గా ఉంది.

మరిన్ని వీడియోల కోసం ఇక్కడ క్లిక్ చేయండి

Also Watch:

11 కేవీ విద్యుత్ వైర్‌పై ఉమ్మి వేశాడు.. క్షణాల్లో..

రెండేళ్లకే చిన్నారి అద్భుతం.. తబలాపై 12 తాళాలు వాయించి రికార్డ్‌

ఇంజనీరింగ్‌ చేయని ఇంజనీర్‌.. ఎగిరే కారును సృష్టించిన యువకుడు

ఈ వీడియో చూస్తే కన్నీళ్లు ఆగవు!

ఓడిన సర్పంచ్‌కి గ్రామస్తులు సత్కారం!