Eggs: రోజూ గుడ్డు తినడం ఆరోగ్యానికి మంచిదేనా..? అసలు నిజాలు ఇవే..

తక్కువ ధరలో ఎక్కువ పోషకాలు లభించే ఆహారం ఏదైనా ఉందంటే అది ఖచ్చితంగా గుడ్డు మాత్రమే. అందుకే రోజూ ఒక గుడ్డు తినడం ఆరోగ్యానికి మంచిది అని వైద్యులు చెబుతుంటారు. అయితే గుడ్లు తినడం వల్ల కొలెస్ట్రాల్ పెరుగుతుందని, గుండె జబ్బులు వస్తాయని చాలామంది భయపడుతుంటారు. ఈ నేపథ్యంలో గుడ్లను ఎలా తింటే సంపూర్ణ ఆరోగ్యం లభిస్తుందో ఇప్పుడు తెలుసుకుందాం..

గుడ్డు: పోషకాల గని

గుడ్డులో ప్రోటీన్లు, సెలీనియం, కోలిన్, విటమిన్ బి12, ఎ, డి వంటి అత్యవసర పోషకాలు ఉంటాయి. ఇవి మెదడును చురుగ్గా ఉంచడానికి, రోగనిరోధక శక్తిని పెంచడానికి, కండరాల దృఢత్వానికి ఎంతో తోడ్పడతాయి.

గుడ్లు తినేటప్పుడు చేయాల్సినవి

మొత్తం గుడ్డు తినండి: చాలామంది పచ్చసొన తీసేసి కేవలం తెల్లసొన మాత్రమే తింటారు. కానీ పచ్చసొనలో కళ్లకు, మెదడుకు మేలు చేసే యాంటీఆక్సిడెంట్లు, విటమిన్ డి, ఆరోగ్యకరమైన కొవ్వులు ఉంటాయి. అందుకే మొత్తం గుడ్డు తినడం శ్రేయస్కరం.

ఉడికించిన గుడ్లకే ప్రాధాన్యత: గుడ్లను నూనెలో వేయించడం కంటే ఉడకబెట్టి తినడం చాలా మంచిది. దీనివల్ల అదనపు కొవ్వు లేదా కొలెస్ట్రాల్ శరీరంలోకి చేరదు.

ఫైబర్ ఆహారంతో జత చేయండి: గుడ్డులో ప్రోటీన్ ఉంటుంది కానీ ఫైబర్ ఉండదు. అందుకే గుడ్డు తిన్నప్పుడు కూరగాయలు, ఆకుకూరలు లేదా తృణధాన్యాలు కూడా తీసుకుంటే జీర్ణక్రియ సులభమవుతుంది.

సరైన నిల్వ: గుడ్లను ఎల్లప్పుడూ ఫ్రిజ్‌లో లేదా కార్టన్ బాక్సులలో భద్రపరచాలి. అలాగే ఉపయోగించే ముందు పెంకుపై ఉండే బ్యాక్టీరియా పోయేలా సున్నితంగా కడిగి ఆరబెట్టాలి.

గుడ్లు తినేటప్పుడు చేయకూడనివి

పచ్చి గుడ్లు వద్దు: పచ్చివి లేదా సగం ఉడికించిన గుడ్లు తినడం వల్ల సాల్మొనెల్లా వంటి బ్యాక్టీరియా సోకే ప్రమాదం ఉంది. దీనివల్ల జ్వరం, కడుపు నొప్పి, విరేచనాలు రావచ్చు.

అధిక ఉప్పు, వెన్న వాడకండి: గుడ్లలో ఎక్కువ ఉప్పు లేదా వెన్న చేర్చడం వల్ల వాటి సహజ పోషక విలువలు తగ్గిపోతాయి. ఇది రక్తపోటును పెంచి గుండెపై ప్రభావం చూపుతుంది.

పాడైపోయిన గుడ్లు: చెడు వాసన వస్తున్నా, రంగు మారినా లేదా జిగటగా అనిపించినా ఆ గుడ్లను వెంటనే పారేయండి. అవి ఆరోగ్యానికి అత్యంత ప్రమాదకరం.

కొలెస్ట్రాల్ సమస్య ఉన్నవారు ఏం చేయాలి?

మీకు ఇప్పటికే అధిక కొలెస్ట్రాల్ లేదా గుండె సంబంధిత సమస్యలు ఉంటే మీరు తినే గుడ్ల సంఖ్యపై నియంత్రణ ఉండాలి. రోజువారీ ఆహారంలో కేవలం గుడ్లపైనే ఆధారపడకుండా కాయధాన్యాలు, చిక్కుళ్లు, చేపలు వంటి ఇతర ప్రోటీన్ వనరులను కూడా చేర్చుకోవాలి. గుడ్డు ఒక అద్భుతమైన ఆహారం. దానిని వండే పద్ధతి, తినే విధానం సరిగ్గా ఉంటే అది మీ ఆరోగ్యానికి రక్షణ కవచంలా పనిచేస్తుంది.

మరిన్ని లైఫ్‌స్టైల్ న్యూస్ కోసం ఇక్కడ క్లిక్ చేయండి.