Sajja Masala Khichdi: శరీరానికి వేడినిచ్చే ‘సజ్జల కిచ్డీ’.. ఇలా చేస్తే పిల్లలు వదలకుండా తింటారు!

పెర్ల్ మిల్లెట్‌గా పిలిచే ఈ చిరుధాన్యాలతో కేవలం రొట్టెలే కాదు, నోరూరించే మసాలా కిచ్డీ కూడా తయారు చేయవచ్చు. తక్కువ సమయంలో ఎక్కువ శక్తినిచ్చే వంటకం సజ్జల మసాలా కిచ్డీ. ఆరోగ్యం మీద శ్రద్ధ చూపే వారు ఇప్పుడు బియ్యానికి బదులుగా చిరుధాన్యాల వైపు మొగ్గు చూపుతున్నారు. అయితే చాలామందికి వీటిని ఎలా వండాలో తెలియదు. ముఖ్యంగా బజ్రా అని పిలిచే ఈ ధాన్యం శరీరానికి తక్షణ శక్తిని ఇస్తుంది, జీర్ణక్రియను మెరుగుపరుస్తుంది. ఒకప్పుడు పల్లెటూరి వంటకంగా ఉన్న ఈ పదార్థాన్ని ఇప్పుడు నగరాల్లో సైతం అమితంగా ఇష్టపడుతున్నారు.

కావాల్సిన పదార్థాలు

ఈ రుచికరమైన కిచ్డీ కోసం ఒకటిన్నర కప్పు సజ్జలు, రెండు బంగాళదుంపలు, ఒక ఉల్లిపాయ, ఒక టమోటా, రెండు పచ్చిమిర్చి సిద్ధం చేసుకోవాలి. తాలింపు కోసం రెండు టేబుల్ స్పూన్ల నెయ్యి, ఒక టీ స్పూన్ జీలకర్ర, రెండు లవంగాలు, రెండు బిరియాని ఆకులు, కొద్దిగా కరివేపాకు, చిటికెడు ఇంగువ ఉండాలి. రుచి కోసం అర టీ స్పూన్ పసుపు, అర టీ స్పూన్ కారం పొడి, తగినంత ఉప్పు అవసరం.

తయారీ విధానం..

• మొదట సజ్జలను బాగా కడిగి, రెండు నుండి మూడు గంటల పాటు నీటిలో నానబెట్టాలి. ఇలా చేయడం వల్ల సజ్జలు త్వరగా ఉడుకుతాయి. ఆ తర్వాత ప్రెషర్ కుక్కర్‌లో సజ్జలు వేసి, తగినన్ని నీళ్లు పోసి 3 నుండి 4 విజిల్స్ వచ్చే వరకు ఉడికించి పక్కన పెట్టుకోవాలి.
• బంగాళదుంపలను విడిగా కుక్కర్‌లో 2-3 విజిల్స్ వచ్చే వరకు ఉడికించి, పొట్టు తీసి చిన్న ముక్కలుగా కట్ చేయాలి. ఇప్పుడు స్టవ్ మీద కళాయి పెట్టి నెయ్యి వేయాలి. నెయ్యి వేడెక్కిన తర్వాత ఇంగువ, జీలకర్ర, లవంగాలు, బిరియాని ఆకులు వేసి వేయించాలి. అవి చిటపటలాడుతుండగా కరివేపాకు వేయాలి.
• తరిగిన ఉల్లిపాయ ముక్కలు వేసి బంగారు రంగు వచ్చే వరకు వేయించాలి. ఆపై పచ్చిమిర్చి, టమోటా ముక్కలు వేసి అవి మెత్తబడే వరకు మగ్గనివ్వాలి. టమోటాలు మెత్తబడ్డాక, ముందుగా ఉడికించి పెట్టుకున్న బంగాళదుంప ముక్కలు కూడా చేర్చాలి.
• ఇందులో పసుపు, కారం పొడి, ఉప్పు వేసి బాగా కలపాలి. మసాలాలన్నీ కూరగాయలకు పట్టిన తర్వాత, ఉడికించిన సజ్జలను కళాయిలో వేసి బాగా కలపాలి. మిశ్రమం మరీ గట్టిగా అనిపిస్తే కొద్దిగా నీరు పోసి ఐదు నిమిషాల పాటు తక్కువ మంటపై ఉడకనివ్వాలి. చివరగా పైన కొద్దిగా నెయ్యి వేసి కలిపితే ఘుమఘుమలాడే కిచ్డీ రెడీ!
• వేడి వేడి సజ్జల మసాలా కిచ్డీని పెరుగు లేదా రైతాతో సర్వ్ చేస్తే అమృతంలా ఉంటుంది. అదనపు రుచి కోసం పక్కన అప్పడాలు లేదా ఆవకాయ పెట్టుకుంటే ఆ తృప్తి వేరు. డైట్ లో ఉన్నవారు కూడా నిశ్చింతగా ఈ వంటకాన్ని ఆస్వాదించవచ్చు. మరి ఈ చలికాలంలో మీరు కూడా ఈ హెల్తీ కిచ్డీని ఒకసారి ట్రై చేసి మీ ఇంట్లో వారికి వడ్డించండి!