ప్రోటీన్ ఎక్కువగా తింటే కిడ్నీలు దెబ్బతింటాయా? అసలు నిజం ఇదే!
ప్రోటీన్ మన శరీరానికి అత్యంత అవసరమైన పోషకాలలో ఒకటి. కండరాల నిర్మాణం, శరీర కణాల మరమ్మత్తు, రోగనిరోధక శక్తి పెంపు, హార్మోన్ల ఉత్పత్తి వంటి అనేక కీలక ప్రక్రియల్లో ఇది ముఖ్య పాత్ర పోషిస్తుంది. అయితే ప్రోటీన్ ఎక్కువగా తీసుకుంటే కిడ్నీలు దెబ్బతింటాయి అనే అభిప్రాయం చాలా కాలంగా ప్రచారంలో ఉంది. మరి ఇందులో ఎంతవరకు నిజం ఉంది? ఆరోగ్య నిపుణులు ఏమంటున్నారు? తెలుసుకుందాం..
నెఫ్రాలజిస్టుల ప్రకారం, ఆరోగ్యంగా ఉన్న కిడ్నీలు కలిగిన వ్యక్తులు సమతుల్య మోతాదులో ప్రోటీన్ తీసుకుంటే సాధారణంగా ఎలాంటి హాని ఉండదు. శరీరానికి అవసరమైన పరిమాణంలో ప్రోటీన్ తీసుకోవడం ఆరోగ్యానికి మేలు చేస్తుంది. అయితే, ఇప్పటికే దీర్ఘకాలిక మూత్రపిండ వ్యాధి (CKD) ఉన్నవారు మాత్రం వైద్యుల సలహా మేరకు మాత్రమే ప్రోటీన్ తీసుకోవాలి. ఎందుకంటే అలాంటి పరిస్థితుల్లో కిడ్నీలపై అదనపు భారం పడే అవకాశం ఉంటుంది.
ప్రోటీన్ తగ్గిస్తే ఏమవుతుంది?
కిడ్నీలు దెబ్బతింటాయనే భయంతో కొందరు ప్రోటీన్ తీసుకోవడాన్ని గణనీయంగా తగ్గిస్తుంటారు. ఇది కూడా ఆరోగ్యానికి హానికరమే. ప్రోటీన్ లోపం వల్ల కండరాల బలహీనత, శారీరక శక్తి తగ్గడం, రోగనిరోధక శక్తి బలహీనపడటం, పోషకాహార లోపం వంటి సమస్యలు తలెత్తవచ్చు. ముఖ్యంగా వృద్ధులు, అనారోగ్యం నుంచి కోలుకుంటున్నవారు, డయాలసిస్ పొందుతున్న రోగులకు తగినంత ప్రోటీన్ చాలా అవసరం.
ప్రోటీన్ కేవలం బాడీబిల్డర్ల కోసమేనా?
ఇది కూడా ఒక సాధారణ అపోహ. ప్రోటీన్ కేవలం జిమ్కు వెళ్లేవారికి లేదా బాడీబిల్డర్లకే అవసరం కాదు. ప్రతి ఒక్కరి శరీరానికి ఇది అవసరమే. కండరాలు, ఎముకలు, చర్మం, జుట్టు, హార్మోన్లు, రోగనిరోధక వ్యవస్థ ఆరోగ్యంగా ఉండటానికి ప్రోటీన్ కీలకం. అయితే, శారీరక శ్రమ ఎక్కువగా చేసే వ్యక్తులకు అవసరమైన మోతాదు కొంచెం ఎక్కువగా ఉండవచ్చు.
ప్రోటీన్ యూరిక్ యాసిడ్ను పెంచుతుందా?
అన్ని రకాల ప్రోటీన్లు యూరిక్ యాసిడ్ను పెంచవు. ముఖ్యంగా పప్పులు, శనగలు, సోయా వంటి మొక్కల ఆధారిత ప్రోటీన్లు సాధారణంగా యూరిక్ యాసిడ్ సమస్యను పెంచవు. అయితే కొన్ని జంతు ఆధారిత ఆహారాలు, ముఖ్యంగా అధిక ప్యూరిన్ కలిగిన మాంసాహార పదార్థాలు, ఆల్కహాల్ యూరిక్ యాసిడ్ స్థాయిలను పెంచే అవకాశం ఉంది.
ఎప్పుడు వైద్యుల సలహా తీసుకోవాలి?
మీకు కిడ్నీ వ్యాధి, మధుమేహం, అధిక రక్తపోటు లేదా ఇతర దీర్ఘకాలిక ఆరోగ్య సమస్యలు ఉంటే, ప్రోటీన్ తీసుకునే పరిమాణం గురించి తప్పనిసరిగా వైద్యుడిని లేదా పోషకాహార నిపుణుడిని సంప్రదించాలి. సోషల్ మీడియాలో వచ్చే సమాచారాన్ని మాత్రమే నమ్మకుండా, వ్యక్తిగత ఆరోగ్య పరిస్థితిని బట్టి ఆహారాన్ని ఎంపిక చేసుకోవడం మంచిది. ప్రోటీన్ శరీరానికి అత్యంత అవసరమైన పోషకం. ఆరోగ్యకరమైన కిడ్నీలు ఉన్నవారికి సరైన మోతాదులో ప్రోటీన్ తీసుకోవడం వల్ల సాధారణంగా ఎలాంటి సమస్యలు రావు. అయితే కిడ్నీ సంబంధిత వ్యాధులు ఉన్నవారు వైద్యుల సూచనలను పాటించాలి. అపోహలను నమ్మడం కంటే, సమతుల్య ఆహారం తీసుకోవడం , నిపుణుల సలహాలను అనుసరించడం ఆరోగ్యానికి ఉత్తమ మార్గం.