కర్లీ..కర్లీ హెయిర్ మీ సొంతమా? మెయింటెనెన్స్ వెనుక అంత సైన్స్ ఉందా

ఇన్‌స్టాగ్రామ్, యూట్యూబ్ చూస్తుంటే కర్లీ హెయిర్ కేర్ అంటే పదుల కొద్దీ ప్రొడక్ట్స్, గంటల తరబడి చేసే పద్ధతులు అనిపిస్తుంది. నిజానికి కర్లీ హెయిర్ మెయింటెనెన్స్ అనేది ఒక పెద్ద పరిశ్రమగా మారిపోయింది. కానీ, ఎక్కువ ప్రొడక్ట్స్ వాడితే జుట్టు బాగుంటుందనుకోవడం పెద్ద పొరపాటు. అసలు కర్లీ హెయిర్‌కు ప్రత్యేకమైన సంరక్షణ ఎందుకు అవసరం? నిజంగానే అంత ఖర్చు పెట్టాలా? నిపుణులు సూచిస్తున్న సులువైన, ఆరోగ్యకరమైన కర్లీ హెయిర్ కేర్ మార్గాల గురించి తెలుసుకుందాం..

కర్లీ హెయిర్ ఎందుకు భిన్నంగా ఉంటుందంటే, అది ఒక ‘కాయిల్’ మాదిరిగా వంకరగా ఉంటుంది. దీనివల్ల తల చర్మంపై ఉత్పత్తి అయ్యే సహజ నూనెలు జుట్టు చివర్ల వరకు చేరడం కష్టమవుతుంది. ఫలితంగా కర్లీ హెయిర్ త్వరగా పొడిబారుతుంది, చిక్కులు పడుతుంది, ఫ్రిజీగా మారుతుంది. అందుకే స్ట్రెయిట్ హెయిర్ కంటే దీనికి అదనపు తేమ, సున్నితమైన నిర్వహణ అవసరం.

హై మెయింటెనెన్స్..

కర్లీ హెయిర్‌కు ఎక్కువ శ్రద్ధ అవసరం మాట నిజమే, కానీ అది అసాధ్యమేమీ కాదు. డీప్ కండిషనింగ్ ముఖ్యం. జుట్టును గట్టిగా రుద్దడం లేదా చిక్కులు తీయడం చేయకూడదు. కనీసం తక్కువ సార్లు తల స్నానం చేయడం, హీట్ స్టైలింగ్‌కు దూరంగా ఉండటం మేలు.

సోషల్ మీడియా చూపిస్తున్న భ్రమలు

సోషల్ మీడియాలో కనిపించే పద్ధతులు కంటెంట్ కోసం అందంగా కనిపిస్తాయి తప్ప, అందరికీ అవి సెట్ అవ్వవు. వాస్తవానికి ఒక సాధారణ రూటీన్ సరిపోతుంది: ఒక జెంటల్ క్లెన్సర్, కండిషనర్, ఒకటి లేదా రెండు స్టైలింగ్ ప్రొడక్ట్స్ (కర్ల్ క్రీమ్ లేదా జెల్) ఉంటే చాలు. మరీ ఎక్కువ ప్రొడక్ట్స్ వాడితే తల చర్మంపై దురద లేదా జిడ్డు పేరుకుపోయే ప్రమాదం ఉంది.

బడ్జెట్ ఫ్రెండ్లీ కేర్..

కర్లీ హెయిర్ ప్రొడక్ట్స్ ఖరీదుగా ఉండటానికి కారణం వాటిలోని షియా బటర్, ఆర్గాన్ ఆయిల్ వంటి ప్రత్యేక పదార్థాలు. అయితే, లగ్జరీ ప్రొడక్ట్స్ వాడటం వల్ల మాత్రమే జుట్టు బాగుంటుందని అనుకోవద్దు. మీరు చేయగలిగిన కొన్ని చిన్న పద్ధతులు.

జుట్టును రుద్దకుండా తడిని పీల్చుకోవడానికి కాటన్ టీ-షర్ట్ లేదా మైక్రోఫైబర్ టవల్ వాడండి. సాటిన్ దిండు కవర్లపై పడుకోవడం వల్ల జుట్టు చిక్కులు పడకుండా ఉంటుంది. జుట్టు ఆరోగ్యానికి లోపలి నుంచి కూడా హైడ్రేషన్ అవసరం. కర్లీ హెయిర్ కేర్ అంటే గంటల తరబడి కష్టపడటం కాదు. మీ జుట్టుకు ఏది అవసరమో గుర్తించి, క్రమశిక్షణతో దాన్ని పాటించడమే ముఖ్యం. సోషల్ మీడియా ట్రెండ్స్ వెంబడించడం కంటే, మీ సహజసిద్ధమైన జుట్టును ఆరోగ్యంగా ఉంచుకోవడానికి ప్రయత్నించండి.