చన్నీళ్లా.. వేడి నీళ్లా? ఏ టైమ్లో ఏ నీటితో స్నానం చేస్తే మంచిది..? అందరూ చేసే తప్పులు ఇవే..
కూడు లేకపోయినా పర్లేదు కానీ.. స్నానం మాత్రం మానకూడదు అనేది పెద్దల మాట. దైనందిన జీవితంలో స్నానానికి ఎంతో ప్రాముఖ్యత ఉంది. అయితే చన్నీటి స్నానం మంచిదా లేక వేడి నీటి స్నానం మంచిదా? ఏ సమయంలో ఏ నీటితో స్నానం చేస్తే ఆరోగ్యానికి మేలు జరుగుతుంది? అనే సందేహం చాలామందిలో ఉంటుంది. ఆ వివరాలు ఈ స్టోరీలో తెలుసుకుందాం..
Updated on: Aug 19, 2026 | 4:05 PM
ఉదయం నిద్రలేచిన తర్వాత మార్నింగ్ వాక్ లేదా జిమ్లో వర్కవుట్ ముగించుకుని వచ్చిన వెంటనే 10 నుండి 15 డిగ్రీల సెల్సియస్ చల్లని నీటితో స్నానం చేయడం అత్యంత మంచిది. చన్నీళ్లు ఒంటిపై పడగానే శరీరం ఒక తేలికపాటి షాక్కు గురవుతుంది. దీనివల్ల శరీరంలో ఎండార్ఫిన్, అడ్రినలిన్ హార్మోన్లు విడుదలవుతాయి. ఫలితంగా గుండె వేగం పుంజుకుని, శరీరానికి ఆక్సిజన్ సరఫరా వేగవంతమై నిద్రమత్తు వదిలి తక్షణ ఉత్తేజం లభిస్తుంది. శరీరానికి ఇదొక సహజ బయోలాజికల్ రీసెట్లా పనిచేస్తుంది. వ్యాయామం చేసినప్పుడు కండరాలలో పేరుకుపోయే లాక్టిక్ యాసిడ్ వల్ల ఒళ్లు నొప్పులు, కండరాల వాపు వస్తాయి. వ్యాయామం తర్వాత చన్నీటి స్నానం చేయడం వల్ల రక్తనాళాలు కుంచించుకుపోయి, లాక్టిక్ యాసిడ్ సులభంగా బయటకు వెళ్లిపోతుంది. ఇది కండరాల వాపును, నొప్పులను తగ్గిస్తుంది. అంతేకాకుండా, వేడి నీళ్లలా చన్నీరు చర్మంలోని సహజ నూనెలను తొలగించదు. వెంట్రుకల కుదుళ్లను దృఢపరిచి, చర్మం పొడిబారకుండా కాపాడుతుంది.
సాయంత్రం వేళల్లో లేదా రాత్రి నిద్రపోయే ముందు అలాగే ఒళ్లు నొప్పులు, తీవ్రమైన అలసట ఉన్నప్పుడు గోరువెచ్చని లేదా వేడి నీటితో స్నానం చేయడం ఉత్తమం. ఇది శరీరానికి హీట్ థెరపీలా పనిచేసి ఉపశమనాన్ని ఇస్తుంది. నిద్రపోవడానికి దాదాపు 90 నిమిషాల ముందు వేడి నీటితో స్నానం చేస్తే శరీరంలోని రక్తనాళాలు విస్తరిస్తాయి. స్నానం ముగించిన తర్వాత శరీర ఉష్ణోగ్రత క్రమంగా తగ్గి, నిద్రపోయే సమయం ఆసన్నమైందన్న సంకేతాన్ని మెదడుకు చేరవేస్తుంది. ఇది నాణ్యమైన, గాఢ నిద్రకు దోహదపడుతుంది. వేడి నీటి స్నానం కండరాలు, కీళ్ల బిగుతును తగ్గించి, రక్తప్రసరణను మెరుగుపరచడం ద్వారా దీర్ఘకాలిక నొప్పుల నుంచి ఉపశమనం కలిగిస్తుంది. అలాగే వేడి నీటి నుంచి వచ్చే ఆవిరి శ్వాసనాళాలలోని అడ్డంకులను తొలగించి, కఫాన్ని కరిగించడం ద్వారా ముక్కు దిబ్బడ సమస్యను సమర్థవంతంగా నివారిస్తుంది.
ఈ రెండు పద్ధతుల కలయికతో కూడిన కాంట్రాస్ట్ షవర్ విధానం శరీరానికి మరింత ప్రయోజనకరంగా ఉంటుంది. ముందుగా వేడి నీటితో స్నానం చేసి, చివరి 30 నుండి 60 సెకన్ల పాటు చల్లని నీటిని శరీరంపై పోసుకోవాలి. ఈ ఆకస్మిక ఉష్ణోగ్రత మార్పు వల్ల శరీరంలో రక్త సూక్ష్మ ప్రసరణ మెరుగుపడటంతో పాటు చర్మ తేమ నిలిచి ఉంటుంది. కాబట్టి రోజంతా ఉల్లాసంగా ఉండటానికి ఉదయం చన్నీటి స్నానం, రాత్రి ప్రశాంతమైన నిద్ర కోసం వేడి నీటి స్నానం ఎంచుకోవడం ఆరోగ్యానికి మేలు చేస్తుంది.
