కాళ్లకు చెప్పులు లేకుండా నడిస్తే బీపీ తగ్గుతుందా? పరిశోధనలో అవాక్కయ్యే నిజాలు..
ఉదయాన్నే పార్కుకు వెళ్లినప్పుడు చాలామంది పచ్చటి గడ్డిపై చెప్పులు లేకుండా నడవడం మీరు చూసే ఉంటారు. దీన్ని కేవలం ఆహ్లాదం కోసమే అనుకుంటే పొరపాటే.. కేవలం 15 నిమిషాల పాటు చెప్పులు లేకుండా నడవడం వల్ల గుండె ఆరోగ్యం ఎంతగానో మెరుగవుతుందని అంతర్జాతీయ వైద్య పరిశోధనలు స్పష్టం చేస్తున్నాయి. ఆ వివరాలు ఈ స్టోరీలో తెలుసుకుందాం..
Updated on: Aug 30, 2026 | 7:44 AM
మారిన జీవనశైలి, శారీరక శ్రమ తగ్గడం వంటి కారణాల వల్ల నేడు గుండె సంబంధిత సమస్యలు వేగంగా పెరుగుతున్నాయి. ఆరోగ్యాన్ని కాపాడుకోవడానికి రోజువారీ నడక ఎంతో అవసరమని వైద్యులు సూచిస్తుంటారు. అయితే రోజూ చేసే సాధారణ నడకలో భాగంగా కేవలం కొన్ని నిమిషాల పాటు చెప్పులు లేకుండా పచ్చిక బయళ్లపై నడవడం వల్ల అద్భుతమైన ఆరోగ్య ప్రయోజనాలు ఉన్నాయని తాజా వైద్య పరిశోధనలు వెల్లడిస్తున్నాయి. ఇది రక్తపోటును నియంత్రించడంతో పాటు గుండె పనితీరును మెరుగుపరచడంలో కీలక పాత్ర పోషిస్తుంది.
గుండె ఆరోగ్యానికి ఎలా మేలు చేస్తుంది?
రక్తపోటు నియంత్రణ: జర్నల్ ఆఫ్ అప్లైడ్ నర్సింగ్ అండ్ హెల్త్ నివేదిక ప్రకారం.. ఉదయం పూట చెప్పులు లేకుండా నడవడం వల్ల సిస్టోలిక్ మరియు డయాస్టోలిక్ రక్తపోటు అదుపులోకి వస్తుంది. రక్తపోటు నియంత్రణలో ఉండటం వల్ల గుండెపోటు, పక్షవాతం ప్రమాదాలు తగ్గుతాయి.
మెరుగైన రక్త ప్రసరణ పాదాల అరికాళ్ళు నేరుగా నేలను లేదా పచ్చికను తాకినప్పుడు అక్కడి నరాల చివరలు, కండరాలు ఉత్తేజితమవుతాయి. దీనివల్ల కాళ్ల సిరల నుంచి రక్తం తిరిగి గుండెకు సులభంగా సరఫరా అవుతుందని ‘జర్నల్ ఆఫ్ ఫుట్ అండ్ యాంకిల్ రీసెర్చ్’ పేర్కొంది.
రిస్క్ ఫ్యాక్టర్ల నియంత్రణ: క్రమం తప్పకుండా నడవడం వల్ల రక్తంలో చక్కెర స్థాయిలు, చెడు కొలెస్ట్రాల్ తగ్గుతాయి.
అమెరికన్ హార్ట్ అసోసియేషన్ మార్గదర్శకాల ప్రకారం.. పెద్దలు గుండె ఆరోగ్యాన్ని పదిలంగా ఉంచుకోవడానికి వారానికి కనీసం 150 నిమిషాల పాటు నడక వంటి మధ్యస్థ-తీవ్రత గల ఏరోబిక్ వ్యాయామం చేయాలి.
శరీరంలో జరిగే సహజ మార్పులు
సాధారణంగా బూట్లు లేదా చెప్పులు పాదాలకు కృత్రిమ కుషనింగ్ను అందిస్తాయి. కానీ నేరుగా నేల లేదా గడ్డిపై నడిచినప్పుడు పాదాల అరికాళ్లకు అందే సహజ స్పర్శ నరాలను చురుగ్గా మారుస్తుంది. నేషనల్ సెంటర్ ఫర్ బయోటెక్నాలజీ ఇన్ఫర్మేషన్ అధ్యయనాల ప్రకారం.. అరికాళ్లలో ఉండే నరాల ప్రేరణ గుండె పనితీరుకు సానుకూల సంకేతాలను అందిస్తుంది.
రోజూ 15-30 నిమిషాలు నడిస్తే కలిగే ప్రయోజనాలు
ఒత్తిడి నివారణ: ఉదయాన్నే పచ్చికపై నడవడం వల్ల మానసిక ఒత్తిడి తగ్గి, నాడీ వ్యవస్థ ప్రశాంతపడుతుంది.
జీవక్రియల మెరుగుదల: ఎక్కువసేపు కూర్చునే నిశ్చల జీవనశైలి దుష్ప్రభావాలు తగ్గి, శరీర శక్తి మరియు మెటబాలిజం మెరుగవుతాయి.
ఆయుర్వేద ప్రాముఖ్యత: ఉదయం పచ్చికపై నడవడం వల్ల కళ్ల ఆరోగ్యానికి, మానసిక ప్రశాంతతకు ఎంతో మేలు జరుగుతుందని ప్రాచీన ఆయుర్వేదం కూడా స్పష్టం చేస్తోంది.
రోజూ కనీసం 15 నుండి 30 నిమిషాల పాటు పార్కులలోని పచ్చికపై లేదా సహజ నేలపై చెప్పులు లేకుండా నడవడం అలవాటు చేసుకుంటే గుండెను పదిలంగా ఉంచుకోవచ్చని ఆరోగ్య నిపుణులు సూచిస్తున్నారు.
