IND vs AFG: సచిన్ రికార్డ్ బ్రేక్.. చరిత్ర సృష్టించిన హిట్‌మ్యాన్.. ఆ స్పెషల్ క్లబ్‌లోకి రోహిత్ శర్మ..!

India vs Afghanistan 2nd ODI: రోహిత్ శర్మ సాధించిన ఈ ఘనత అతని నిలకడకు, క్లాస్‌కు నిదర్శనం. ఆధునిక క్రికెట్‌లో అత్యుత్తమ ఓపెనర్‌గా తన స్థానాన్ని అతను మరోసారి సుస్థిరం చేసుకున్నాడు. కెప్టెన్‌గా జట్టును ముందుండి నడిపించడమే కాకుండా, వ్యక్తిగత రికార్డులతో సరికొత్త చరిత్ర సృష్టిస్తున్న హిట్‌మ్యాన్ ఫామ్ టీమిండియాకు రాబోయే టోర్నమెంట్లలో కొండంత బలాన్ని ఇస్తుందనడంలో ఎలాంటి సందేహం లేదు.

Rohit Sharma Record

Venkata Chari |
Updated on: Jun 17, 2026 | 2:49 PM

Rohit Sharma Cricket Records: ఆఫ్ఘనిస్తాన్‌తో జరుగుతున్న రెండో వన్డేలో టీమిండియా మాజీ కెప్టెన్ రోహిత్ శర్మ సరికొత్త రికార్డు నెలకొల్పాడు. లిస్ట్-ఎ (List A Cricket) క్రికెట్‌లో 14,000 పరుగుల మైలురాయిని దాటి.. ఈ ఘనత సాధించిన ఐదో భారతీయ బ్యాటర్‌గా చరిత్ర పుటల్లోకెక్కాడు. లక్నో వేదికగా జరుగుతున్న ఈ మ్యాచ్‌లో తన ట్రేడ్‌మార్క్ సిక్సర్‌తో రోహిత్ ఈ అరుదైన రికార్డును సొంతం చేసుకోవడం విశేషం.

లక్నోలోని ఏకానా ఇంటర్నేషనల్ క్రికెట్ స్టేడియం (Ekana International Cricket Stadium) వేదికగా బుధవారం ఆఫ్ఘనిస్తాన్‌తో జరుగుతున్న రెండో వన్డే మ్యాచ్‌లో రోహిత్ శర్మ మరో సంచలన రికార్డును తన ఖాతాలో వేసుకున్నాడు. పరిమిత ఓవర్ల క్రికెట్‌లో తిరుగులేని ఓపెనర్‌గా గుర్తింపు తెచ్చుకున్న రోహిత్.. వన్డే, డొమెస్టిక్ వన్డేలతో కూడిన ‘లిస్ట్-ఎ’ క్రికెట్‌లో ఏకంగా 14 వేల పరుగుల మైలురాయిని అధిగమించాడు. ఈ అద్భుతమైన ఫీట్ సాధించిన ఐదో ఇండియన్ బ్యాటర్‌గా రోహిత్ రికార్డు సృష్టించాడు.

ట్రేడ్‌మార్క్ సిక్సర్‌తో హిట్‌మ్యాన్ మార్క్ రికార్డు..

ఈ మ్యాచ్‌లో రోహిత్ శర్మ తనదైన శైలిలో సిక్సర్‌ బాది 14,000 పరుగుల క్లబ్‌లోకి అడుగుపెట్టాడు. ఇన్నింగ్స్ 4వ ఓవర్ మూడో బంతికి ఆఫ్ఘన్ బౌలర్ మహ్మద్ సలీమ్ సఫీ వేసిన 141.3 కిలోమీటర్ల వేగంతో కూడిన షార్ట్ పిచ్ డెలివరీని రోహిత్ అంతే వేగంగా అంచనా వేశాడు. తన ఫేవరెట్ ‘పుల్ షాట్’ (Pull Shot) తో మిడ్-వికెట్ మీదుగా బంతిని బౌండరీ అవతలికి తరలించాడు. ఈ సిక్సర్‌తో స్టేడియం మొత్తం మారుమోగిపోగా, రోహిత్ కెరీర్‌లో మరో సువర్ణ అధ్యాయం లిఖించబడింది.

సచిన్ రికార్డు బద్దలు.. కోహ్లీ తర్వాత రోహితే..!

లిస్ట్-ఎ క్రికెట్‌లో అత్యంత వేగంగా 14 వేల పరుగులు పూర్తి చేసిన రెండో భారతీయ బ్యాటర్‌గా రోహిత్ నిలిచాడు. కేవలం 345 ఇన్నింగ్స్‌ల్లోనే రోహిత్ ఈ ఘనత సాధించగా.. క్రికెట్ గాడ్ సచిన్ టెండూల్కర్ (348 ఇన్నింగ్స్‌లు) రికార్డును ఆయన బద్దలు కొట్టాడు. ఈ జాబితాలో రన్ మెషీన్ విరాట్ కోహ్లీ 290 ఇన్నింగ్స్‌లతో అగ్రస్థానంలో ఉన్నాడు.

భారత్ తరఫున అత్యంత వేగంగా 14,000 లిస్ట్-ఎ పరుగులు చేసిన టాప్-3 బ్యాటర్లు:

దిగ్గజాల సరసన రోహిత్ శర్మ..

బ్యాటర్ పేరు	ఇన్నింగ్స్‌ల సంఖ్య
విరాట్ కోహ్లీ	290
రోహిత్ శర్మ	345
సచిన్ టెండూల్కర్	348

భారత క్రికెట్ చరిత్రలో 14 వేల కంటే ఎక్కువ లిస్ట్-ఎ పరుగులు చేసిన దిగ్గజాల క్లబ్‌లో రోహిత్ చేరిపోయాడు. సచిన్, కోహ్లీ, గంగూలీ, ద్రవిడ్ మాత్రమే ఇప్పటివరకు ఈ మైలురాయిని దాటారు.

అత్యధిక లిస్ట్-ఎ పరుగులు చేసిన భారత బ్యాటర్లు:

సచిన్ టెండూల్కర్: 21,999 పరుగులు

విరాట్ కోహ్లీ: 16,447 పరుగులు

సౌరవ్ గంగూలీ: 15,622 పరుగులు

రాహుల్ ద్రవిడ్: 15,271 పరుగులు

రోహిత్ శర్మ: 14,007* పరుగులు

మ్యాచ్ విశేషాలు.. పవర్‌ప్లేలో భారత్ హవా..

ఈ మ్యాచ్ కోసం భారత జట్టు మూడు మార్పులతో బరిలోకి దిగింది. యువ ఫాస్ట్ బౌలర్ ప్రిన్స్ యాదవ్ ఈ మ్యాచ్‌తో వన్డే అరంగేట్రం (Debut) చేయగా.. కుల్దీప్ యాదవ్, యశస్వి జైస్వాల్ తిరిగి ప్లేయింగ్ ఎలెవెన్‌లోకి వచ్చారు. టాస్ ఓడి మొదట బ్యాటింగ్ చేసిన భారత్‌కు ఆరంభంలోనే షాక్ తగిలింది. యువ ఓపెనర్ యశస్వి జైస్వాల్‌ను అవుట్ చేయడం ద్వారా ఆఫ్ఘన్ బౌలర్ మహ్మద్ సలీమ్ సఫీ తన కెరీర్‌లో మెయిడెన్ వన్డే వికెట్‌ను ఖాతాలో వేసుకున్నాడు. బ్యాక్‌వర్డ్ పాయింట్‌లో నంగ్యాలియా ఖరోటే అద్భుతమైన క్యాచ్‌తో జైస్వాల్‌ను పెవిలియన్ పంపాడు.

అయినప్పటికీ, టీమిండియాపై ఆ ఒత్తిడి ఎంతోసేపు నిలవలేదు. జైస్వాల్ అవుట్ అయిన తర్వాత రోహిత్ శర్మ వన్డౌన్ బ్యాటర్‌ కెప్టెన్ శుభ్మన్ గిల్‌తో కలిసి ఇన్నింగ్స్‌ను నిలబెట్టాడు. ఆఫ్ఘన్ బౌలర్లపై ఎదురుదాడికి దిగుతూ కేవలం 48 బంతుల్లోనే అజేయంగా 71 పరుగుల భాగస్వామ్యాన్ని నెలకొల్పారు. దీంతో పవర్‌ప్లే ముగిసే సమయానికి భారత్ 1 వికెట్ నష్టానికి 80 పరుగులు చేసి మ్యాచ్‌పై పట్టు సాధించింది. అయితే, హాఫ్ సెంచరీకి 2 పరుగులు దూరంలో రోహిత్ శర్మ పెవిలియన్ చేరాడు. 39 బంతుల్లో 6 ఫోర్లు, 2 సిక్స్‌లతో 48 పరుగులు చేసిన రోహిత్.. మరోసారి హాఫ్ సెంచరీ చేయకుండానే ఔటయ్యాడు.