గురుదక్షిణగా “కోటి” ఇల్లు.. ది గ్రేట్ తలైవా గిఫ్ట్ ఎవరికి..?

సూపర్ స్టార్ రజనీకాంత్ డైలాగ్ చెప్పినా.. స్టెప్పు వేసినా అదరహో అనాల్సిందే. ఇక థియేటర్‌లో అయితే రజనీ సినిమా విడుదలైందంటే చాలు గోలగోల చేస్తారు అభిమానులు. రజనీ ఏ పని చేసినా స్పెషల్‌గానే ఉంటుంది. అలాంటి హీరో రియల్ లైఫ్ లో ఓ మంచి పని చేస్తే అభిమానులు ఎంతో సంతోషిస్తారు. రజనీ ఏం చెప్తే అది తప్పకుండా చేస్తారు. సినీ పరిశ్రమలో తాను గురువుగా భావించే సీనియర్ దర్శక నిర్మాత కలైజ్ఞానంకు ఓ ఇంటిని బహుకరించి కృతజ్ఞత చాటుకున్నారు. సినీ పరిశ్రమకు కలైజ్ఞానం చేసిన సేవలను గుర్తుచేసుకుంటూ కోలీవుడ్ ప్రముఖులు ఇటీవల అభినందన సభను ఏర్పాటుచేశారు. కలైజ్ఞానం అద్దె ఇంట్లో ఉంటున్నారని.. ఆయనకు సొంత ఇల్లు లేదని ఎవరో ప్రస్తావించారు. అది తెలుసుకున్న రజనీ తన గురువుకు బహుమతిగా తానే ఇల్లు ఇస్తానని ప్రకటించారు.

కొద్ది రోజుల్లోనే చెన్నైలోని విరుగాంబాక్కమ్‌లో రూ. కోటి విలువైన ఇంటిని కోనుగోలు చేసి ఆయనకు ఇచ్చారు. తానే స్వయంగా వెళ్లి ఇంట్లో పూజలు జరిపించి.. వారిచే గృహప్రవేశం చేయించారు. రజీని సోలోగా నటించిన తొలి సినిమా భైరవి. కలైజ్ఞానం నిర్మించిన ఈ చిత్రం 1978లో ప్రేక్షకుల ముందుకు వచ్చింది. సినీ రంగంలోకి అడుగుపెట్టిన మొదట్లో సినిమా అవకాశాలు లేక ఇబ్బందులు పడుతున్న సమయంలో కలైజ్ఞానం తనను ఆదుకున్నారని తలైవా గుర్తుచేసుకున్నారు.