డిగ్రీ విద్యార్థినిపై భర్త అత్యాచారం.. దిశ యాప్‌తో పట్టించిన భార్య

ఏపీ ప్రభుత్వం తీసుకొచ్చిన దిశ యాప్ మహిళలకు అండగా నిలుస్తోంది. తాజాగా తన భర్త ఓ యువతిని వేధిస్తుండగా.. పట్టుకున్న భార్య.. అతనిపై దిశ యాప్ ద్వారా పోలీసులకు ఫిర్యాదు చేసింది. ఈ దారుణమైన ఘటన గుంటూరు జిల్లా తాడేపల్లిలో వెలుగుచూసింది.

వివరాల్లోకి వెళ్తే.. తాడేపల్లికి చెందిన అనిల్ కుమార్ రైల్వేగార్డుగా పనిచేస్తూ.. తన భార్య, పిల్లలతో కలిసి నివసిస్తున్నాడు. ఇటీవలే అతని ఇంటి ముందుకు ఓ ఫ్యామిలీ అద్దెకు దిగింది. ఆ కుటుంబంలో ఓ యువతి విజయవాడలోని ఓ కాలేజీలో చదువుతుంది. ఆ యువతిపై కన్నేసిన.. అనిల్ కుమార్ ఎలాగైనా లొంగదీసుకోవాలనుకున్నాడు. ఓ రోజు విద్యార్థిని తన ఇంటి మీదుగా నడుచుకుంటూ వెళ్లగా.. గమనించిన అనిల్.. నీ ఫొటోలు నా దగ్గర ఉన్నాయని బెదిరించాడు. ఖంగుతిన్న యువతి.. చూపించమని కోరగా.. ఇంట్లోకి తీసుకెళ్లాడు. ఆ సమయంలో ఇంట్లో ఎవరూ లేకపోవడంతో యువతిని బెదిరించి అత్యాచారానికి పాల్పడ్డాడు. దాన్ని వీడియో తీసి.. తరుచూ బెదిరిస్తూ అత్యాచారానికి పాల్పడుతూ ఉండేవాడు. అలా ఓ రోజు యువతిని కాలేజీ నుంచి ఓ లాడ్జికి తీసుకెళ్లి అత్యాచారానికి పాల్పడ్డాడు.

అయితే గత కొద్ది రోజులుగా భర్త అనిల్ ప్రవర్తనలో మార్పులు గమనించిన భార్య, నిన్న అతడిని ఫాలో అయ్యింది. అదే సమయంలో ఆ విద్యార్థినిని భర్త బైక్ ఎక్కించుకోవడం చూసి.. దిశ యాప్‌లో పోలీసులకు ఫిర్యాదు చేసింది. పోలీసులు వెంటనే హోటల్‌కి వెళ్లి ఇద్దరినీ అదుపులోకి తీసుకున్నారు. అనేకసార్లు అనిల్ తనపై అత్యాచారినికి పాల్పడినట్లు బాధితురాలు చెప్పడంతో పోలీసులు అతడిని అరెస్ట్ చేసి రిమాండ్‌కు తరలించారు.